Read Dagara, Northern Sɛb-sõw yielu 53 Bible Online

Sɛb-sõw yielu 53 - Dagara, Northern bible

Sɛb-sõw yielu 53

¹A yiel-yielbɛ nɩ-kpɛ̃ɛ sɛbɛ pʋɔ yielu kãw n'ʋ. Ʋ yiele na mɛ̃ nɩbaal-yielu a. Daviir yielu na wule yã a.

²A dãbole mɩ́ tɩɛrɛ nɩ bɛ pʋɔ yere: «Naaŋmɩn bɛ ka ɩ!» Bɛ sãw nɩ bɛ za, a bɛ ɩ-ɩrɩ bɛ maal'ɩ wob ɛ, been kãw za bɛ ɩrɛ vla ɩ.

³A Naaŋmɩn be n a salom zu, ɛ́ vuoli k'ʋʋ jɩ́r a nɩsaalbɛ kaa, k'ʋʋ nyɛ̃, yã-bãwnɛ wa be be bɔbr ʋ a.

⁴Bɛ za bɛr'ɩ a sɔ́r, bɛ za lãw na fà. Kãw za bɛ ɩrɛ vla ɩ, ʋ bɛ ka be ɩ been mɩ̀ ɛ.

⁵A Naaŋmɩn yere na: «Bɛ sɩrɩ bɛ bãw bom za ɩ, a yel-fa-maalbɛ bɛ ŋa za na nɛbr a ɩ̃ nɩbɛ dɩrɛ nɩ a bɛ bʋ̃-dɩrɩ, ɛ́ bɛ lɩɛbɛ kaar mɛ̃ towtow a!»

⁶Bɛlɛ n'ɩ bɛ ŋan dɛ̃bɩ̃ɛ nyɔw, bɛ màwr, ɛ́ dɛ̃bɩ̃ɛ yel bɛ ka be ɩ. Bʋ̃ʋ n'ʋ vɛ̃, a bɛlɩ dem na wa ŋmãa jil fʋ a zɛbr ƴãw a, Naaŋmɩn yaar'ɩ a bɛ kɔbɛ pàw a ziir. Fʋ ƴãw bɛ nɩ vĩ, Naaŋmɩn na zawrɩ bɛ bɛr a ƴãw.

⁷Ãa n'ʋ na be a Sɩyɔ̃, ɛ́ kʋ̀ a Ɩsɩrayɛl a faafʋ? A Naaŋmɩn wa lɛb maalɩ a ʋ nɩbɛ yele ƴãw a, a Zakɔb bʋʋrɛ na cɩlɛ na, nʋ̃ɔ̀ na ɩrɛ nɩ a Ɩsɩrayɛl.