Read Dagara, Northern Sɛb-sõw yielu 95 Bible Online

Sɛb-sõw yielu 95 - Dagara, Northern bible

Sɛb-sõw yielu 95

¹Nyɩ wa tɩ lɔbr nʋ̃ɔ̀ cɛlsɩ a Sore ƴãw! Tɩ cáarɛ danɛ nɩ a tɩ Pìir, a tɩ faarɛ!

²Nyɩ ɩ tɩ ta a ʋ niŋé, nɩ barka puoru, nyɩ ɩ tɩ cɛ yielu cɩlɛ danɛ nɩ ʋ.

³Bʋ̃ʋ n'ʋ vɛ̃, a Sore ɩ n Naaŋmɩn-kpɛ̃ɛ, a Na-kpɛ̃ɛ na gãw a ŋmɩmɛ za a.

⁴A tẽsɔw bɔw-zulsɩ be n a ʋ nũú, ʋlɛ so a tan nyɔ-ɓɩɩlɩ.

⁵Ʋlɛ mɩ̀ so a kʋ̃ɔ-kpɛ̃ɛ, ʋlɛ na n'ʋ maal'ʋ a, ɛ́ mɩ̀ cãà so a tẽsɔw-kɔbr, a ʋ nuru n'a maal'ʋ.

⁶Nyɩ wa, nyɩ ɩ tɩ gũu zu, tɩ siwri tɩ tʋɔra, tɩ lo gbĩ dume gũu tɩ tɔ tẽw a Sore na mɛ tɩ a niŋé.

⁷Ʋlɛ sɩrɩ n'ɩ a tɩ Naaŋmɩn, ɛ́ tɩ ɩ a nɩbɛ ʋ na kaarɛ a, a píir ʋ na cɩ̃ɩnɛ a. A dɩ̃a bibir a, nyɩ bɛrɛ wone a lɛ ʋ na yere a:

⁸«Nyɩ ta kpãa tobr mɛ̃ a lɛ a nyɩ sãàkʋm-kore na tɩ ɩ a Meriba a ɩ, mɛ̃ a lɛ bɛ na tɩ ɩ a Masa, a wɛja-kpalɛ pʋɔ a ɩ.

⁹Bɛ tɩ nyɛ̃ nɩ a ɩ̃ tome a be, ɛ́ cãà ŋmãa mɛ̃ pùor, cãà ɩ m kaa.

¹⁰A nɩbɛ bɛ ŋa yele bàl mɛ̃ nɩ yaga yome lɩz'a ayi, ɛ́ ɩ̃ yel: Nɩ-bʋʋrɛ a tɩɛrʋ na bɔr a nɛbɛ, bɛ bɛ bãw a ɩ̃ pʋ-tɩɛrʋ sɛ́ɛ ɩ.»

¹¹Lɛ n'a ɩ̃ nyɛ̃ suur pɔ à ŋá: «Bɛ kʋ̃ ta a ɩ̃ pɩ̃ɛnʋ zie ɩ.»