Read Dagara, Northern Sɛb-sõw yielu 27 Bible Online

Sɛb-sõw yielu 27 - Dagara, Northern bible

Sɛb-sõw yielu 27

¹Daviir so ʋ. A Sore n'ɩ a ɩ̃ cãà nɩ a ɩ̃ faarɛ, ãa dɛ̃bɩ̃ɛ n'a ɩ̃ na zɔrɛ? A Sore n'ʋ gùre a ɩ̃ nyɔ-vʋʋrʋ, ãa niŋé n'a ɩ̃ na màwr?

²Yel-fa-maalbɛ wa tawr pɩɛlɛ mɛ̃ kɛ́ bɛ taw mɛ̃ ɓɛl a, bɛlɛ nɛbɛ ɩ a ɩ̃ dɔ̃ dem nɩ a nɩbɛ na ɩrɛ mɛ̃ a kpɩɛr a, bɛlɛ nɛbɛ mɩ́ kaw lo.

³Zɛbr-nɩbɛ wa ŋmãa jil pàw mɛ̃ a, dɛ̃bɩ̃ɛ kãw za bɛ ɩrɛ mɛ̃ ɩ. Zɛbr mɩ̀ saa ír a ɩ̃ ƴãw a, ɩ̃ na bɛr'ɩ tɩɛrʋ.

⁴Bʋ̃-been yõ n'ʋ ɩ̃ zɛlɛ a Sore zie, bʋ̃-been yõ ɩ̃ na bɔbr tuotuo a: ɩ̃ kpɩɛr a Sore yir pʋɔ a ɩ̃ bibi-vɩɛrɩ za, tʋ̃ɔ́ úore a Sore vɩɛlʋ ɛ́ puore a ʋ yir pʋɔ.

⁵Lɛ n'a ʋ na sɔwlɩ mɛ̃ a ʋ yir pʋɔ, a kpɩɛrʋ bibir nãà wa vɩɛ a, ʋ na sɔwlɩ mɛ̃ nɩ a ʋ dĩó, ʋ na ɓáw mɛ̃ na dɔwlɩ pìir na kɛrɩ a zu.

⁶A na ɩ lɛ a, ɩ̃ na zɛw nɩ zu a ɩ̃ dɔ̃ dem na jil koli mɛ̃ a pʋɔ. Ɩ̃ na maalɛ nɩ bàwr kʋ̀rɛ a Sore a ʋ yir pʋɔ, ɛ́ cáarɛ danɛ nɩ ʋ, ɩ̃ na yiele nɩ yielu a ʋ ƴãw.

⁷Sore e, bɛr wõ a cɛl ɩ̃ na lɔb a, zɔ nɩbaalʋ ɛ́ sɔw mɛ̃.

⁸Ɩ̃ tɩ́ɛrɛ nɩ a ƴɛ̀rʋ ŋa fʋ na ƴɛ̀r a: «Nyɩ bɔbr a ɩ̃ niwn». Sore e, a fʋ niwn n'ʋ ɩ̃ bɔbr k'ɩ̃ɩ nyɛ̃.

⁹Ta lɩɛbɩ kpaar cɔw mɛ̃ ɩ, ta dáa a mãa fʋ tõ-tõ-bie bɛr'ɩ suur ɛ, fʋ̃ʋ na ɩ a ɩ̃ sõwne a. Ta jɛ m bɛr ɛ, ta zawrɩ mɛ̃ bɛr ɛ, fʋ̃ʋ Naaŋmɩn na ɩ a ɩ̃ faarɛ a.

¹⁰Ɩ̃ sãà nɩ ɩ̃ mã saa ɩ mɛ̃ bɛ zawrɩ mɛ̃ na bɛr a, ɛcɛ fʋ̃ʋ a, Sore e, fʋ na de m'a[9].

¹¹Sore e, wul mɛ̃ a fʋ sɔ́r. A ɩ̃ dɔ̃ dem ƴãw a, tɛr mɛ̃ lo n sɔr-vla.

¹²Ta bɛr mɛ̃ bɛ ɩ m mɛ̃ a lɛ bɛ na tɩ́ɛrɛ a ɩ, bʋ̃ʋ n'ʋ vɛ̃, dãsɩ-ziri dem ìr'ɩ a ɩ̃ ƴãw bɔbr kɛ́ bɛ fɛrɛ mɛ̃.

¹³Bʋnʋ bɛ ka be ɩ, ɩ̃ na nyɛ̃ nɩ a Sore nɔ̃wfʋ a nɩ-vʋʋrɩ tẽw pʋɔ.

¹⁴— Ƴãw a fʋ tɩ́ɛrʋ a Sore ƴãw, dɩ kanyir ɛ́ tɛr soci-kpɛ̃w, ƴãw a fʋ tɩ́ɛrʋ a Sore ƴãw.