Read Dagara, Northern Sɛb-sõw yielu 7 Bible Online

Sɛb-sõw yielu 7 - Dagara, Northern bible

Sɛb-sõw yielu 7

¹Daviir nɩbaal-yielu n'ʋ. A Sore n'ʋ ʋ tɩ yieli kʋ̀, càar'ɩ Kusɩ na ɩ Bɛ̃zamɛ dɔwlʋ nɩr kãw a.

²Sore ɩ̃ Naaŋmɩn i, fʋ̃ʋ n'ɩ a ɩ̃ taw-lanʋ zie! Faa mɛ̃, ír mɛ̃ bɛr a nɩbɛ bɛl za na dɔwrɛ mɛ̃ a nuru pʋɔ.

³Alɛ bɛ ɩ lɛ, bɛ na taw mɛ̃ na cɩɛrɩ mɛ̃ gben a, ɛ́ nɩr za kʋ̃ faa mɛ̃ ɩ, kʋ̃ taw faa mɛ̃ a bɛ zie ɩ.

⁴Sore ɩ̃ Naaŋmɩn i, mãa wa ɩ a lɛ bɛ na yere a, a ɩ̃ nuru wa tõ tõ-faa a,

⁵mãa wa maalɩ faa a ɩ̃ kpɛ-ta-sob zie, bɛr a ɩ̃ dɔ̃ sob ʋ zɔ a,

⁶ɩ̃ dɔ̃ sob kãw, ʋ diw mɛ̃ nyɔw, ʋ nɛb'ɩ mɛ̃ gbɛ́ɛ a tẽsɔw, ɩ̃ na cãà vʋʋrɛ a, ʋ ɓiil'ɩ mɛ̃ tanɛ! Tɛw-àrʋ.

⁷Sore e, ìr nyɛ̃ suur fʋ za, piw a ɩ̃ dɔ̃ dem su-yãya-ɩb. Ìr àr a ɩ̃ lõbowrí, fʋ̃ʋ na mɩ́ yel a lɛ-na-tu-sɔr-a.

⁸A nɩ-bʋʋrɛ bʋʋrɛ, bɛ ɓã taa jil koli fʋ, ɛ́ fʋ̃ʋ a, zɩ̃ a fʋ naalʋ-dà-kɔw zu do gãw bɛ.

⁹Sore e, fʋ̃ʋ na dɩrɛ nɩ a nɩ-bʋʋrɛ ƴɛ̀rʋ a, dɩ n mɛ̃ a ƴɛ̀rʋ, Sore e, tu n a ɩ̃ mɩnʋ nɩ ɩ̃ na bɛ tɛr sãwna a.

¹⁰Ɩ a nɩ-faar po-tuolu a baarɩ ɛ́ fʋ ɩ a nɩ-mɩŋa ʋ kpɛmɛ, fʋ̃ʋ na mɩ́ jɛl a pʋ-tɩɛr-sɔwlɩ a, fʋ̃ʋ Naaŋmɩn na tuur yel-mɩnʋ a.

¹¹A Naaŋmɩn n'ɩ a ɩ̃ zɛbr-kur-pãgala na piw mɛ̃ a, a soci-dẽdẽ dem faarɛ.

¹²Naaŋmɩn ɩ n ƴɛ̀r-dɩrɛ na tuur yel-mɩnʋ a, ɛcɛ bibir za na vɩɛrɛ a, ʋ ɩ n Naaŋmɩn na bɛ tɛr dɩ̃ɛnʋ a.

¹³Bʋnʋ bɛ ka be ɩ, a dɔ̃ sob lɛb'a tine: ʋ saalɛ nɩ a ʋ zɛbr-sɔ-kpɛ̃ɛ, ʋ dúore nɩ a ʋ tam ɛ́ càrɛ a pime.

¹⁴Ʋ cɔbrɛ nɩ zɛbr bome na kʋrɛ a, a ʋl mɩŋa ƴãw, nɩ pime na mɩ́ ƴãw vũu a.

¹⁵Ʋlɛ n'ɩ ŋan ŋmãa a ʋ ɩ-faar sɩɛ, tɛr a yel-faa pʋɔ, ɛ́ dɔwr a ziri.

¹⁶Ʋ tuwr'ɩ bɔw-zulu, ɛ́ lore a bɔw ʋl mɩŋa na tuw a pʋɔ.

¹⁷A ɩ-faa ʋ na cɔbrɩ a lɛb'a waar a ʋ zu, a po-to-ɩb ʋ na tɩɛrɩ a lɛb'a lore a ʋ zu.

¹⁸Ɩ̃ na puore nɩ a Sore yãanɩ, a ʋ mɩnʋ zũú, ɩ̃ na yiele na íre nɩ a Naaŋmɩn-na-do-saa-bɛ-pɩɛl-a yúor.