Read Dagara, Northern Sɛb-sõw yielu 88 Bible Online

Sɛb-sõw yielu 88 - Dagara, Northern bible

Sɛb-sõw yielu 88

¹Yielu. Sɛb-sõw yielu Koore bibiir na maalɩ a. Yiel-yielbɛ nɩ-kpɛ̃ɛ sɛbɛ pʋɔ yielu. Ʋ yiele na mɛ̃ nɩbaal-yielu a. Tẽ-bie Heman [29] yielu na wule yã a.

²Sore Naaŋmɩn, ɩ̃ faarɛ ɛ, ɩ̃ mɩ́ kone na bʋɔlɛ fʋ a mʋ̃tɔ̃w, ɛ́ lɔbr cɛlsɩ cɔwr fʋ a tɩ̃ɩsɔw.

³A ɩ̃ puoru, a ta fʋ, ƴãw tobr a ɩ̃ kon ƴãw.

⁴A ɩ̃ nyɔ-vʋʋrʋ ɩ n kpɩɛrʋ tɛwr, ɛ́ a ɩ̃ kũu cɛ kerkerlɛ.

⁵Bɛ sɔ́r mɛ̃ na ƴãw a nɩbɛ na kpi baar'a pʋɔ, ɩ̃ bɛ cãà ŋmɛ̃ nɩr ɛ.

⁶A kũuni sɔgɔ n'a a ɩ̃ zie be, mɛ̃ a nɩbɛ bɛ na kʋ bɛ gã a yaa pʋɔ a. Fʋ yiir'ɩ a bɛ yele, fʋ bɛ cãà kaarɛ bɛ zie ɩ.

⁷Fʋ ƴãw mɛ̃ nɩ a bɔw-zulu pɛrɩ́, ziir na liw ɛ́ zulme a pʋɔ.

⁸A fʋ su-yãyaar ìr'ɩ a ɩ̃ ƴãw, fʋ mɩ́ dĩ nɩ mɛ̃ mɛ̃ kʋ̃ɔ-mie a. Tɛw-àrʋ

⁹Fʋ ɩ na a ɩ̃ bárɩ cen kɛ́ bɛr mɛ̃, fʋ ɩ na ɩ̃ ɩrɛ bɛ kɔkɔrʋ. Mãa n'ɩ ŋan pàw gã ɛ́ kʋ̃ tʋ̃ɔ́ yi ɛ.

¹⁰A kpɩɛrʋ zɔ̃wnɛ mɛ̃ nɩ a mimie. Sore e, ɩ̃ mɩ́ bʋɔlɛ fʋ nɩ bibir za, ɩ̃ mɩ́ zɛw nɩ a nuru cɔw fʋ.

¹¹Fʋ na maal'ɩ nɔ-ɓãa-yele a kũuni ƴãw bɩɩ? A nyãakpɩmɛ na ír'a danɛ fʋ bɩɩ? Tɛw-àrʋ

¹²Ãa n'ʋ na pore a fʋ nɔ̃wfʋ yúor a yàa-bɔw pʋɔ? Ãa n'ʋ na manɛ a fʋ pùor-bɛ-lɛbrʋ a kpɩmɛ tẽw?

¹³Bɛ bãw nɩ a fʋ nɔ-ɓãa-yele a lige tẽw i? nɩ a fʋ mɩnʋ a yiiru tẽw pʋɔ ɔ?

¹⁴Mãa a, ɩ̃ kone na bʋɔlɛ fʋ, Sore e, a biɓaara a, a ɩ̃ puoru mɩ́ ta b'a.

¹⁵Sore e, bʋ̃ʋ n'ʋ so fʋ zawrɛ mɛ̃ bɛrɛ? Bʋ̃ʋ n'ʋ so fʋ bɛ bɔbr k'ɩ̃ɩ nyɛ̃ a fʋ niwn?

¹⁶A ɩ̃ bibile daarɩ́ za n'a ɩ̃ ɩ a kpɩɛrʋ nɩr, ɛ́ a ɩ̃ kũu cɛ a kerkerlɛ. A pʋl-vʋ̃ɔ fʋ na ƴãw mɛ̃ a bɛ bɛrɛ mɛ̃ ɩ, ɩ̃ bɛ cãà bãw ŋmɩŋmɩn za n'a ɩ.

¹⁷A fʋ suur ìr'ɩ a ɩ̃ ƴãw, ɛ́ a pʋl-vʋ̃ɔ fʋ na ƴãw mɛ̃ a gbini mɛ̃.

¹⁸A fʋ suur mɩ́ pili na pàw mɛ̃ bibie za, mɛ̃ kʋ̃ɔ a, a mɩ́ jil'a koli mɛ̃ ziir za.

¹⁹Fʋ ɩ na a ɩ̃ nɩbɛ nɩ a ɩ̃ bárɩ cen kɛ́ bɛr mɛ̃. Mãa nɩ a lige tɛwr pãa nɛbɛ.