Read Dagara, Northern Sɛb-sõw yielu 59 Bible Online

Sɛb-sõw yielu 59 - Dagara, Northern bible

Sɛb-sõw yielu 59

¹Yiel-yielbɛ nɩ-kpɛ̃ɛ sɛbɛ pʋɔ yielu. «Ta sãw bɛr» yielu kɔkɔr'ʋ. Daviir danʋ yielu. A lɛ a Sawul na tɩ tõ bɛ tɩ gù a Daviir yir k'ʋʋ tʋ̃ɔ́ nyɔw ʋ kʋ a, yele n'a.

²Ɩ̃ Naaŋmɩn i, faa mɛ̃ a ɩ̃ dɔ̃ dem nuru pʋɔ, gùre mɛ̃ a nɩbɛ na ìr a ɩ̃ ƴãw a ƴãw.

³Faa mɛ̃ a yel-fa-maalbɛ nuru pʋɔ, faa mɛ̃, a nɩ-kʋrbɛ bɛ ŋa ƴãw.

⁴Bɛlɛ sɩrɩ n'ɩ bɛ ŋan sɔwlɩ gù m, nɩbɛ na kpɛmɛ a, ŋmãa nɩ mɛ̃ nɩ zɛbr, ɩ̃ɩ bɛ sãw ɛ, bɛ maalɩ yel-bier ɛ, Sore e!

⁵Ɩ̃ bɛ sãw ɛ, ɛ́ bɛ zɔrɛ waar, bɛ cɔbrɛ. Ìr tuori mɛ̃, ɛ́ jɩ́r nyɛ̃!

⁶Fʋ̃ʋ Sore e, Naaŋmɩn kpɛnʋ-za-sob, Ɩsɩrayɛl Naaŋmɩn i, ìr a nɩ-bʋʋr-yoru za ƴãw, taa zɔrɛ a nɩ-mɩlbɛ bɛ ŋa za nɩbaalʋ ɛ. Tɛw-àrʋ

⁷Bɛ mɩ́ lɛb'a wa a zaanʋɔra, wowre mɛ̃ baar a, bɛ mɩ́ só nɩ a tẽw zɔrɛ cɔlɛ.

⁸Po-to-ƴɛ̀rʋ tɛwr'a bɛ mɩ́ tɛr, cɔ̀rɛ karɛ ƴãwn a nɩbɛ, ɛ́ mɩ́ tɩɛrɛ bɛ pʋɔ: «Ãa n'ʋ wone a?»

⁹Ɛcɛ fʋ̃ʋ a, Sore e, fʋ laar bɛ na, fʋ ɩrɛ nɩ a nɩ-bʋʋr-yoru bɛ ŋa za laar.

¹⁰Fʋ̃ʋ n'ʋ ɩ̃ jɩ́rɛ, fʋ̃ʋ na ɩ a ɩ̃ fãw a. Naaŋmɩn i, fʋ̃ʋ n'ɩ a ɩ̃ zɛbr-yir-kpɛ̃w.

¹¹A ɩ̃ Naaŋmɩn na ɩ nɩ-vla vla a, tuore mɛ̃ na, ʋ na ɩ na ɩ̃ nyɛ̃ a bɛlɩ dem na jɩɛrɛ mɛ̃ a.

¹²Taa kʋrɛ bɛ ɩ, a ɩ̃ nɩbɛ taa wa mab yiire ɩ, dam bɛ nɩ fãw, ɩ kɛ̀ bɛ lo, fʋ̃ʋ Sore tɩ zɛbr-kur-pãgala a.

¹³Bɛlɛ wa yel k'aa ƴɛ̀rʋ n'a bɛ ƴɛ̀rɛ za a, yel-bier'ʋ be a bɛ nʋɔrɩ́. A bɛ pɔ̀l-ɩb, ʋ́ lɛb ŋmɛlɩ nyɔw bɛ, ŋmɛ-ƴãw nɩ ziri tɛwr na n'a bɛ tɛr a!

¹⁴Nyɛ̃ suur baarɩ bɛ, baarɩ bɛ, bɛ ta cãà be ɩ! Lɛ n'a a nɩbɛ na bãw tɩ tɔ a tẽw baarʋ ziir, kɛ́ Naaŋmɩn be n be dɩrɛ naalʋ a Ɩsɩrayɛl zu. Tɛw-àrʋ

¹⁵Bɛ mɩ́ lɛb'a wa a zaanʋɔra, wowre mɛ̃ baar a, bɛ mɩ́ so nɩ a tẽw zɔrɛ cɔlɛ.

¹⁶Bɛ mɩ́ viire na gʋɔr bɔbr bʋ̃-dɩrɩ, ɛ́ bɛlɛ bɛ wa tɩw a, bɛ̃ɛ 'hʋ̃ʋ́nɛ.

¹⁷Mãa a, ɩ̃ na yiele na danɛ nɩ a fʋ kpɛnʋ, ɩ̃ na cáarɛ nɩ a biɓaara a fʋ nɔ̃wfʋ ƴãw, fʋ na ɩ zɛbr-yir-kpɛ̃w a ɩ̃ zie a ƴãw, nɩ sɔwlʋ zie a kpɩɛrʋ bibir a.

¹⁸Fʋ̃ʋ na ɩ a ɩ̃ fãw a, ɩ̃ na yiele na danɛ nɩ fʋ, bʋ̃ʋ n'ʋ vɛ̃, fʋ̃ʋ n'ɩ a ɩ̃ zɛbr-yir-kpɛ̃w, Naaŋmɩn i, a ɩ̃ Naaŋmɩn na ɩ nɩ-vla vla a.