Read Dagara, Northern Sɛb-sõw yielu 18 Bible Online

Sɛb-sõw yielu 18 - Dagara, Northern bible

Sɛb-sõw yielu 18

¹A yiel-yielbɛ nɩ-kpɛ̃ɛ sɛbɛ pʋɔ yielu kãw n'ʋ. A Sore tõ-tõ-bie Daviir yielu sɛbɛ pʋɔ yielu kãw n'ʋ. A Daviir tɩ ƴɛ̀r'ɩ a ƴɛ̀rʋ á ŋá za kʋ̀ a Sore, a lɛn daar ʋ na tɩ faa ʋ a ʋ dɔ̃ dem za nuru pʋɔ a, baa zuo a za a Sawul nuru pʋɔ a.

²Ʋ tɩ yel a: Sore e, ɩ̃ nɔnɛ fʋ na, fʋ̃ʋ n'ɩ a ɩ̃ fãw.

³A ɩ̃ Naaŋmɩn ɩ n pìir, ɩ̃ na mɩ́ taw lanɩ a yel-faar daar a, zɛbr-kur-pãgala na mɩ́ piw mɛ̃ a, fãw na faarɛ mɛ̃ a, zɛbr-yir-kpɛ̃w pʋɔ ɩ̃ na mɩ́ nyɛ̃ faafʋ a. Ʋl zie n'a ɩ̃ mɩ́ sɔwlɩ, a po-to-fãw dem bɛ tʋ̃ɔ́ páw mɛ̃ ɩ.

⁴A Sore, ʋ tɛr danʋ! Mãa wa bʋɔlɛ ʋ wa báarɛ a, ʋ mɩ́ faa mɛ̃ nɩ a ɩ̃ dɔ̃ dem nuru pʋɔ.

⁵A kũu mie tɩ 'lẽ m'a baarɩ, a kũu tɩ ƴãw mɛ̃ nɩ pʋl-vʋ̃ɔ mɛ̃ man kʋ̃ɔ na mɩ́ tuo bom za cen nɩ a.

⁶A kpɩmɛ tẽw mie tɩ vili vili mɛ̃ na, a kũu bɛrɩ tɩ be n a ɩ̃ nisɔw.

⁷A ɩ̃ kpɩɛrʋ pʋɔ, ɩ̃ bʋɔl'ɩ a Sore, ɩ̃ lɔb'ɩ cɛl kʋ̀ a ɩ̃ Naaŋmɩn. Ʋ be n a ʋ yir pʋɔ ɛ́ wõ a ɩ̃ kɔkɔr, a cɛl ɩ̃ na ŋmɛ a lo n a ʋ tobrí.

⁸Lɛ n'a a tẽsɔw tɩ gbiwri ɛ́ dam, a tan pɛ́ɛ tɩ dam'a a dãdawlɛ, a Sore suur na tɩ ìr a ƴãw.

⁹Zʋ̀ʋ́r tɩ yire nɩ a ʋ nyɔbɔgɛ pʋɔ, ɛ́ vũu dɩrɛ yire a ʋ nʋɔrɩ́, lãwnɩ vũu-bi-cõcole.

¹⁰Ʋ tɩ taw nɩ a salom yuo ɛ́ siw, ɛ́ zũzuw-sɛbla be a ʋ gbɛ́ɛ pile.

¹¹Ʋ tɩ zɔm'ɩ seribɛ̃ ƴaw nɩ, ɛ́ be a sɛsɛb pɩgɛ zu laarɛ.

¹²Ʋ tɩ sɔwl'ɩ zũzuw-sɛbla pʋɔ, zũzuw-sɛblɛ n'a ʋ tɩ pili pàw ʋ tʋɔra, zũzuge na sɔb mɛ̃ kʋ̃ɔ-zulu a.

¹³Cãà tɩ de ʋ nɩ niwn ɛ́ a zũzuge zɔrɛ tɔlɛ, sa-bi-kube nɩ vũu-bi-cõcole.

¹⁴A Sore tɩ ɩ na a saa tanɩ a salom zu, a Naaŋmɩn-na-do-saa-bɛ-pɩɛl-a kɔkɔr tɩ yi n kpɛ̃w kpɛ̃w za.

¹⁵Ʋ tɩ ɩ na a saa nyɩwrɩ pàw a ziir za. Ʋ tɩ tɛn pime bɛr a ziir za.

¹⁶Sore e, a fʋ tanʋ nɩ a fʋ suur sɛsɛb tɩ ɩ na a kʋ̃ɔ-kpɛ̃ɛ pɛr sãá, a tẽsɔw-kɔbr pɛr sãá.

¹⁷A Sore tɩ be n salom zu ɛ́ tur a nũu nyɔw mɛ̃, ʋ tɩ yaarɩ mɛ̃ nɩ a kʋ̃ɔnɩ pʋɔ.

¹⁸Ʋ tɩ faa mɛ̃ nɩ a ɩ̃ dɔ̃ dem na tɛr fãw a nuru pʋɔ, a ɩ̃ dɔ̃ dem na kpɛmɛ zuo mɛ̃ a.

¹⁹Bɛ tɩ wa n ɩ̃ ƴãw a ɩ̃ baw-bio bibir, ɛcɛ a Sore tɩ wa na wa tɩɛ mɛ̃,

²⁰ʋ ír mɛ̃ na bɛr, k'ɩ̃ cere, ʋ faa mɛ̃ na, ʋ na nɔnɛ mɛ̃ a ƴãw.

²¹A Sore ɩrɛ nɩ à ŋá a ɩ̃ zie, a ɩ̃ mɩnʋ zũú, ʋ ɩrɛ mɛ̃ nɩ à ŋá, a ɩ̃ nuru tõ-vɩɛlɩ ƴãw.

²²Bʋ̃ʋ n'ʋ vɛ̃, ɩ̃ tu n a Sore sɛ́ɛ, ɩ̃ bɛ ɩ ɩb kãw sãw a ɩ̃ Naaŋmɩn ɛ.

²³Ɩ̃ tuur'ɩ a lɛ za ʋ na yel a, a lɛ-na-tu-sɔr ʋ yel a, ɩ̃ bɛ zawrɩ bɛr ɛ.

²⁴Ɩ̃ bɛ tɛr sãwna a ʋ zie ɩ, ɛ́ gù ɩ̃ tʋɔra yel-bier ƴãw.

²⁵Lɛ n'a a Sore maalɩ mɛ̃ tu n a ɩ̃ mɩnʋ, tu n a ɩ̃ nuru tõ-vɩɛlɩ ʋ na nyɛ̃ a.

²⁶Sore e, fʋ ŋmɛ̃ n fʋ ŋmɛ̃a a sob nɛ na bɛ lɛbr pùor a zie, fʋ bɛ tɛr sãwna, nɩr na bɛ tɛr sãwna a zie ɩ.

²⁷Fʋ vɩɛl'ɩ parpar, nɩr na vɩɛl parpar a zie, ɛ́ wul kɛ́ fʋ cɩ n a yã-faa sob zie.

²⁸Fʋ̃ʋ n'ʋ mɩ́ faa a su-siwri dem, ɛ́ ɩ a pɔ̀lʋ dem su zuru.

²⁹Sore e, mãa zie a, fʋ ɩ n fɩ̃tɩlɛ na 'lere a, ɩ̃ Naaŋmɩn i, fʋ̃ʋ n'ʋ caalɛ a ɩ̃ tɩ̃ɩsɔw lige.

³⁰Fʋ̃ʋ n'ʋ ɩ̃ mɩ́ lãwnɩ ƴaw gãw a bɔw, a fʋ̃ʋ ɩ̃ Naaŋmɩn zũú n'a ɩ̃ na tʋ̃ɔ́ ƴaw gãw a dacĩ-kpɛ̃ɛ.

³¹A Naaŋmɩn sɔ́r vɩɛl'ɩ ʋ za, a ʋ ƴɛ̀rʋ bɛ tɛr bʋnʋ ɛ. Bɛlɩ dem za na mɩ́ zɔ kpɛ a Sore naayir a, ʋ ɩ na mɛ̃ zɛbr-kur-pãgala na mɩ́ piw bɛ a.

³²Ãa n'ʋ ɩ Naaŋmɩn ʋ bɛ ɩ a Sore? Ãa n'ʋ ɩ pìir a tɩ ƴãw, ʋ bɛ ɩ a tɩ Naaŋmɩn?

³³Ʋlɛ n'ʋ mɩ́ kʋ̀ m a fãw ɩ̃ ɩrɛ nɩ, ʋlɛ n'ʋ mɩ́ ɩ a ɩ̃ cenu ʋ vɩɛl ʋ za,

³⁴ʋlɛ n'ʋ mɩ́ ɩ ɩ̃ zɔrɛ mɛ̃ wala a, ɛ́ ɩ ɩ̃ be ziir na kɛrɩ a zu.

³⁵Ʋlɛ n'ʋ mɩ́ zanɛ nɩ mɛ̃ a zɛbr, ɛ́ mɩ́ sõw mɛ̃ ɩ̃ dúori tam na kpɛmɛ jɩjɩ a.

³⁶Sore e, a fʋ dʋrʋ nũu mɩ́ tɩɛ mɛ̃ na tɛr, fʋ ɩ na mɛ̃ zɛbr-kur-pãgala na piw mɛ̃ tɛr ɛ́ faa mɛ̃ a, fʋ mɩ́ sàw nɩ a ɩ̃ bʋɔlʋ, ɛ́ ɩ k'ɩ̃ kpɛmɛ.

³⁷Fʋ̃ʋ n'ʋ mɩ́ ɩ ɩ̃ dɔl gbɛ́r, ɛ́ a ɩ̃ gbɛnakɔɛ bɛ vir ɛ.

³⁸Ɩ̃ diwr'ɩ a ɩ̃ dɔ̃ dem, ɩ̃ páw bɛ na, ɩ̃ɩ bɛ lɛbr pùor, mãa bɛ wa baarɩ a bɛ yele a ɩ.

³⁹Ɩ̃ gɔr gɔr bɛ na, bɛ kʋ̃ lɛb tʋ̃ɔ́ ìr ɛ, bɛ gã nɩ tẽw, ɩ̃ dĩ nɩ bɛ nɩ gbɛ́ɛ.

⁴⁰Fʋ kʋ̀ m'ɩ fãw a zɛbr ƴãw, a bɛlɩ dem na ìr a ɩ̃ ƴãw a, fʋ ɩ na ɩ̃ tʋ̃ɔ́ bɛ.

⁴¹Fʋ ɩ na a ɩ̃ dɔ̃ dem lɩɛb zɔ a ɩ̃ niŋé, ɛ́ ɩ ɩ̃ tʋ̃ɔ́ a bɛlɩ dem na hɩ̃ɛn mɛ̃ a pẽlẽpẽlẽ.

⁴²Bɛ cɩɩrɛ na, ɛ́ faarɛ bɛ ka be ɩ. A Sore n'ʋ bɛ cɩɩrɛ bʋɔlɛ, ʋʋ bɛ sɔwr ɛ.

⁴³Ɩ̃ ɩ na bɛ lɩɛbɩ uuru, sɛsɛb de cere nɩ, ɩ̃ nɛb nɛb bɛ na mɛ̃ sɛ́ɛ zu mɛ̃mɛrɛ a.

⁴⁴Fʋ faa mɛ̃ nɩ a nɩbɛ na ìr zɛbr'ɩ mɛ̃ a nuru pʋɔ, fʋ ɩ na k'ɩ̃ de a nɩ-bʋʋr-yoru niwn, nɩbɛ ɩ̃ na bɛ bãw a tone nɩ a ɩ̃ tome,

⁴⁵mãa wa ƴɛ̀rɛ lɛ pɛ, bɛ mɩ́ sàw nɩ a ɩ̃ nʋɔr. Zawlbɛ waar'a wa ƴɛ̀rɛ nɔ-kãá a ɩ̃ zie,

⁴⁶a bɛ fãw báarɛ na, bɛ màwr'a wa yire nɩ a bɛ sɔwlʋ ziir.

⁴⁷A Sore vʋʋrɛ na! A sob nɛ na ɩ a ɩ̃ pìir a tɛr'ɩ puoru! A Naaŋmɩn ɩ̃ faarɛ ɩ n kpɛ̃ɛ!

⁴⁸A Naaŋmɩn ŋa n'ʋ mɩ́ ɩ k'ɩ̃ yáa a san, ɛ́ mɩ́ dĩ nɩbɛ bin a ɩ̃ pile.

⁴⁹Sore e, fʋ mɩ́ sɔwlɩ mɛ̃ nɩ a ɩ̃ dɔ̃ dem niŋé, mɔ̃ mɩ̀, fʋ mɩ́ ɩ na ɩ̃ tʋ̃ɔ́ a ɩ̃ fɛr-fɛrbɛ. Fʋ mɩ́ faa mɛ̃ nɩ a po-to-fãw dem nuru pʋɔ.

⁵⁰Lɛ so ɩ̃ danɛ fʋ a nɩ-bʋʋr-yoru sɔgɔ, Sore e, ɛ́ yiele íre nɩ a fʋ yúor.

⁵¹A Sore mɩ́ ɩ na a ʋ nãà zɛb tʋ̃ɔ́ zɛb-bɛrɛ pʋɔ, ʋ maalɛ nɩ a ʋ nɩ-kabra vla, a Daviir nɩ a ʋ bʋʋrɛ, kʋrakʋralɛ.