Read Dagara, Northern Sɛb-sõw yielu 98 Bible Online

Sɛb-sõw yielu 98 - Dagara, Northern bible

Sɛb-sõw yielu 98

¹Sɛb-sõw yielu. Nyɩ yieli yiel-paala danɩ nɩ a Sore, ʋ sɩrɩ na maalɩ nɔ-ɓãa-yele. A ʋ dʋrʋ nũu nɩ a ʋ kpãkpãw-sõw n'a ʋ zɛb'ɩ tʋ̃ɔ́.

²A Sore wul'ɩ a nɩ-bʋʋr-yoru kɛ́ ʋlɛ n'ɩ a Faarɛ, ʋ ɩ na bɛ bãw a ʋ mɩnʋ.

³Ʋ bɛ yiiri a ʋ nɔ̃wfʋ nɩ a ʋ na ŋmɛ̃ ʋ ŋmɛ̃a a a Ɩsɩrayɛl nɩ-bʋʋrɛ ƴãw ɛ. A nɩbɛ nyɛ̃ na tɩ tɔ a tẽw baarʋ zie k'aa Naaŋmɩn faa tɩ na.

⁴Tẽ-daa nɩbɛ za a, nyɩ cáarɛ a Sore ƴãw, nyɩ lɔbr nʋ̃ɔ̀ cɛlsɩ, ɛ́ yiele ŋmɩɛr'ɩ bʋ̃-ŋmɩɛrɩ.

⁵Nyɩ ŋmɩɛr korijom danɛ nɩ a Sore, nyɩ ŋmɩɛr korijom lãwnɩ a bʋ̃-ŋmɩɛrɩ.

⁶Nyɩ pɛblɛ wɩɩr nɩ ɩ́lɛ́, nyɩ ŋmɩɛr kuryii ƴãwn a Sore, tɩ Nãà.

⁷A kʋ̃ɔ-kpɛ̃ɛ, ʋ damnɛ, nɩ a bome al za na paalɩ ʋ a, a tẽ-daa nɩ a nɩbɛ na kpɩɛr a ʋ zu a!

⁸A mamɛ, a puore nuru, ɛ́ a tan lãw taa cɩɩrɛ nɩ nʋ̃ɔ̀

⁹a Sore niŋé, ʋ na waar a ƴãw. Ʋ waar'a k'ʋʋ wa dɩ n a tẽw ƴɛ̀rʋ, ʋ na dɩ n nɩ a tẽ-daa a ƴɛ̀rʋ nɩ mɩnʋ, ɛ́ dɩ n a nɩ-bʋʋrɛ a ƴɛ̀rʋ a tu yel-mɩŋa.