Read Dagara, Northern Sɛb-sõw yielu 83 Bible Online

Sɛb-sõw yielu 83 - Dagara, Northern bible

Sɛb-sõw yielu 83

¹Yielu. Sɛb-sõw yielu Asafʋ na maalɩ a.

²Naaŋmɩn i, ta ɩ gbili ɛ, Naaŋmɩn i, ta zɩ̃ zoom bɛ ɩrɛ bom za ɩ.

³Nyɛ̃, a fʋ dɔ̃ dem damnɛ na, a fʋ bɛ-nɔnbɛ zɛwr'ɩ a zu.

⁴Bɛ bʋ̀rɛ nɩ taa a fʋ nɩ-bʋʋrɛ ƴãw, bɛ sɔwlɛ na wone taa a fʋ nɩbɛ fʋ na gùre a ƴãw.

⁵Bɛ yere na: «Nyɩ wa tɩ ɩ bɛ ta cãà ɩ nɩbɛ a nɩ-bʋʋrɛ pʋɔ ɩ, bɛ ta cãà pore a Ɩsɩrayɛl yúor ɛ!»

⁶Bɛ sɔwlɛ na ɓanɛ taa, bɛ za sàw na kɛ́ bɛ maalɩ wõ-taa a fʋ ƴãw.

⁷Edɔm nɩ Ɩsɩmayɛl nɩbɛ nɛbɛ, Mowab, Agaar nɩ Geval nɩbɛ,

⁸Amɔ̃ nɩ Amalɛkɩ nɩbɛ, Filisɩtɛ̃ mɩnɛ nɩ Tɩ́ɩ̀r tẽw dem.

⁹Asiiri tẽw dem tɛɛ za lãw nɩ bɛ na, kɛ́ bɛ sõw a Lɔtɩ bibiir[28]. Tɛw-àrʋ

¹⁰Naaŋmɩn i, ɩ bɛ mɛ̃ a Yavin nɩ a ʋ zɛbr nɩ-kpɛ̃ɛ Sɩsera fʋ na tɩ ɩ a Kison bà-fʋɔla pʋɔ a. Ɩ bɛ mɛ̃ a Madian tẽw dem a.

¹¹Bɛ tɩ kʋ bɛ na pàw pɛr a Ɛɩn-Door, bɛ ɩ pʋɔrʋ a tẽsɔw ƴãw.

¹²Ɩ a bɛ na-mɩnɛ mɛ̃ a lɛ fʋ na tɩ ɩ a Orɛvʋ nɩ a Zɛvʋ a, ɩ a bɛ nɩ-bɛrɛ za mɛ̃ Zeva nɩ Salimuna a.

¹³A nɩbɛ bɛ ŋa tɩ yel'a: «Nyɩ ɩ tɩ de a ziir a Naaŋmɩn na so a.»

¹⁴Ɩ̃ Naaŋmɩn i, ɩ bɛ ŋmɛ̃ taa nɩ a pupun-bir, bɩɩ a sàwr a sɛsɛb na mɩ́ ɓáw cen nɩ a.

¹⁵Mɛ̃ a lɛ vũu na mɩ́ dɩ tuw a, mɛ̃ a lɛ vũu-zɛlɛ na mɩ́ dɩ tan lʋɔrɩ a,

¹⁶diw bɛ nɩ a fʋ sɛsɛb, ƴãw bɛ dɛ̃bɩ̃ɛ nɩ a fʋ saa-sɛsɛb-kpɛ̃ɛ.

¹⁷Ɩ kɛ̀ bɛ nyɛ̃ vĩ, tʋ̃ɔ́ lɛb wa a fʋ zie, Sore e.

¹⁸A bɛ yúor, ʋ sãw, dɛ̃bɩ̃ɛ, a ɩrɛ bɛ kʋralɛ! Vĩ, a nyɔw bɛ bɛ kpi!

¹⁹Bɛ bãwnɩ a kɛ́ fʋ̃ʋ yõ, a yúor na dɩ Sore a, fʋ̃ʋ n'ɩ a Naaŋmɩn-na-do-saa-bɛ-pɩɛl-a, a tẽ-daa za zu.