Read Dagara, Northern Sɛb-sõw yielu 51 Bible Online

Sɛb-sõw yielu 51 - Dagara, Northern bible

Sɛb-sõw yielu 51

¹Yiel-yielbɛ nɩ-kpɛ̃ɛ sɛbɛ pʋɔ yielu. Sɛb-sõw yielu Daviir na maalɩ a.

²A Daviir na tɩ gã nɩ a Bɛtɩsabe baarɩ, ɛ́ a naaŋmɩn-ƴɛ̀r-manɛ Natan cen tɩ páw ʋ a lɛn daar a n'a.

³Naaŋmɩn i, zɔ ɩ̃ nɩbaalʋ! A fʋ nɔ̃wfʋ zũú a, de a ɩ̃ nʋɔr-zawrʋ ɩ-ɩrɩ bɛr a baarɩ, fʋ̃ʋ a su-ɓaarʋ na ɩ kpɛ̃ɛ a.

⁴Pɛ́w a ɩ̃ sãwna dɛwr za bɛr, so a ɩ̃ yel-bier dɛwr bɛr mɛ̃.

⁵Ɩ̃ bɛ sàw a fʋ nʋɔr ɛ, ɩ̃ bãwnɩ a na, a ɩ̃ yel-bier'ɩ ŋan a ɩ̃ niŋé kʋralɛ.

⁶Fʋ̃ʋ yõ, fʋ̃ʋ yõ tẽtẽ n'ʋ ɩ̃ sãw, ʋlɩ bom nɛ na bɛ vɩɛl a fʋ zie a, ʋlɛ n'ʋ ɩ̃ maalɩ. Lɛ so, fʋ̃ʋ wa ƴɛ̀rɛ a, fʋ mɩ́ tɛr'ɩ yel-mɩŋa, fʋ bɛ tɛrɛ sãwna bɛ yere a fʋ ƴɛ̀rʋ-dɩb pʋɔ ɩ.

⁷Nyɛ̃, sãwna pʋɔ n'a bɛ dɔw mɛ̃, yel-bier pʋɔ n'a a ɩ̃ mã ŋmãa a ɩ̃ sɩɛ.

⁸Ɛcɛ fʋ nɔnɛ nɩ a yel-mɩŋa a nɩsaal socir pʋɔ, zanɩ nɩ mɛ̃ a yã-bãwfʋ a ɩ̃ pʋ-tɩɛr-sɔwla pʋɔ.

⁹Ɩ a ɩ̃ yel-bier ʋ bɔr, ɩ̃ɩ na vɩɛl'a. so m a kʋ̃ɔ, ɩ̃ɩ na pɛlɩ nɩ furutu!

¹⁰Yel kʋ̀ m k'ɩ̃ɩ na nyɛ̃ nɩ nʋ̃ɔ̀ nɩ cɩlʋ, ɩ̃ɩ na cɩlɛ na, mãa fʋ na kʋ kpaa bɛr a.

¹¹Lɩɛbɩ zikur cɔw a ɩ̃ yel-bebe, de a ɩ̃ sãwna za bɛr a baarɩ.

¹²Naaŋmɩn i, ír socir parpar ƴãw mɛ̃, ɛ́ kʋ̀ m tɩɛr-paala na kpɛmɛ a.

¹³Ta diw mɛ̃ bɛr a fʋ niŋé ɩ, ta lɛb de a fʋ Vʋʋrʋ Sõw a ɩ̃ zie ɩ.

¹⁴Lɛb kʋ̀ m a fʋ faafʋ nʋ̃ɔ̀, tɩɛ mɛ̃ nɩ a fʋ Vʋʋrʋ na tɩrɛ bɛ zʋmnɛ nɩ a.

¹⁵Ɩ̃ na wul'ɩ a sãwna dem a fʋ sɛ́ɛ, ɛ́ a yel-bebe dem na lɛb'a wa a fʋ zie.

¹⁶Naaŋmɩn i, Naaŋmɩn ɩ̃ faarɛ ɛ, faa mɛ̃ a kũu pʋɔ, ɩ̃ɩ na manɛ nɩ a lɛ fʋ na faa mɛ̃ a.

¹⁷Sore e, yuo a ɩ̃ nʋɔr, ɩ̃ tʋ̃ɔ́ danɛ fʋ.

¹⁸Fʋ bɛ bɔbr k'ɩ̃ɩ maalɩ bàwr kʋ̀ b ɛ, nyɩw-a-za-bàwr tɔr za kʋ̃ tʋ̃ɔ́ pɛlɩ a fʋ pʋɔ ɩ.

¹⁹A bàwr a Naaŋmɩn ƴãw a, ʋlɛ n'ɩ tɩɛrʋ a sãwna kpɩɛrʋ na dĩ a, Naaŋmɩn i, fʋ bɛ jewre nɩr na kone a ʋ sãwna, ɛ́ siwre ʋ tʋɔra a ɩ.

²⁰Maalɩ a Sɩyɔ̃, a fʋ pʋ-pɩɛlʋ zũú, lɛb mɛ a dacine na mɩ́ piw a Zerizalɛm tɛr a.

²¹Lɛ n'a fʋ na nɔnɛ a bagɛ na tu sɔ́r a, nyɩw-a-za-bagɛ nɩ de-kʋ̀b bome bɛ na mɩ́ nyɩw a za bɛr a. Lɛ mɩ̀ n'a bɛ na mɩ́ kʋ nadɛɛ kʋ̀ b a fʋ bàwr-maal-kuur zu.