Read Dagara, Northern Sɛb-sõw yielu 91 Bible Online

Sɛb-sõw yielu 91 - Dagara, Northern bible

Sɛb-sõw yielu 91

¹Ʋlɩ sob na zɔrɛ kpɩɛr a Naaŋmɩn-na-do-saa-bɛ-pɩɛl-a naayir ɛ́ pɩ̃ɛnɛ a Kpɛnʋ-za-sob ɓaarʋ́ a,

²ʋ mɩ́ yel'ɩ a Sore: «Fʋ̃ʋ n'ɩ a ɩ̃ zɛbr-yir-kpɛ̃w, a ɩ̃ sɔwlʋ zie, fʋ̃ʋ n'ɩ a ɩ̃ Naaŋmɩn, ɩ̃ ƴãw nɩ a ɩ̃ tɩ́ɛrʋ a fʋ ƴãw.»

³— A Naaŋmɩn n'ʋ mɩ́ sɩrɩ ír fʋ bɛr a nabawlɛ bɛrɩ pʋɔ, ʋ mɩ́ sanɩ nɩ a fʋ jɛ̀lmɛ̃ bàalʋ na kʋrɛ a.

⁴Ʋ mɩ́ yɛ́r'ɩ a ʋ pɩgɛ pàw fʋ, ɛ́ fʋ nyɛ̃ sɔwlʋ zie a ʋ zie. A ʋ yel-mɩŋa sɩrɩ na piw fʋ tɛr, mɛ̃ zɛbr-kur-pãgala a.

⁵Fʋ kʋ̃ zɔrɛ bom za ɩ: a tɩ̃ɩsɔw bʋ̃-faar na ɩrɛ dɛ̃bɩ̃ɛ a, a pĩi bɛ na tɛ ʋ cere a mʋ̃tɔ̃w a,

⁶a jɛ̀lmɛ̃ bàalʋ na waar a lige pʋɔ a, nɩ a tẽw na 'lere vũu a mʋ̃tɔ̃-tuo a.

⁷Nɩbɛ túr saa lo a fʋ lõbowrí, ɛ́ tùr-pie lo a fʋ dʋrʋ lowr a, bom za bɛ ɩrɛ fʋ ɛ.

⁸Yuo a mimie tɛwr, ɛ́ fʋ na nyɛ̃ nɩ lɛ a Naaŋmɩn na mɩ́ ya a nɩ-faar a.

⁹— Sore e, fʋ̃ʋ sɩrɩ n'ɩ a ɩ̃ sɔwlʋ zie! — Fʋ ɩ na a Naaŋmɩn-na-do-saa-bɛ-pɩɛl-a ʋ ɩ a fʋ kpɛb zie.

¹⁰Yel-faa za bɛ páwr fʋ ɛ, bʋ̃-faa za bɛ pɩɛlɛ a fʋ yir ɛ.

¹¹Bʋ̃ʋ n'ʋ vɛ̃, a Sore na yel'ɩ a ʋ malkɩ mɩnɛ kɛ́ bɛ gùre fʋ a ziir za fʋ na cere a.

¹²Bɛ na mɩ́ ɓaabɩ fʋ nɩ a bɛ nuru pʋɔ k'aa fʋ gbɛ́r taa ŋmɩɛr kʋsɩɛr ɛ.

¹³Fʋ na mɩ́ do na nɛ̃ a gbẽw nɩ a dɔpan, fʋ na mɩ́ nɛ̃ nɩ a gbẽw-bile nɩ a wa-bɩɛ.

¹⁴A Naaŋmɩn yere na: «Ʋ na tu m a, ɩ̃ na faa ʋ na. Ɩ̃ na gùre ʋ na, ʋ na bãw a ɩ̃ yúor a ƴãw.

¹⁵Ʋlɛ wa bʋɔlɛ mɛ̃ a, ɩ̃ na sɔw na, ɩ̃ na be n a ʋ zie a kpɩɛrʋ daar, ɩ̃ na faa ʋ na, ɩ̃ na ɩ na k'ʋ nyɛ̃ ƴãwfʋ.

¹⁶Ɩ̃ na ɩ na ʋ kpɛ a tẽw zu ka tɩ sɛw, ɩ̃ɩ na wul ʋ na k'ɩ̃ɩ ɩ n a ʋ faarɛ.»