Read Dagara, Northern Sɛb-sõw yielu 90 Bible Online

Sɛb-sõw yielu 90 - Dagara, Northern bible

Sɛb-sõw yielu 90

¹A Naaŋmɩn nɩr Moyiir puoru. Sore e, yome yome za, fʋ̃ʋ n'ʋ tɩ ɩ a tɩ sɔwlʋ zie.

²A tan na bɛ tɩ yi sɛr a, a tẽsɔw nɩ a zie na bɛ tɩ be sɛr a, fʋ tɩ ɩ n a Naaŋmɩn dɩta-pɛ-yome za, ɛ́ na ɩ ʋ kʋralɛ.

³Fʋ mɩ́ ɩ na a nɩsaalbɛ lɛb lɩɛbɩ tanɛ, ɛ́ fʋ yel bɛ: «Nyɩ lɛb cen a be nyɩ na yi wa a.»

⁴Yome túr a fʋ zie ɩ na mɛ̃ zãa bibir na tɔl a, bɩɩ mɛ̃ tɩ̃ɩsɔw tɛm ɓile blã a.

⁵Fʋ mɩ́ de nɩ a nɩsaalbɛ nyɔ-vʋʋrʋ tɔl'ɩ, ʋ mɩ́ cɛlɩ na mɛ̃ gʋ̃ɔ fʋ na gúr ŋmãa ŋmãalɛ a. Ʋ ŋmɛ̃ na taa nɩ a mʋ̃ɔ na bule a.

⁶A biɓaara a, ʋ mɩ́ pure na, ʋ mɩ́ kɛrɛ na. A zaanʋɔra, ʋ vàrɛ, ʋ kò na!

⁷A fʋ suur baarɩ tɩ na, a fʋ su-yãyaar ƴãw tɩ nɩ pʋl-vʋ̃ɔ.

⁸Fʋ bin nɩ a tɩ sãwna a fʋ niŋé, ɛ́ a fʋ cãà caalɛ a tɩ yel-sɔwlɩ.

⁹A fʋ suur zũú n'a a tɩ bibie báarɛ. A tɩ yome mɩ́ baar'a mɛ̃ vʋʋrʋ fʋ na vʋʋrɩ daƴen a!

¹⁰A tɩ yome nʋɔr mɩ́ ɩ n lɩz'a ata nɩ pie, lɩz'a anaar, nɩr yawra wa vɩɛl a, ɛcɛ a yaga zie mɩ́ ɩ n kpɩɛrʋ nɩ bàlʋ zawla, a mɩ́ zɔ na tɔl fɔ̃w, ɛ́ tɩ tɔl.

¹¹Ãa n'ʋ bãw a lɛ a fʋ suur na sɛw a? Ʋ ɩ n kpɛ̃ɛ sɛw a lɛ tɩ na ƴãwnɛ fʋ a.

¹²Wul tɩ tɩ bãw a tɩ bibie sɔ́rʋ, lɛ n'a tɩ na tɛr yã-bãwnɛ tɩɛrʋ.

¹³Sore e, debor'a fʋ na nyɛ̃ a suur tɩ ta? Lɛb wa, zɔ a fʋ tõ-tõ-biir nɩbaalʋ.

¹⁴A zie mɩ́ wa vɩɛrɛ wa báarɛ a, fʋ̃ʋ mɩ́ paalɩ tɩ nɩ a fʋ nɔ̃wfʋ, ɛ́ tɩ na mɩ́ yiele na ŋmɩɛr'ɩ nʋ̃ɔ̀ cɛlsɩ a tɩ nyɔ-vʋʋrʋ daar za.

¹⁵Ɩ nʋ̃ɔ̀ kpɛ tɩ man a bibie nʋɔr fʋ na ɩ tɩ nyɛ̃ vĩ a, a yome nʋɔr tɩ na nyɛ̃ a kpɩɛrʋ a.

¹⁶A fʋ tome, a sãá tɩ nyɛ̃, ɛ́ a tɩ bibiir nyɛ̃ a fʋ vɩɛlʋ!

¹⁷A Sore tɩ Naaŋmɩn, ʋ tɛr su-nʋ̃ɔ̀ a tɩ ƴãw, ɛ́ ɩ kɛ̀ maalʋ yi a tɩ nuru tome pʋɔ a tɩ ƴãw, ɩ kɛ̀ maalʋ yi a tɩ nuru tome pʋɔ.