Read Dagara, Northern Sɛb-sõw yielu 55 Bible Online

Sɛb-sõw yielu 55 - Dagara, Northern bible

Sɛb-sõw yielu 55

¹Yiel-yielbɛ nɩ-kpɛ̃ɛ sɛbɛ pʋɔ yielu kãw. Bʋ̃-ŋmɩɛrɩ bɛ na maal'ɩ fomie a n'a, bɛ mɩ́ ŋmɩɛr'ɩ ƴãwn. Daviir yielu kãw na wule yã a.

²Naaŋmɩn i, ƴãw tobr a ɩ̃ puoru ƴãw, ɩ̃ na mɩ́ wa zɛlɛ fʋ yãayãa a, ta mɩ́ sɔwlɩ ɛ.

³Cɛlɛ be ɛ́ sɔw mɛ̃. Ɩ̃ bʋnɩ na cere, pʋ-sãwna tɛr mɛ̃ ɛ́ a tɩɛrʋ damnɛ mɛ̃,

⁴a dɔ̃ sob kɔkɔr ɩ̃ na wone a ƴãw, nɩ a fɛrʋ a nɩ-faar na fɛrɛ mɛ̃ a ƴãw. Bɛ de nɩ a faa dɔwlɩ a ɩ̃ zu, nyɛ̃, suur bɛ bɛrɛ mɛ̃ ɩ.

⁵A ɩ̃ pʋ̀lá vʋ̃ɔ na, ɛ́ a kũu dɛ̃bɩ̃ɛ ɩrɛ mɛ̃.

⁶Dɛ̃bɩ̃ɛ nɩ mawfʋ nyɔw mɛ̃ na, ɛ́ ƴãw za mĩine mɛ̃.

⁷Lɛ n'a ɩ̃ tɩ yel: «Aa! mãa tɩ tɛr pɩgɛ mɛ̃ naŋmam a, ɩ̃ nãá ƴaw na tɩ nyɛ̃ sɔwlʋ zie.

⁸Ɩ̃ nãá zɔ na zãá, tɩ kpɩɛr a wɛja pʋɔ. Tɛw-àrʋ

⁹Ɩ̃ nãá bɔ n sɔwlʋ zie fɔ̃wlɛ, a saa-sɛsɛb na fure a ƴãw.»

¹⁰Sore e, sãw a ɩ̃ dɔ̃ dem pʋ-tɩɛrʋ bɛr, bʋ́r a bɛ ƴɛ̀rʋ. Bʋ̃ʋ n'ʋ vɛ̃, po-to-fãw-ɩb nɩ taw-taa n'a ɩ̃ nyɛ̃ a tẽw pʋɔ.

¹¹A mɩ́ lʋɔrɛ nɩ a dacin na viiri koli ʋ a, mʋ̃tɔ̃w nɩ tɩ̃ɩsɔw. A tẽw pʋɔ a, faalʋ nɩ kpɩɛrʋ n'a,

¹²ɩ-faar tɛwr'a be a ʋ pʋɔ. A dɔwr-taa nɩ a nɛb-taa bɛ yire zaarɛ a ʋ nɩbɛ tuor-taa ziir ɛ.

¹³Dɔ̃ sob kãw tɩ n'ʋ tʋʋr mɛ̃ a, ɩ̃ nãá sàw na. Nɩr na hɩ̃ɛn mɛ̃ a tɩ n'ʋ ìr a ɩ̃ ƴãw a, ɩ̃ nãá sɔwl'a ʋ ta nyɛ̃ m ɛ.

¹⁴Ɛcɛ fʋ̃ʋ n'ʋ, nɩr'ɩ mãa na ɩ been a, a ɩ̃ tu-ta-tɔ, a ɩ̃ bá-pɛr.

¹⁵Mãa nɩ fʋ̃ʋ nɛbɛ mɩ́ tɩ waalɛ, ɛ́ mɩ́ tɩ lãw cere a Naaŋmɩn yir pʋɔ.

¹⁶A ɩ̃ dɔ̃ dem, bɛ ùr kpi! Bɛ cãà vʋʋrɛ ɛ́ siw a kpɩmɛ tẽw, a po-tuolu na be a bɛ zie nɩ a bɛ yie pʋɔ a ƴãw.

¹⁷Mãa a, a Naaŋmɩn n'ʋ ɩ̃ kone bʋɔlɛ, ɛ́ a Sore na faa mɛ̃ na.

¹⁸A biɓaara, a mʋ̃tɔ̃-tuo nɩ a zaanʋɔra, ɩ̃ mɩ́ kone nɩ a 'woi! 'woi! Ɛcɛ ʋ wõ n a ɩ̃ bʋɔlʋ.

¹⁹Ʋ faa mɛ̃ na, kʋ̀ m a ƴã-ɓaarʋ, a lɛn daar a nɩbɛ na tɩ zɛbr'ɩ mɛ̃ a, bɛ bɛ tɩ dɩ vuo ɩ, a nɩbɛ na tɩ àr a ɩ̃ ƴãw a.

²⁰A Naaŋmɩn na wõ a na, ɛ́ siwri bɛ, ʋl na dɩrɛ naalʋ dɩta-pɛ-yome za a. Tɛw-àrʋ Lɩɛbʋ bɛ be a bɛ zie ɩ, bɛ bɛ zɔrɛ a Naaŋmɩn ɛ.

²¹A mɩlmɩlɛ ír'ɩ nũu tɔ n a ʋ bárɩ, ʋ sãw nɩ a bɛ wõ-taa bɛr.

²²A ʋ nʋɔr ƴɛ̀rɛ nɩ nɔ-kãá, ɛ́ zɛbr tɩɛrʋ be a ʋ socir pʋɔ. A ʋ ƴɛ̀r-bie mɩ́ nʋmɛ na gãw sɩwr, ɛcɛ sɔ̀rʋ bɛ na vɔ̃ a n'a.

²³Lɩɛbɩ a fʋ niw-sʋba ƴãw a Sore, ʋ na tɩɛ fʋ na tɛr, ʋ bɛ sàwr a nɩ-mɩŋa dẽdere towtow ɛ.

²⁴Ɛ́ fʋ̃ʋ, Naaŋmɩn i, fʋ na ɩ na bɛ siw a yàa-bɔw pʋɔ. Bɛ kʋ̃ vʋʋrɩ a bɛ nyɔ-vʋʋrʋ bibie põ-zɛ̃-taa ɩ, bɛl na bãw a nɩ-kʋ nɩ a nyãnyuwlu a. Mãa a, fʋ̃ʋ zie n'a ɩ̃ ƴãw a ɩ̃ tɩɛrʋ.