Read Dagara, Northern Sɛb-sõw yielu 38 Bible Online

Sɛb-sõw yielu 38 - Dagara, Northern bible

Sɛb-sõw yielu 38

¹Yielu kãw a Daviir na maalɩ a n'ʋ. Kɛ́ Naaŋmɩn tɛr a ʋ tɩɛrʋ.

²Sore e, fʋ nyɛ̃ nɩ mɛ̃ nɩ suur, ɛcɛ ta ƴãw mɛ̃ dɔwrʋ ɛ, ta kpãa mɛ̃ nɩ su-yãyaar ɛ.

³A fʋ pime nyɔw mɛ̃ na, ɛ́ a fʋ nũu ŋmɩɛrʋ siw a ɩ̃ zu.

⁴A ɩ̃ ƴã-gan zie za bɛ cɛ ɩ, a fʋ suur zũú. A ɩ̃ kɔbɛ zie za bɛ cɛ ɩ, a ɩ̃ yel-bier zũú.

⁵A ɩ̃ sãwna do na tɔl gãw a ɩ̃ zu bɛr, a dĩ m'a mɛ̃ tuor na tɩbrɛ zuo mɛ̃ a.

⁶A ɩ̃ natɩɛ nyùur'a ɛ́ luwr, ɛ́ a ɩ a ɩ̃ dãbolu n'a so.

⁷Ɩ̃ ka na gùr, ɩ̃ bɛ cãà tɛr tʋ́ɔr ɛ, ɩ̃ mɩ́ ɩ n wahala sob a bibi-ɓil za.

⁸A ɩ̃ sɩ́ɛ ɩ na mɛ̃ ʋ 'lere nɩ vũu a, a ɩ̃ ƴã-gan zie bɛ cɛ bɛ 'wɔbr ɛ.

⁹A ɩ̃ fãw baar'a, ɩ̃ bàl'ɩ kʋlkʋl, a ɩ̃ socir dam'a, ƴãw k'ɩ̃ mɩ́ tɛr a 'woi, 'woi!

¹⁰Sore e, fʋ nyɛ̃ nɩ a ʋlɩ bom nɛ ɩ̃ na bɔbr a, ɛ́ bãwnɩ a ɩ̃ na mɩ́ vʋʋrɩ a fãa a.

¹¹A socir tʋ̀ɔr mɛ̃ nɩ ger ger! A ɩ̃ fãw báarɛ na, a ɩ̃ mimi-biir kpi n a za.

¹²A ɩ̃ bárɩ nɩ a ɩ̃ taabɛ bɛ pɩɛlɛ a ɩ̃ natɩɛ ɩ, a ɩ̃ nɩbɛ mɩ́ àr'a zãá.

¹³A bɛlɩ dem na bɔbr a ɩ̃ kũu a ƴãwnɛ nɩ a bɛ bɛrɩ, a bɛlɩ dem na bɔbr a ɩ̃ faa a tʋʋr'ɩ zʋmɛ, ɛ́ a bibi-ɓil za bɛ ƴãw a bɛlʋ nɛ́ɛ.

¹⁴Ɛcɛ mãa a, ɩ̃ ɩ na mɛ̃ wõw a, ɩ̃ bɛ wone ɩ, ɩ̃ ɩ na mɛ̃ wõw-gbil a, ɩ̃ bɛ háarɛ nʋɔr ɛ.

¹⁵Ɩ̃ ɩ na mɛ̃ nɩr na bɛ wone a, ɩ̃ bɛ sɔwr bom za ɩ.

¹⁶Sore e, fʋ̃ʋ n'ʋ ɩ̃ tɩɛrɛ, Sore ɩ̃ Naaŋmɩn i, fʋ̃ʋ n'ʋ na sɔw.

¹⁷Bʋ̃ʋ n'ʋ vɛ̃, ɩ̃ zɛlɩ fʋ nɩ à ŋá: ta sàw k'ɩ̃ ɩ a bɛ nɩ-ɩ-laara ɩ, kɛ̀ bɛ mɩ́ pɔrɛ a ɩ̃ zu, a lɛn daar ɩ̃ na mɩ́ cen dẽderi a ɩ.

¹⁸Mãa n'ɩ ŋan cɛ blã na kaw lo, ɛ́ a 'wɔbrʋ 'wɔbr mɛ̃ kʋralɛ.

¹⁹Sɩza, ɩ̃ wore nɩ a ɩ̃ sãwna, ɛ́ a ɩ̃ yel-bier ƴãwnɛ mɛ̃ pʋl-vʋ̃ɔ.

²⁰A ɩ̃ dɔ̃ dem vʋʋrɛ nɩ vla ɛ́ kpɛmɛ, bɛ yãwmɛ na na hɩ̃ɛn mɛ̃ zawla a.

²¹Bɛ mɩ́ maalɩ mɛ̃ nɩ faa yáa a vla san, bɛ tɛr'ɩ mɛ̃ nɩ dɔ̃, ɩ̃ na bɔbr a vla a ƴãw.

²²Sore e, ta zawrɩ mɛ̃ bɛr ɛ! Ɩ̃ Naaŋmɩn i, ta taw zãá nɩ mɛ̃ ɩ.

²³Sore, ɩ̃ faarɛ ɛ, wa fɔ̃w wa sõw mɛ̃!