Read Dagara, Northern Sɛb-sõw yielu 99 Bible Online

Sɛb-sõw yielu 99 - Dagara, Northern bible

Sɛb-sõw yielu 99

¹A Sore ɩ n nãà, a nɩ-bʋʋrɛ màwr'a. A ʋ naalʋ-dà-kɔw bin nɩ a seribɛ̃ mɩnɛ zu-sɔw, a tẽw damnɛ na.

²A Sore ɩ n kpɛ̃ɛ a Sɩyɔ̃ tẽw pʋɔ, — ʋ do na gãw a nɩ-bʋʋrɛ za.

³A nɩbɛ, bɛ íre a fʋ yúor: — fʋ̃ʋ Naaŋmɩn na ɩ kpɛ̃ɛ ɛ́ bɛ tɛr dɩ̃ɛnʋ a. Fʋ ɩ n sõw.

⁴Nãà fãw n'ɩ ʋ na nɔnɛ a yel-na-tu-sɔr-a. Fʋ̃ʋ n'ʋ bin a lɛ a na sɛw k'aa yele tuur a. A yel-na-tu-sɔr nɩ a mɩnʋ a, fʋ̃ʋ n'ʋ ƴãw a a Zakɔb bʋʋrɛ pʋɔ.

⁵Nyɩ hiere yere a Sore tɩ Naaŋmɩn na ɩ kpɛ̃ɛ a, nyɩ lo gbĩ dume gũu tɩ tɔ tẽw a ʋ naalʋ-dà-kɔw pɛr. — A Sore ɩ n sõw.

⁶Moyiir nɩ Aarɔ̃ tɩ pʋɔ nɩ a ʋ bàwr-maalbɛ pʋɔ, ɛ́ Samɩɛl pʋɔ a bɛlɩ dem na bʋɔlɛ a ʋ yúor a pʋɔ, bɛ mɩ́ tɩ bʋɔl'ɩ a Sore, ʋ sɔw bɛ.

⁷A Naaŋmɩn mɩ́ tɩ ƴɛ̀rɛ nɩ a bɛ zie a zũzuwr[33] na ba àr mɛ̃ kpul a pʋɔ, bɛ tɩ sàw nɩ a ʋ nɛ-ƴãwnɩ nɩ a wulu ʋ na tɩ kʋ̀ bɛ a.

⁸Sore tɩ Naaŋmɩn i, fʋ̃ʋ mɩŋa mɩ́ tɩ sɔw bɛ na. A bɛ zie a, fʋ tɩ ɩ n Naaŋmɩn na nyɔwr ʋ tʋɔra a, ɛcɛ fʋ tɩ dɔwrɩ bɛ nɩ a bɛ sãwna ƴãw.

⁹Nyɩ hiere yere a Sore tɩ Naaŋmɩn na ɩ kpɛ̃ɛ a, nyɩ lo gbĩ dume gũu tɩ tɔ tẽw tori a ʋ tãw-sõw, bʋ̃ʋ n'ʋ vɛ̃, A Sore tɩ Naaŋmɩn ɩ n sõw.