Read Dagara, Northern Sɛb-sõw yielu 17 Bible Online

Sɛb-sõw yielu 17 - Dagara, Northern bible

Sɛb-sõw yielu 17

¹Puoru n'ʋ be a Daviir yielu sɛbɛ pʋɔ. Sore e, bɛr wõ a ɩ̃ yel-mɩnʋ, cɛlɛ be wõ a ɩ̃ kon. Ƴãw tobr a ɩ̃ puoru ƴãw na bɛ yire nɩ-bɛlɛ nʋɔrɩ́ a.

²A lɛ a ƴɛ̀rʋ na na dɩ a ɩ̃ ƴãw a, fʋ̃ʋ zie n'a a na yi. Jɩ́r bãw a be lowr a yel-na-tu-sɔr-a na be a.

³Fʋ wa n tɩ̃ɩsɔw, kɛ́ fʋ wa jɛl a ɩ̃ pʋɔ bãw a ɩ̃ yel-mɩŋa. Fʋ ɩ m a kaa, ɛ́ bɛ nyɛ̃ sãwna a ɩ̃ zie ɩ. Ɩ̃ bɛ ƴɛ̀r ƴɛ̀rʋ kãw za

⁴a nɩ-yoru ɩ-ɩrɩ ƴãw ɛ, ɛcɛ ɩ̃ ƴãw nɩ fãw ɩ mɛ̃ a lɛ fʋ na tɩ yel a. Ɩ̃ tu n a sɛ́ɛ fʋ na yel kɛ́ bɛ tuur a.

⁵Ɩ̃ sawl'ɩ a ɩ̃ gbɛ́ɛ a fʋ gbɛ́ɛ bɔwrɩ pʋɔ, ɩ̃ bɛ ŋmɛ gbɛ́r ɛ.

⁶Ɩ̃ Naaŋmɩn i, fʋ̃ʋ n'ʋ ɩ̃ bʋɔlɛ, fʋ na mɩ́ sɔw mɛ̃ a ƴãw. Cɩɩl tobr cɔw mɛ̃, bɛr wõ a ɩ̃ ƴɛ̀rʋ.

⁷Wul a fʋ nɔ̃wfʋ ɩb na bɛ tɛr manʋ a, fʋ̃ʋ na mɩ́ faa a bɛlɩ dem na zɔrɛ kpɩɛr a fʋ naayir, a bɛ fɛr-fɛrbɛ nuru pʋɔ a.

⁸Gùre mɛ̃, mɛ̃ a fʋ mimi-gbil a, sɔwlɩ mɛ̃ a fʋ pɩgɛ ɓaarʋ́,

⁹a nɩ-faar na dɔwrɛ mɛ̃ a ƴãw, a dɔ̃ dem na bɔbr ɩ̃ kʋb, na ŋmãa jil mɛ̃ a ƴãw.

¹⁰Bɛ ɩ n 'wɔra 'wɔra a, ɛ́ ƴɛ̀rɛ pɔ̀l-ƴɛ̀rʋ.

¹¹Bɛ ta na tu m, bɛlɛ n'ɩ bɛ ŋan jile kole mɛ̃, bɛ jɩɛrɛ nɩ a daar bɛ na na lɔb mɛ̃ a tẽw a.

¹²Bɛ ɩ na mɛ̃ gbẽw na ũú tuw pʋɔ gù bom a, mɛ̃ gbẽw-bile na ũú a ʋ bɔw pʋɔ gù bom a.

¹³Sore e, ìr tuori a ɩ̃ dɔ̃ dem, nyɔw bɛ lɔb tẽw. Faa mɛ̃ a nɩ-faar nuru pʋɔ.

¹⁴A fʋ zɛbr-sɔ-kpɛ̃ɛ, ʋ baarɩ bɛ! Baa kʋ bɛ nɩ a fʋ nũu. A bɛ bom a nɩ-vʋʋrɩ pʋɔ a, ʋ ɩ bɛ na na kʋ̃ pʋɔ a nyɔ-vʋʋrʋ pʋɔ a. Ɩ kɛ̀ bɛ nyũ a kʋ̃ɔ-tuo fʋ na bin gùre nɩ bɛ a. A bɛ bibiir, bɛ nyũ a tɩ sɛw, ɛ́ bɛr a ŋmãa kʋ̀ a bɛ yan!

¹⁵Ɛcɛ mãa a, sɔ́r be n be, ɩ̃ na nyɛ̃ nɩ a fʋ niwn. A ɩ̃ ìru daar a, fʋ na sãá na ɩ̃ jɩ́r fʋ tɩ sɛw.