Read Dagara, Northern Sɛb-sõw yielu 78 Bible Online

Sɛb-sõw yielu 78 - Dagara, Northern bible

Sɛb-sõw yielu 78

¹Asafʋ yielu na wule yã a. Ɩ̃ nɩbɛ ɛ, nyɩ bɛrɛ wone a ɩ̃ wulu, nyɩ ƴãw tobr a ɩ̃ ƴɛ̀rʋ ƴãw.

²Ɩ̃ na háa nɩ a nʋɔr lɔb zʋkpaɩ, ɛ́ ɩ a wulu na be a koro za yele pʋɔ a, a sãá.

³Bɛ manɩ nɩ a koro za yele tɩ wõ, tɩ bãw a na. A tɩ sãà mɩnɛ man a na kʋ̀ tɩ.

⁴Tɩ kʋ̃ sɔwl'a a tɩ bibiir zie ɩ. A yele a Sore na maalɩ a ʋ yúor yi a, a ʋ kpɛnʋ, nɩ a nɔ-ɓãa-yele ʋ na maalɩ a, tɩ na man nɩ a za kʋ̀ a nɩbɛ na bɩ́ɛrɛ dɔwr a.

⁵Ʋ ƴãw nɩ nɛ́ɛ kʋ̀ a Zakɔb bʋʋrɛ, ʋ tɩr'ɩ wulu a Ɩsɩrayɛl tẽw pʋɔ. Ʋ ƴãw nɩ nʋɔr kʋ̀ a tɩ sãàkʋm-kore, kɛ́ bɛ ɩ a bɛ bibiir bãw a yele á ŋá.

⁶À ŋá n'a a nɩbɛ na bɩ́ɛrɛ dɔwr a, a bibiir na na dɔw a na bãw a yele á ŋá, ɛ́ man a kʋ̀ a bɛ mɩ̀ bibiir.

⁷Lɛ n'a a bɛ bibiir bibiir na ƴãw a bɛ tɩɛrʋ a Naaŋmɩn ƴãw. Bɛ kʋ̃ yiiri a ʋ gãda-tome bɛr ɛ, bɛ na sàwr'ɩ a ʋ nɛ-ƴãwnɩ.

⁸A lɛn daar a, bɛ kʋ̃ ŋmɛ̃ taa nɩ a bɛ sãàkʋm-kore daar nɩbɛ na zawr'ɩ a Naaŋmɩn nʋɔr ɛ́ gaarɩ a ɩ. A bɛ tɩɛrʋ tɩ lɩɛbɛ nɩ kʋralɛ, ɛ́ bɛ tu a Naaŋmɩn ɛ.

⁹A Efarayim dɔwlʋ nɩbɛ tam-tɛbrbɛ, tɩ lɩɛb'a zɔ a zɛbr bibir.

¹⁰Bɛ bɛ tɩ sàw a Naaŋmɩn wõ-taa ɩ, bɛ tɩ zawr'ɩ a wulu deb.

¹¹Bɛ tɩ yiir'ɩ a ʋ gãda-tome, nɩ a nɔ-ɓãa-yele ʋ na tɩ maalɩ bɛ nyɛ̃ a.

¹²A Naaŋmɩn tɩ maal'ɩ nɔ-ɓãa-yele, a bɛ sãàkʋm-kore mimié, a Eziptɩ tẽw, Tanisɩ[23] vuo pʋɔ.

¹³Ʋ ɓar'ɩ a kʋ̃ɔ-kpɛ̃ɛ ƴãw bɛ gãw, ɛ́ ɩ a kʋ̃ɔ ìr àr mɛ̃ dacĩ-kpɛ̃ɛ a.

¹⁴Zũzuwr'ʋ ʋ mɩ́ tɩ wule nɩ bɛ a sɔ́r a mʋ̃tɔ̃w, ɛ́ a tɩ̃ɩsɔw ʋ wule nɩ bɛ vũu cãà.

¹⁵Ʋ tɩ ɓar'ɩ pie a wɛja-kpalɛ pʋɔ, kʋ̀ bɛ kʋ̃ɔ a bɛ dɩ vuo ɩ, bɛ nyũ.

¹⁶Ʋ tɩ ɩ na bà-gbɛ́ɛ yi a pìir pʋɔ, mamɛ kʋ̃ɔnɩ darɛ taa.

¹⁷Ɛcɛ bɛ tɩ cãà na maalɛ a yel-bebe a wɛja-kpalɛ kõw ŋa pʋɔ, ɛ́ zɛbr'ɩ a Naaŋmɩn-na-do-saa-bɛ-pɩɛl-a.

¹⁸Bɛ tɩ sʋ̃ɔm'a bul ɩ a Naaŋmɩn kaa, yel k'ʋʋ kʋ̀ bɛ bʋ̃-dɩrɩ bɛ dɩ tɩw.

¹⁹Bɛ tɩ ƴɛ̀r'ɩ faa a ʋ zie yel: «A Naaŋmɩn na tʋ̃ɔ́ na cɔbrɩ dɩb kʋ̀ tɩ a wɛja-kpalɛ pʋɔ ɔ?

²⁰Yel-mɩŋa n'a, ʋ ŋmɛ n a pìir, ɩ kʋ̃ɔ yi bɛ dɩ vuo ɩ, cuure. Ɛcɛ ʋ mɩ̀ na tʋ̃ɔ́ na kʋ̀ tɩ dipɛ̃, ɛ́ dʋw nɛn kʋ̀ a ʋ nɩ-bʋʋrɛ ɛ?»

²¹A Sore tɩ wõ a na, nyɛ̃ suur, nyɛ̃ nɩ a Zakɔb bʋʋrɛ suur. A ʋ suur tɩ ìr'ɩ a Ɩsɩrayɛl nɩbɛ ƴãw.

²²Bʋ̃ʋ n'ʋ vɛ̃, a ʋ nɩbɛ bɛ tɩ ƴãw a bɛ tɩɛrʋ a ʋ ƴãw ɛ, bɛ bɛ tɩ sàw k'ʋʋ na tʋ̃ɔ́ na faa bɛ ɩ.

²³Ɛcɛ ʋ tɩ ƴɛ̀r'ɩ a zũzuge zie, ʋ tɩ yuo nɩ a salom dɩ̃dɛɛ,

²⁴ʋ tɩ ɩ na a mãan wa mɛ̃ saa a, a bɛ guolu ƴãw, ʋ kʋ̀ bɛ nɩ a salom zu dɩb.

²⁵Ʋ tɩ kʋ̀ bɛ nɩ bʋ̃-dɩrɩ sɛw lɛ za bɛ na bɔbr a, a nɩsaalbɛ tɩ 'wɔb'ɩ a malkɩ mɩnɛ dipɛ̃.

²⁶A pùorí, a Naaŋmɩn tɩ ɩ na a saa-pɛrɩ́ sɛsɛb cɛ̀r a salom zu, ɛ́ fɛr a saa-pɛrɩ́-gʋba-lowr sɛsɛb ƴãw ʋ fure,

²⁷ʋ tɩ ɩ na nɛn wa ƴãw bɛ mɛ̃ saa a, yãwmɛ mɛ̃ a uuru a, lili yãwmɛ bɛ dɩ vuo ɩ, mɛ̃ kʋ̃ɔ-kpɛ̃ɛ nʋɔr biire a.

²⁸Ʋ tɩ ɩ na a lo a bɛ laɩ sɔgɔ, a lo pàw a bɛ pɛnɛ-sɛwr.

²⁹Bɛ tɩ dɩ na tɩ tɩw tɩw tɩw, a Naaŋmɩn tɩ kʋ̀ bɛ nɩ a ʋlɩ bom nɛ bɛ na bɔbr a.

³⁰Ɛcɛ, bɛ bɛ tɩ dɩ baarɩ sɛr ɛ, bɛ tɩ cãà na ƴãw a bʋ̃-dɩrɩ a nʋɔrɩ́,

³¹ɛ́ a Naaŋmɩn suur ìr a bɛ ƴãw. Ʋ tɩ kʋ n a nɩ-kpɛn kpɛn, ʋ tɩ ŋmɛ n a Ɩsɩrayɛl pɔ́lɛ́ lɔb.

³²A na saa tɩ ɩ à à ŋá a, bɛ tɩ cãà na maalɛ a yel-bebe, bɛ cãà bɛ tɩ sàw tɩɛrɛ a nɔ-ɓãa-yele a Naaŋmɩn na maalɩ a ɩ.

³³Lɛ n'a ʋ tɩ ɩ a bɛ bibie a bɔr mɛ̃ sɛsɛb a, ɛ́ a bɛ yome baarɩ pʋl-vʋ̃ɔ pʋɔ.

³⁴A Naaŋmɩn na mɩ́ tɩ kʋrɛ bɛ a, bɛ mɩ́ tɩ lɩɛb'ɩ niwn cɔw ʋ, bɛ mɩ́ tɩ lɛb'a wa a ʋ zie, bɛ mɩ́ tɩ bɔbr'ɩ a ʋ sõwfʋ.

³⁵Bɛ mɩ́ tɩ lɛb'a bãwnɩ a Naaŋmɩn na ɩ a bɛ pìir a, a Naaŋmɩn-na-do-saa-bɛ-pɩɛl-a na ɩ a bɛ faarɛ a.

³⁶Ɛcɛ nʋɔr'ʋ bɛ mɩ́ tɩ bɛlɛ nɩ ʋ, a bɛ ƴɛ̀rʋ bɛ mɩ́ tɩ ɩ sɩza ɩ.

³⁷Bɛ bɛ tɩ tu ʋ nɩ bɛ pʋɔ za ɩ, bɛ bɛ tɩ tuur a ʋ wõ-taa ɩ.

³⁸Ɛcɛ ʋl na ɩ su-ɓaarʋ sob a, ʋ mɩ́ tɩ dɩ n a bɛ sãwna suur kʋ̀ bɛ, ɛ́ bɛ ɩ bɛ kpi ɛ. Kʋralɛ, ʋ mɩ́ tɩ vɔl'ɩ suur, ʋ bɛ mɩ́ tɩ sàw bɛr a ʋ suur ʋ ìr ɛ,

³⁹ʋ mɩ́ tɩ lɛb'a bãwnɩ a bɛ na ɩ nɩsaalbɛ tɛwr'a, pɩɛlʋ na tɔlɛ ɛ́ bɛ lɛbr waar a.

⁴⁰Gb'a a ŋmɩn za, a wɛja-kpalɛ pʋɔ a, bɛ bɛ tɩ sàw a ʋ nɩ-kpɛ̃ɛnʋ a bɛ zu ɛ, bɛ tɩ sãwnɛ nɩ a ʋ pʋɔ a zi-kon á ŋá pʋɔ.

⁴¹Bɛ tɩ lɛb'a maal tĩ ɩrɛ a Naaŋmɩn kaar, ɩrɛ a Ɩsɩrayɛl Naaŋmɩn, na ɩ sõw a, ʋ tɛr pʋ-sãwna.

⁴²Bɛ tɩ yiir'ɩ a ʋlɩ bom nɛ ʋ na ɩ a, a lɛn daar ʋ na tɩ faa bɛ a dɔ̃ sob nuru pʋɔ a.

⁴³Bɛ tɩ yiir'ɩ a yele ʋ na maalɩ a ɩ bãwfʋ a Eziptɩ tẽw pʋɔ a, a nɔ-ɓãa-yele ʋ na tɩ maalɩ a Tanisɩ[24] vuo pʋɔ a:

⁴⁴a bɔw-wɛrɩ kʋ̃ɔ na tɩ lɩɛbɩ zɩ̃ɩ, a Eziptɩ tẽw dem kʋ̃ tʋ̃ɔ́ nyũ a.

⁴⁵Ʋ tɩ ɩ na nakpon wa wa dʋnɛ a nɩbɛ, ɛ́ lɔn wa wa sãw a tẽw za.

⁴⁶Ʋ tɩ ɩ na sãsow-nãa-nʋrɩ só a bɛ bʋ̃-kʋ́ɔrɩ, sãsoge só a bɛ tome tɔnɛ.

⁴⁷Ʋ tɩ sãw nɩ a bɛ divɛ̃ tɩɩr bɛr nɩ sa-bi-kube, ɛ́ sãw a bɛ sɩkomɔɔr[25] tɩɩr bɛr nɩ saa na wa tɩ zuo a.

⁴⁸Sa-bi-kube tɩ só a bɛ nĩi nɩ a bɛ píir, saa tɩ só a bɛ dʋn tanɛ kʋrɛ.

⁴⁹Naaŋmɩn tɩ bɛr'ɩ a ʋ suur k'ʋ ìr a Eziptɩ tẽw dem ƴãw, a ʋ suur na tɩ 'lere mɛ̃ vũu a, su-tʋlʋ, ʋ bɛ tɩ nyɔw a ʋ suur ɛ, ʋ tɩ tõ n malkɩ mɩnɛ na ƴãwnɛ wahala a bɛ wa a bɛ ƴãw.

⁵⁰Ʋ tɩ tõ n a ʋ suur tome, ʋ bɛ tɩ gù a Eziptɩ tẽw dem a kũu ƴãw ɛ, ʋ tɩ bɛr bɛ na kʋ̀ a jɛ̀lmɛ̃ bàalʋ.

⁵¹Naaŋmɩn tɩ kʋ n a bɛ bidɛb-dãw-dɔwrɩ, a bɛ dɛpaal-biir nɩ a bɛ pɔwsɩ-biir a Kam[26] pɛnɛ-sɛwr pʋɔ.

⁵²Al pùorí, ʋ tɩ ɩ a ʋ nɩbɛ yi mɛ̃ dʋn na yire zaw pʋɔ a. Ʋ tɩ tɛr'ɩ a ʋ nɩbɛ kpɛ n a wɛja-kpalɛ pʋɔ, mɛ̃ píir nɩr na kparɛ a.

⁵³Ʋ tɩ tɛr bɛ na cen nɩ, bom za bɛ dam bɛ ɩ, dɛ̃bɩ̃ɛ za bɛ ɩ bɛ ɩ, ɛ́ a man kʋ̃ɔ tɩ paalɩ pàw a bɛ dɔ̃ dem.

⁵⁴Al pùorí, ʋ tɩ tɛr bɛ na kpɛ n a ʋ Tẽ-sõw pʋɔ, ʋ tɩ tɛr bɛ na ta n a tãw ʋ na zɛb de a zu.

⁵⁵Ʋ tɩ diw nɩ nɩ-bʋʋrɛ a bɛ niŋé bɛ ìr, ɛ́ ʋ põ a Kanãa tẽw kʋ̀ bɛ, ŋa mɩ́ tɛr ʋ zie. Ʋ tɩ ɩ n a Ɩsɩrayɛl dɔwlʋ dɔwlʋ nɩbɛ kpɩɛr a bɛ pɛnɛ-sɛwr pʋɔ.

⁵⁶Ɛcɛ bɛ tɩ ɩ n a Naaŋmɩn-na-do-saa-bɛ-pɩɛl-a kaa, bɛ tɩ jɛrɛ na, bɛ sàwr a nɛ́ɛ ʋ na ƴãw a ɩ.

⁵⁷Bɛ tɩ lo n sɔr-faa mɛ̃ a bɛ sãàkʋm-kore a, bɛ bɛ tɩ tu a Naaŋmɩn ɛ, ɛ́ ƴaw lɩɛbɩ mɛ̃ tam na pʋnɩ a.

⁵⁸Bɛ tɩ tɛr'ɩ a bɛ maalʋ-ziir, ƴãw k'a Sore nyɛ̃ suur, bɛ tɩ tɛr'ɩ a bɛ ŋmɩmɛ dasuli, ɩ kɛ̀ nyuur ɩrɛ ʋ.

⁵⁹A Naaŋmɩn tɩ nyɛ̃ a na, nyɛ̃ suur jɛ a Ɩsɩrayɛl nɩbɛ bɛr.

⁶⁰Ʋ tɩ yi na kɛ́ bɛr a ʋ yir a Silo tẽw, a pɛn-sɛw ʋ na tɩ maalɩ a nɩsaalbɛ sɔgɔ a.

⁶¹A wõ-taa daga na ɩ a ʋ kpɛnʋ nɩ a ʋ yúor-vɩɛlʋ-danʋ bãwfʋ a, ʋ tɩ bɛr ʋ nɩ dɔ̃ dem nuru pʋɔ, bɛ cen nɩ.

⁶²Ʋ tɩ nyɛ̃ nɩ nɩ a nɩbɛ ʋ na so a suur, lɛ n'a ʋ tɩ zawrɩ a ʋ nɩbɛ bɛr bɛ kpi a sʋɔ kũu.

⁶³Vũu tɩ dɩ n a pɔlbili, ɛ́ a pɔwsɩrali bɛ tɩ wõ bɛ yieli a bɛ kul-taa ƴãw ɛ.

⁶⁴A zɛbr-sɔ-kpɛ̃ɛ tɩ kʋ n a bàwr-maalbɛ, ɛ́ a pɔw-kɔbɛ bɛ tɩ ŋmãa lãw-mʋɔlɛ ɩ.

⁶⁵Lɛ n'a a Sore tɩ zaw ìr mɛ̃ gʋ̃ɔ-gúre a, mɛ̃ gãdaa dãa na ɩrɛ a.

⁶⁶Ʋ tɩ yi n a pùorí wa ŋmɛ a ʋ dɔ̃ dem ƴãw bɛ vĩ na bɛ tɛr baarʋ a.

⁶⁷Ʋ tɩ bɛr'ɩ a Zuzɛb yir dem, ʋ bɛ tɩ sàw kaa ír a Efarayim dɔwlʋ ɛ.

⁶⁸Zuda dɔwlʋ n'ʋ ʋ tɩ kaa ír, Sɩyɔ̃ tãw n'ʋ ʋ tɩ nɔ̃w.

⁶⁹Be n'a ʋ tɩ ŋmãa a ʋ zi-sõw, ʋ kpɛmɛ mɛ̃ a salom a, be n'a ʋ tɩ ƴãw ʋ ʋ àr kʋralɛ, mɛ̃ a tẽsɔw a.

⁷⁰A Sore mɩ̀ tɩ kaa na ír a ʋ tõ-tõ-bie Daviir, ʋ cen na tɩ nyɔw ʋ a píir zaw pʋɔ.

⁷¹Pi-cɩ̃ɩnʋ zu n'a ʋ nyɔw ʋ, wa ƴãw k'ʋ ɩ a Ɩsɩrayɛl nɩbɛ ʋ na so a cɩ̃ɩnɛ.

⁷²A Daviir tõ n a ʋ ton nɩ soci-vla, ʋ kaa nɩ a Naaŋmɩn nɩ-bʋʋrɛ zie nɩ yã-bãwfʋ.