Read Dagara, Northern Sɛb-sõw yielu 42 Bible Online

Sɛb-sõw yielu 42 - Dagara, Northern bible

Sɛb-sõw yielu 42

¹Yiel-yielbɛ nɩ-kpɛ̃ɛ sɛbɛ pʋɔ yielu kãw n'ʋ. Koore [12] bibiir yielu na wule yã a.

²Mɛ̃ a lɛ wala na mɩ́ kone bɔbr'ɩ bàrʋ kʋ̃ɔ a, lɛ n'a ɩ̃ mɩ́ kone bɔbr'ɩ fʋ, Naaŋmɩn i.

³A Naaŋmɩn kʋ̃ɔ-nyúur nyɔw mɛ̃ na, a Naaŋmɩn na vʋʋrɛ a kʋ̃ɔ-nyúur. Debor'a ɩ̃ na ta a ʋ yir, àr a ʋ niŋé?

⁴A ɩ̃ mʋta-kʋ̃ɔ n'ɩ a ɩ̃ dɩb, mʋ̃tɔ̃w nɩ tɩ̃ɩsɔw, mãa zie bɛ na mɩ́ yere kʋralɛ: «A fʋ Naaŋmɩn wa?»

⁵Ɩ̃ lɛb'a tɩɛrɛ ɛ́ ƴãw cɩrɛ mɛ̃, a lɛn daar ɩ̃ na mɩ́ tɩ pʋɔ a nidaa dem pʋɔ, cere a Naaŋmɩn yir a, lãwnɩ zu-sɛbla na maalɛ cuw a, ɛ́ cáarɛ nɩ nʋ̃ɔ̀ puore a Naaŋmɩn barka a.

⁶Bʋ̃ʋ n'ʋ so kpɩɛrʋ nyɔw fʋ, ɩ̃ sɩ́ɛ ɛ, ɛ́ fʋ kone ƴãwn mɛ̃? Ƴãw a fʋ tɩɛrʋ a Naaŋmɩn ƴãw! Bʋ̃ʋ n'ʋ vɛ̃, ɩ̃ na lɛb'a puor'ʋ barka, ʋl na ɩ a ɩ̃ Faarɛ nɩ a ɩ̃ Naaŋmɩn a!

⁷Naaŋmɩn i, kpɩɛrʋ nyɔw nɩ a ɩ̃ sɩ́ɛ a ɩ̃ ƴãw, alɛ so ɩ̃ lɛb tɩɛrɛ a fʋ yele, ɩ̃ be a Zurdɛ̃ bul-nɛ́ɛ ƴãw a Tã-ble pɛr, a Hɛrmɔ̃ tan pʋɔ, ɛ́ tɩɛrɛ a fʋ yele.

⁸Fʋ ɩ na a kʋ̃ɔ cuure, ɩrɛ gɔmɛ, a kʋ̃ɔ mie bʋɔlɛ taa, fʋ ɩ na a za darɛ taa waar a ɩ̃ zu, a paal'a pàw mɛ̃ ɩ̃ za.

⁹A Sore, ʋ sàw tu n mɛ̃ a ʋ nɔ̃wfʋ a bibi-ɓil za, ɛ́ a tɩ̃ɩsɔw a, ɩ̃ na yiele na danɛ nɩ ʋ, ɩ̃ na puore nɩ a Naaŋmɩn na n'ʋ so ɩ̃ vʋʋrɛ a.

¹⁰Ɩ̃ na yel'ɩ a Naaŋmɩn na ɩ a ɩ̃ pìir a: «Bʋ̃ʋ n'ʋ so fʋ yiiri mɛ̃ bɛr, bʋ̃ʋ n'ʋ so ɩ̃ na ɩ pʋ-sãwna sob cere, ɛ́ a ɩ̃ dɔ̃ sob bɛ bɛrɛ mɛ̃?»

¹¹Bɛ mɩ́ karɛ mɛ̃ nɩ a kɔbɛ, a lɛn daar a bɛlɩ dem na ɩrɛ a kpɩɛr mɛ̃ a, na mɩ́ yere a ɩ̃ zie kʋralɛ a: «A fʋ Naaŋmɩn wa?»

¹²Bʋ̃ʋ n'ʋ so kpɩɛrʋ nyɔw fʋ, ɩ̃ sɩ́ɛ ɛ, ɛ̀ fʋ kone ƴãwn mɛ̃? Ƴãw a fʋ tɩɛrʋ a Naaŋmɩn ƴãw! Bʋ̃ʋ n'ʋ vɛ̃, ɩ̃ na lɛb'a puor'ʋ barka, ʋl na ɩ a ɩ̃ Faarɛ nɩ a ɩ̃ Naaŋmɩn a.