Read Dagara, Northern Sɛb-sõw yielu 19 Bible Online

Sɛb-sõw yielu 19 - Dagara, Northern bible

Sɛb-sõw yielu 19

¹A yiel-yielbɛ nɩ-kpɛ̃ɛ sɛbɛ pʋɔ yielu kãw n'ʋ. Daviir yielu kãw n'ʋ.

²A salom manɛ nɩ a Naaŋmɩn yúor-vɩɛlʋ-danʋ, a saa ŋmar-bie manɛ nɩ a ʋ nuru tome.

³A bibir mɩ́ man a na kʋ̀ a bibir, ɛ́ a tɩ̃ɩsɔw ɩ a tɩ̃ɩsɔw bãw a.

⁴Ƴɛ̀rʋ bɛ n'a ɩ, ƴɛ̀r-bie yele bɛ n'a ɩ, a tobr bɛ wone bom za ɩ.

⁵Ɛcɛ a yel a na yere a lʋɔrɛ nɩ a tẽw za, a ƴɛ̀rʋ a na ƴɛ̀rɛ a tɔ n a tẽw baarʋ zie. Naaŋmɩn maal'ɩ pɛn-sɛw a salom zu a mʋ̃tɔ̃w ƴãw.

⁶A biɓaara ʋ mɩ́ yi a ʋ dĩó mɛ̃ dɛ-sãan a, mɛ̃ gãdaa nʋ̃ɔ̀ na ɩrɛ, ʋ lo ʋ sɔ́r a.

⁷Ʋ mɩ́ pur'ɩ tẽw-tʋra ŋa ƴãw, ɛ́ zɔ tɩ sãá tẽw-tʋra ŋa ƴãw, ɛ́ a ʋ tʋlʋ bɛ jɩɩrɛ bom za bɛrɛ ɩ.

⁸A Sore wulu vɩɛl'ɩ ʋ za, ʋ mɩ́ lɛb'a tɩr a nyɔ-vʋʋrʋ. A Sore dãsɩɛ ʋ na dɩ a ɩ n yel-mɩŋa, ʋ ɩ n a bɛlɩ dem na bɛ zɛwr bɛ tʋɔra a yã-bãwfʋ.

⁹A Sore nɛ́ɛ tori nɩ dẽdẽ, a mɩ́ ƴãw nɩ nʋ̃ɔ̀ a socir. A Sore nɔ-ƴãwnɩ vɩɛl'ɩ parpar, a mɩ́ ɩ na fʋ nyɛrɛ.

¹⁰A Sore ƴãwfʋ vɩɛl'a, ʋ bɛ tɛr nãà baarɩ ɛ. A ƴɛ̀rʋ a Sore na mɩ́ dɩ a, a mɩ́ ɩ n sɩza, a za mɩ́ tu n mɩnʋ.

¹¹Bʋ̃-bɔbra n'a sɩza zuo salm-zɩɛ, salm-zɩɛ na nyɩwrɛ bɛ tɛr ʋ tɔ a. A nʋmɛ na gãw sɩwr, sɩw-kãá na yule sɩw-gamɛ pʋɔ a.

¹²A fʋ tõ-tõ-bie mɩ́ de a na a caalɛ ʋ, a pùor-tub tɛr'ɩ tɔnɛ yaga a ʋ zie.

¹³Ãa n'ʋ bɛ tule? Dɩ a ɩ̃ sãwna na sɔwlɩ a suur kʋ̀ m!

¹⁴Mɩ̀ gù a fʋ tõ-tõ-bie a pɔ̀lʋ dem ƴãw, bɛ taa wa nanɩ tʋ̃ɔ́nɛ mɛ̃ ɩ. Lɛ n'a ɩ̃ kʋ̃ tɛr sãwna ɩ, ɛ́ yel-bier-kpɛ̃ɛ dɛwr kʋ̃ be ɩ̃ zie ɩ.

¹⁵Sore, ɩ̃ pìir nɩ ɩ̃ faarɛ ɛ, a ɩ̃ nʋɔr ƴɛ̀rʋ nɩ a ɩ̃ socir tɩɛrʋ, a nʋmɛ a fʋ zie!