Read Dagara, Northern Sɛb-sõw yielu 71 Bible Online

Sɛb-sõw yielu 71 - Dagara, Northern bible

Sɛb-sõw yielu 71

¹Sore e, a fʋ naayir'a ɩ̃ zɔrɛ kpɩɛr, ta sàw k'ɩ̃ wa nyɛrɛ vĩ towtow ɛ.

²Faa mɛ̃ ɛ́ gùre mɛ̃, a fʋ mɩnʋ zũú. Cɩɩl tobr cɔw mɛ̃ ɛ́ faa mɛ̃.

³Ɩ a pì-kpɛ̃w ɩ̃ na mɩ́ taw lanɩ a, zɛbr-yir-kpɛ̃w pʋɔ ɩ̃ na mɩ́ nyɛ̃ a faafʋ a. Fʋ̃ʋ sɩrɩ n'ɩ a ɩ̃ pìir, a ɩ̃ zɛbr-yir-kpɛ̃w.

⁴Ɩ̃ Naaŋmɩn i, faa mɛ̃ a nɩ-faa nuru pʋɔ, a nɩr na bɛ tɛr yel-mɩŋa a nɩ a po-to-sob nuru pʋɔ.

⁵Sore Naaŋmɩn i, fʋ̃ʋ n'ʋ ɩ̃ tɩɛrɛ, fʋ̃ʋ zie n'a ɩ̃ ƴãw a ɩ̃ tɩɛrʋ a ɩ̃ pɔ̀lʋ daarɩ́ za.

⁶Fʋ̃ʋ n'ʋ tɩɛ mɛ̃ a ɩ̃ dɔwfʋ daarɩ́ za, fʋ̃ʋ n'ʋ ɩ k'ɩ̃ yi a ɩ̃ mã púorí. Fʋ̃ʋ só a ɩ̃ danʋ kʋralɛ.

⁷A nɩ-yaga zie a, nɩ-bɩɛ tɩ nɛ m, ɛcɛ fʋ̃ʋ tɩ n'ɩ a ɩ̃ sɔwlʋ zie na bɛ tɛr dɛ̃bɩ̃ɛ a.

⁸A fʋ danʋ ƴɛ̀r-bie n'a paalɩ a ɩ̃ nʋɔr, ɩ̃ yiele nɩ a fʋ vɩɛlʋ bibie za.

⁹Ƴɛrɛŋa ɩ̃ na kor baar'a, taa lɔbr mɛ̃ bɛrɛ ɩ, taa zawrɛ mɛ̃ bɛrɛ a ɩ̃ fãw na báarɛ a ɩ.

¹⁰A ɩ̃ dɔ̃ dem ƴɛ̀rɛ nɩ a ɩ̃ ƴɛ̀rʋ, a nɩbɛ na piwre mɛ̃ a, bʋ̀rɛ nɩ taa.

¹¹Bɛ yere na: «Naaŋmɩn zawr'ʋ na bɛr, nyɩ diw nyɔw ʋ, nɩr bɛ ka be na faa ʋ ɛ.»

¹²Naaŋmɩn i, ta àr zãá nɩ mɛ̃ ɩ, ɩ̃ Naaŋmɩn i, wa fɔ̃w wa sõw mɛ̃.

¹³A bɛlɩ dem na jɩɛrɛ a ɩ̃ nyɔ-vʋʋrʋ a, bɛ́ lo, ɛ́ vĩ nyɔw bɛ. Zʋmɛ nɩ vĩ, a nyɔw a bɛlɩ dem na bɔbr k'aa nãá ɩ m faa a.

¹⁴Mãa ƴãw a, ɩ̃ na tɩɛrɛ fʋ nɩ kʋralɛ, ɛ́ ɩ̃ na danɩ fʋ na lɛb maal danɩ.

¹⁵Fʋ ɩ n Naaŋmɩn na tuur yel-mɩŋa ɛ́ faarɛ tɩ a, ɩ̃ manɛ nɩ à à ŋá bibie za, a fʋ yel-maalɩ na yãwmɛ bɛ tɛr sɔ́rʋ a ƴãw.

¹⁶Sore Naaŋmɩn i, a fʋ gãda-tome n'a ɩ̃ na manɛ, ɩ̃ lɛb'a yere kɛ́ fʋ̃ʋ yõ n'ʋ ɩ nɩ-mɩŋa.

¹⁷Naaŋmɩn i, a ɩ̃ pɔ̀lʋ daar za n'a fʋ wul mɛ̃, ɛ́ wa tɩ tɔ ka a, ɩ̃ manɛ nɩ a fʋ nɔ-ɓãa-yele.

¹⁸Dɩ̃a ɩ̃ na kor pɛlɩ zu a, Naaŋmɩn i, taa zawrɛ mɛ̃ bɛrɛ ɩ, lɛ n'a ɩ̃ na tʋ̃ɔ́ manɩ a fʋ fãw tome kʋ̀ a dɩ̃a pɔlbili nɩ a bibiir na na dɔw a.

¹⁹Naaŋmɩn i, a fʋ mɩnʋ do n saa, ɛ́ fʋ maalɩ yel-bɛrɛ bɛrɛ! Naaŋmɩn i, ãa n'ʋ ŋmɛ̃ mɛ̃ a fʋ̃ʋ a?

²⁰Fʋ ɩ na k'ɩ̃ nyɛ̃ kpɩɛrʋ nɩ yel-faar yaga. Ɛcɛ fʋ na wa na lɛb wa kʋ̀ m a nyɔ-vʋʋrʋ, wa ɩ k'ɩ̃ lɛb yi a yàa-bɔw pʋɔ.

²¹Fʋ na lɛb'a maal mɔwlɩ mɛ̃, fʋ na ɩ na k'ɩ̃ lɛb tɛr yúor.

²²Ɛ́ mãa a, ɩ̃ na ŋmɛ n korijom puor'ɩ fʋ barka. Naaŋmɩn i, ɩ̃ na yiele nɩ a fʋ yel-mɩnʋ. Ɩ̃ na ŋmɩɛr'ɩ pɛ̀nɛ́ íre nɩ a fʋ yúor, fʋ̃ʋ Ɩsɩrayɛl Naaŋmɩn na ɩ sõw a.

²³Ɩ̃ na ŋmɩɛr'ɩ bʋ̃-ŋmɩɛrɩ íre nɩ a fʋ yúor, ɩ̃ na cáarɛ na danɛ nɩ fʋ, fʋ na faa mɛ̃ a.

²⁴Ɩ̃ na manɛ nɩ a fʋ yel-mɩnʋ bibi-vɩɛrɩ za, bʋ̃ʋ n'ʋ vɛ̃, a bɛlɩ dem na tɩ bɔbr a ɩ̃ faa a, bɛlɛ n'ɩ bɛ ŋan nyɛ̃ vĩ nɩ zʋmɛ.