Read Dagara, Northern Sɛb-sõw yielu 37 Bible Online

Sɛb-sõw yielu 37 - Dagara, Northern bible

Sɛb-sõw yielu 37

¹Daviir so ʋ. Taa nyɛrɛ nɩ a yel-fa-maalbɛ suur ɛ, ta nyùur'ɩ a bɛlɩ dem na ɩrɛ faa a ɩ:

²bɛ na var'ɩ fɔ̃wlɛ, mɛ̃ a mʋ̃ɔ a, bɛ na ko na mɛ̃ a váar na mɩ́ ko a.

³Ƴãw a fʋ tɩɛrʋ a Sore ƴãw ɛ́ ɩrɛ vla, lɛ n'a fʋ na kpɩɛr a tẽw ɛ́ tɛr ƴã-ɓaarʋ.

⁴Ɩ a Sore ʋ ɩ a fʋ nʋ̃ɔ̀, ʋʋ na mɩ́ kʋ̀ b'ɩ ʋlɩ bom nɛ fʋ na bɔbr a.

⁵De a fʋ yele ƴãw a Sore nũú, tɩɛrɛ ʋ, ʋʋ na maal'ɩ a lɛ na n'a a.

⁶Ʋ na ɩ na a fʋ mɩnʋ sãá mɛ̃ zi-wɛl-paala cãà a, ɛ́ a fʋ yel-mɩŋa ɩ mɛ̃ mʋ̃tɔ̃-tuo a.

⁷Ɩ gbili a Sore niŋé, ɛ́ tɩɛrɛ ʋ. Taa nyɛrɛ nɩ a sob nɛ yele na cere vla a suur ɛ, a nɩr na mɩ́ tɛr libelibe a ɩ.

⁸Bɛr a suur, zawrɩ a fʋ su-yãyaar bɛr. Ta nyɛrɛ suur ɛ, faa tɛwr'a a na wa n.

⁹Bʋ̃ʋ n'ʋ vɛ̃, bɛ na ír'ɩ a yel-fa-maalbɛ bɛr, ɛcɛ a bɛlɩ dem na tɩɛrɛ a Sore a na so nɩ a tẽw.

¹⁰A cãà na cɛ blã, ɛ́ nɩ-faa yee! Fʋ na bɛl bɛl'ɩ a be ʋ na tɩ be a, nɩr za kʋ̃ cãà be ɩ!

¹¹Ɛcɛ a su-siwri dem na so nɩ a tẽw, bɛ na tɛr'ɩ ƴã-ɓaarʋ bɔkɔɔ!

¹²A nɩ-faa mɩ́ sɔwl'a cɔbrɛ yel-faar a nɩ-mɩŋa ƴãw, ʋ mɩ́ nyɛ̃ nɩ ʋ nɩ suur pi kɔkɛɛ.

¹³Ɛcɛ a Sore laar ʋ na, ʋ na nyɛ̃ a ʋ san-yaafʋ bibir ʋ tarɛ a ƴãw.

¹⁴A nɩ-faar vʋ̃ɔnɛ nɩ a zɛbr-sɔ-kpɛ̃ɛ, bɛ dúore nɩ a tam, kɛ́ bɛ tɛ a bãbàal nɩ a nã́w sob lɔb, kɛ́ bɛ kʋ a bɛlɩ dem na cere vla a.

¹⁵Ɛcɛ a bɛ zɛbr-sɔ-kpɛ̃ɛ na lɛb'a ŋmɛlɩ cɔ̀r a bɛ socir, ɛ́ a bɛ tam kar.

¹⁶A blã a nɩ-mɩŋa na tɛr a sa n a nɩ-faa na-bome yaga yaga,

¹⁷bʋ̃ʋ n'ʋ vɛ̃, a nɩ-faar fãw na baar'a, ɛcɛ Sore mɩ́ tɩɛ nɩ a nɩ-mɩn tɛr.

¹⁸A bɛlɩ dem na bɛ tɛr sãwna a, a Sore mɩ́ kaarɛ nɩ a bɛ nyɔ-vʋʋrʋ zie, ɛ́ a tẽw na ɩ a bɛ gbã-dɩ-bom a, bɛ na so ʋ nɩ kʋralɛ.

¹⁹Bɛ kʋ̃ nyɛ̃ vĩ a kpɩɛrʋ daar ɛ, ɛ́ a kɔ̃ bibie wa ta a, bɛ na mɩ́ tɩw na.

²⁰A nɩ-faar na kpi na wɛ, a Sore dɔ̃ dem kʋ̃ cɛlɩ zuo, a dʋn mʋ̃ɔ 'wɔbrʋ ziir mɔ̃-puuru ɛ. Bɛ na tɔl'a, bɛ na lɩɛb'ɩ zʋ̀ʋ́r tɔl.

²¹A nɩ-faa mɩ́ pɛ̃w na ɛ́ bɛ lɛb tɩr ɛ, ɛcɛ a nɩ-mɩŋa ʋl zɔrɛ nɩ nɩbaalʋ mɩ́ tɩr.

²²A bɛlɩ dem a Naaŋmɩn na mɩ́ maalɩ a, na so nɩ a tẽw, ɛ́ a bɛlɩ dem ʋ na mɩ́ ŋmɛ ƴãw a, bɛ na ír bɛ na bɛr.

²³A Sore zũú n'a a nɩsaal cenu mɩ́ vɩɛl, ɛ́ a Sore nɔnɛ a sob sɔ́r.

²⁴Ʋlɛ wa ɩ mɛ̃ ʋ lo na a, ʋ bɛ mɩ́ gã a tẽw ɛ, a Sore na nyɔw ʋ a nũú a ƴãw.

²⁵Ɩ̃ tɩ dãw na ɩ pɔlbile, ɛ́ mãa n'ɩ ŋan kor. Ɛcɛ ɩ̃ bɛ dãw nyɛ̃ bɛ zawrɩ a nɩ-mɩŋa bɛr ɛ, mɩ̀ bɛ dãw nyɛ̃ a ʋ bibiir bɛ zɛlɛ dɩrɛ ɩ.

²⁶Ʋ zɔrɛ nɩ nɩbaalʋ kʋralɛ, ɛ́ pɛ̃wn a ʋ bome, ɛ́ a ʋ bibiir ɩ Naaŋmɩn maalʋ.

²⁷Dɛrɛ a faa, ɛ́ maalɛ a vla, ɛ́ fʋ na tɛr'ɩ kpɛb zie kʋralɛ,

²⁸bʋ̃ʋ n'ʋ vɛ̃, a Sore nɔnɛ na kɛ́ bɛ ɩrɛ mɛ̃ a lɛ-na-tu-sɔr-a, ɛ́ bɛ zawrɛ a ʋ nɩbɛ na sàw de ʋ a bɛrɛ ɩ. Ʋ gùre bɛ nɩ kʋralɛ, ɛcɛ bɛ na ír'ɩ a nɩ-faar bʋʋrɛ bʋʋrɛ bɛr.

²⁹A nɩ-mɩn na so nɩ a tẽw, bɛ na kpɩɛr ʋ nɩ kʋralɛ.

³⁰A nɩ-mɩŋa mɩ́ tɛr'ɩ a yã-bãwfʋ suole, a lɛ-na-tu-sɔr-a n'a ʋ mɩ́ yere.

³¹A ʋ Naaŋmɩn wulu be n a ʋ socir pʋɔ, ʋ bɛ cere dẽdere ɩ.

³²A nɩ-faa jɩɛrɛ nɩ a nɩ-mɩŋa ɛ́ bɔbr a ʋ kʋb,

³³ɛcɛ a Sore bɛ bɛrɛ a nɩ-mɩŋa kʋ̀rɛ ʋ ɛ. Bɛlɛ wa dɩrɛ nɩ a nɩ-mɩŋa ƴɛ̀rʋ a, a Sore bɛ bɛrɛ bɛ ƴãwnɛ ʋ dɔwrʋ ɛ.

³⁴Ƴãw a fʋ tɩɛrʋ a Sore ƴãw, ɛ́ tuur a ʋ sɔ́r, ʋ na zɛw fʋ na, ɩ fʋ so a tẽw, ɛ́ fʋ na nyɛ̃ nɩ a nɩ-faar bɛ na ír bɛr a.

³⁵Ɩ̃ tɩ nyɛ̃ nɩ a nɩ-faa, ʋ ɩrɛ a nɩbɛ dɛ̃bɩ̃ɛ, ɛ́ tɩ ìr àr mɛ̃ Libã tẽw sɛɛdɩr tɩɛ a.

³⁶Ɩ̃ lɛb'a tu tɔl a be: nɩr zaa yee! Ɩ̃ bɔ ʋ na, ɛ́ bɔ gù.

³⁷Jɩ́rɛ a nɩ-vla, ɛ́ nyɛ̃ a nɩr na cere dẽdẽ a: a nɩr na nɔnɛ a ƴã-ɓaarʋ a mɩ́ tɛr'ɩ bʋʋrɛ.

³⁸Ɛcɛ a nɩ-gaarɩ na kpi n bɛ za pàw pɛr, bɛ na ír'ɩ a nɩ-faar bʋʋrɛ bɛr.

³⁹A Sore zie n'a a nɩ-mɩn faafʋ yire, ʋlɛ n'ɩ a bɛ zɛbr-yir-kpɛ̃w a kpɩɛrʋ daar.

⁴⁰Ʋ mɩ́ sõw bɛ na, ɛ́ faa bɛ. Ʋ mɩ́ ír bɛ nɩ a nɩ-faar nuru pʋɔ, ɛ́ faa bɛ, bɛ na mɩ́ zɔ kpɛ a ʋ naayir a ƴãw.