Read Dagara, Northern Sɛb-sõw yielu 69 Bible Online

Sɛb-sõw yielu 69 - Dagara, Northern bible

Sɛb-sõw yielu 69

¹Yiel-yielbɛ nɩ-kpɛ̃ɛ sɛbɛ pʋɔ yielu nɩ yielu Daviir na maalɩ a. Korijom'a bɛ mɩ́ ŋmɩɛr ƴãwn.

²Naaŋmɩn i, faa mɛ̃! A kʋ̃ɔ ƴãwnɛ mɛ̃ nɩ kɔkɛɛ.

³Mɛ̃mɛrɛ bɔw-zulu pʋɔ n'a ɩ̃ siwr, ɛ́ a gbɛ́ɛ bɛ be na tɔ zi-kpɛ̃w ɛ. Ɩ̃ tɔlɛ na siwr a kʋ̃ɔ-zulu pʋɔ, ɛ́ a kʋ̃ɔ-miwr ɓáw mɛ̃ cere nɩ.

⁴Ɩ̃ ŋmɛ n a cɛlsɩ tɩ bàl, a kɔkɔr ko n ʋ za. Ɩ̃ piwr'ɩ a ɩ̃ Naaŋmɩn waa tɩ bàl.

⁵A bɛlɩ dem na hɩ̃ɛn mɛ̃ zawla a, bɛ yãwmɛ na zuo a ɩ̃ zukɔbɛ. A nɩbɛ bɛl na kʋrɛ mɛ̃ a, bɛ tɛr'ɩ fãw, a bɛl ɩ̃ na bɛ sãw, ɛ́ bɛ tɛr'ɩ mɛ̃ dɔ̃ a. A bom ɩ̃ na bɛ zu a, ɩ̃ na tʋ̃ɔ́ na lɛb tɩr ʋ bɩɩ?

⁶Naaŋmɩn i, fʋ bãw nɩ a ɩ̃ dãbolu, ɛ́ a ɩ̃ sãwna bɛ sɔwlɩ a fʋ zie ɩ.

⁷Sore, Naaŋmɩn-kpɛnʋ-za-sob i, a bɛlɩ dem na ƴãw a bɛ tɩɛrʋ a fʋ ƴãw a, ɩ̃ bɛ bɔbr kɛ́ bɛ nyɛ̃ vĩ a mãa ƴãw ɛ. Ɩsɩrayɛl Naaŋmɩn i, ta sàw a nɩbɛ na bɔbr fʋ a nyɛ̃ zʋmɛ a mãa ƴãw ɛ.

⁸Fʋ̃ʋ ƴãw n'a a zʋmɛ dúor mɛ̃, ɛ́ a vĩ bɛ sàw ɩ̃ na dʋɔ zu ɛ.

⁹Ɩ̃ lɩɛb'ɩ zawlɛ a ɩ̃ yɛbr zie, nɩr a ɩ̃ yɛbr tɩ na lãw sãà nɩ mã a na bɛ bãw a.

¹⁰Yel-mɩŋa, a fʋ yir nɔ̃wfʋ dɩrɛ mɛ̃ na mɛ̃ vũu a. A fʋ zʋm-tʋʋrbɛ zʋmɛ lɛbr'a lore a ɩ̃ zu.

¹¹Ɩ̃ tɛr'ɩ mʋta-tuo kone nɩ, a wa n zʋmɛ a ɩ̃ zie.

¹²Ɩ̃ su n kuor bʋ̃-dɛgɛ, bɛ ƴãw nɩ mɛ̃ jil.

¹³Mãa ƴɛ̀rʋ n'a bɛ mɩ́ nyɔw a nɩ-yaga tuor-taa zie, mãa n'ʋ a dã-nyúurbɛ tɛr yiele.

¹⁴Ɛcɛ mãa puore fʋ na. Sore e, a ɩ̃ bɛr-wob daar'a ta. Naaŋmɩn i, a fʋ nɔ̃wfʋ bɛ dɩ vuo ɩ, sɔw mɛ̃! Fʋ̃ʋ sɩrɩ n'ɩ a ɩ̃ faarɛ.

¹⁵Vɩr mɛ̃ ír a mɛ̃mɛrɛ pʋɔ, ta bɛr ɩ̃ kpa gbɛ́ɛ ɩ! Faa mɛ̃ a ɩ̃ bɛ-nɔnbɛ nuru pʋɔ, faa mɛ̃ a kʋ̃ɔ-zulu pʋɔ!

¹⁶Ta bɛr a kʋ̃ɔ-miwr ɓáw mɛ̃ cen nɩ ɛ, a bɔw-kpol vɔl mɛ̃ ɩ! Ta sàw bɛ fɔb a yàa-bɔw nʋɔr pàw mɛ̃ ɩ.

¹⁷Sore e, sɔw mɛ̃, a fʋ nɔ̃wfʋ na ɩ vɩɛlʋ a ƴãw. Lɩɛbɩ kaa mɛ̃, a fʋ su-ɓaarʋ na bɛrmɛ a ƴãw.

¹⁸Ta lɩɛbɩ zikur cɔw a mãa fʋ tõ-tõ-bie ɩ. Ɩ̃ be n kpɩɛrʋ pʋɔ, sɔw mɛ̃ fɔ̃w.

¹⁹Taw pɩɛlɩ mɛ̃, kaa a ɩ̃ zie, faa mɛ̃, a ɩ̃ dɔ̃ dem ƴãw.

²⁰Fʋ bãwnɩ a na bɛ na tʋʋr mɛ̃ a, fʋ bãw nɩ a ɩ̃ vĩ, a ɩ̃ yúor na sãw a. A ɩ̃ dɔ̃ dem za n'ɩ bɛ ŋan a fʋ niŋé.

²¹A zʋmɛ ɩ m'ɩ kpɩɛrʋ, a ɩ m'ɩ bàalʋ. Ɩ̃ gù n nɩbaal-zɔba ɩb kãw, ɛ́ bɛ nyɛ̃ bom ɛ, gù mɔwl-mɔwlbɛ, ɛ́ bɛ nyɛ̃ nɩr ɛ.

²²Bɛ ƴãw nɩ tɩ̃ɩ a ɩ̃ bʋ̃-dɩrɩ pʋɔ, ɛ́ kʋ̃ɔ-nyúur wa kpɩɛr mɛ̃ a, bɛ̃ɛ kʋ̀ m dã-miiru.

²³A bɛ cuw dɩb, a lɩɛbɩ bɛra, bɛlɛ nɩ a bɛ bárɩ zie.

²⁴A bɛ mimie, a zɔ̃wnɛ ta tɩ cãà nyɛrɛ ɩ. Ɩ kɛ̀ bɛ gʋ̀r zɩgɛ kʋralɛ.

²⁵Nyɛ̃ nɩ bɛ suur yaga za, ʋ dɩrɛ bɛ mɛ̃ vũu a.

²⁶A bɛ laɩ, ʋ lɩɛbɩ kár, nɩr za ta cãà kpɩɛr a bɛ pɛnɛ-sɛwr pʋɔ ɩ.

²⁷Bʋ̃ʋ n'ʋ vɛ̃, bɛ bɛ bɛrɛ a sob nɛ fʋ na ŋmɛ baarɩ a ɩ, ɛ́ a bɛlɩ dem fʋ na ŋmɛ ƴãw natɩɛ baarɩ a, bɛ ɩ na bɛ lɛb bãw nyɛrɛ wʋ̀ʋr dɔwlɛ.

²⁸Dier a bɛ sãwna za ɓanɛ taa, ɛ̀ bɛ taa wa sãanɛ nɩ-mɩn a fʋ niŋé ɩ.

²⁹Sãw a bɛ yée bɛr a nɩ-vʋʋrɩ sɛbɛ[18] pʋɔ, taa sɔrɛ bɛ ƴãwn a nɩ-mɩn pʋɔ ɩ.

³⁰Mãa a, bãbàal nɛ m ɛ́ wone tuo, Naaŋmɩn i, a fʋ faafʋ, ʋ ɩ ɩ̃ lɛb ìr àr!

³¹Ɩ̃ na yiele na íre nɩ a fʋ yúor, ɩ̃ na danɛ fʋ na, fʋ na ɩ kpɛ̃ɛ a.

³²Sore e, à ŋá n'a nʋmɛ a fʋ zie zuo nadɛr na tɛr ɩ́lɛ́ nɩ nafɩlɛ a.

³³A su-siwri dem nyɛ̃ a na ɛ́ cɩlɛ. «Nyɩɩm na bɔbr a Naaŋmɩn a, nyɩmɛ so nyɔ-vʋʋr-wogo!

³⁴Bʋ̃ʋ n'ʋ vɛ̃, a Sore bɛrɛ na wone a nan dem, ʋ bɛ zawrɛ a ʋ nɩbɛ na be a gaso pʋɔ a bɛrɛ ɩ.

³⁵Ɛ́ nyɩɩm, salom nɩ tẽw, nyɩ danɛ ʋ, lãwnɩ a kʋ̃ɔ-bɛrɛ nɩ bom za na damnɛ a pʋɔ a!

³⁶Bʋ̃ʋ n'ʋ vɛ̃, Naaŋmɩn na faa nɩ a Sɩyɔ̃, ʋ na lɛb'a mɛ a Zuda tẽw tẽ-bɛrɛ, a ʋ nɩbɛ na lɛb'a só a kpɩɛr.

³⁷A na ɩ n a ʋ tõ-tõ-biir bibiir gbã-dɩ-bom, ɛ́ a bɛlɩ dem na nɔnɛ a Sore a na tɛr'ɩ a bɛ kpɛb zie a be.»