Read Dagara, Northern Zʋkpaɩ 1 Bible Online

Zʋkpaɩ 1 - Dagara, Northern bible

Zʋkpaɩ 1

¹Daviir bidɛb, Salomɔ̃, na ɩ a Ɩsɩrayɛl tẽw nãà a zʋkpaɩ.

²A zʋkpaɩ á ŋá wule nɩ a nɩbɛ lɛ bɛ na na tʋ̃ɔ́ vʋʋrɛ nɩ yã-bãwfʋ a. A ɩrɛ na bɛ páwr wulu na vɩɛl a, ɛ́ wone ƴɛ̀rʋ na tɛr pɛr vla a.

³A wule nɩ a lɛ fʋ na na vʋʋrɛ mɛ̃ nɩr na tɛr yã a, nɩr na ɩ nɩ-mɩŋa a, nɩr na maal tɛr a nɛ́ɛ na ƴãw a, nɩr na ɩ dẽdẽ a.

⁴A mɩ́ ɩ n a bɛlɩ dem na bɛ bãw bom a, bɛ tɛr maal-ɩrɛ. A mɩ́ kʋ̀ n bãwfʋ a pɔlbili ɛ́ mɩ́ sõw bɛ bɛ tɛr tɩɛrʋ.

⁵A yã-bãwnbɛ tɛɛ za na tʋ̃ɔ́ na kanɩ a, ɛ́ bɛ na zanɩ nɩ bom a pʋɔ. A bɛlɩ dem tɛɛ za na tɛr yã a na nyɛ̃ nɩ yã-wulu na vɩɛl a, a pʋɔ.

⁶Bɛ na tʋ̃ɔ́ na bãw a zʋkpaɩ a mɩnɛ pɛr na sɔwlɩ a, ɛ́ bãw bom nɛ na kpɛmɛ a yã-bãwnbɛ wulu pʋɔ a.

⁷A Sore zɔba n'ɩ a yã-bãwfʋ tib zie[1]. Dãbole tɛwr nɛbɛ mɩ́ ɩrɛ a yã-bãwfʋ nɩ a wulu laar.

⁸Ɩ̃ bie e, sàwr a kpãàfʋ a fʋ sãà na kpãànɛ fʋ a, ɛ́ ta zawrɛ a fʋ mã wulu bɛrɛ ɩ.

⁹Bʋ̃ʋ n'ʋ vɛ̃, a na ɩ na mɛ̃ dɛpaal-kpawʋɔ a fʋ zũú a, bɩɩ mɛ̃ lɛwɛ a fʋ kɔkɔrɩ́ a.

¹⁰Ɩ̃ bie e, a fʋ taabɛ na ɩ nɩ-faar a wa bɔbr kɛ́ bɛ bɛlɩ fʋ ƴãw faa maalʋ pʋɔ a, taa sàwr ɛ.

¹¹Bɛlɛ wa yel fʋ: «Wa lãw nɩ tɩ! Tɩ sɔwlɩ kʋ nɩbɛ. Tɩ sɔwlɩ zɛb'ɩ nɩbɛ na bɛ tɛr sãwna a wõ nʋ̃ɔ̀.

¹²Tɩ na nyɔw bɛ nɩ mimie, kʋ bɛ ɛ́ ƴãw bɛ siw a bɔw pʋɔ daadaa mɛ̃ tɩɩm n'ɩ a kũu tɔr za a.

¹³Tɩ na páw nɩ bʋ̃-vɩɛlɩ bʋʋrɛ bʋʋrɛ za, tɩ na paal'ɩ a tɩ yie nɩ a na-bome á ŋá.

¹⁴Wa, fʋ na páw nɩ a fʋ dem. Tɩ na lãw nɩ a libie daga.»

¹⁵Ɩ̃ bie e, taa lãwnɛ nɩ bɛ ɩ, dɛrɛ a bɛ sɛ́ɛ.

¹⁶Bʋ̃ʋ n'ʋ vɛ̃, bɛ mɩ́ maal'ɩ a faa fɔ̃wlɛ, bɛ mɩ́ pawr'ɩ a nɩr kʋb ƴãw.

¹⁷A lile wa faa nyɛ̃ a nabawlɛ a, zawlalɛ n'a a nabawlɛ na ƴãwnɛ bɛra a ʋ nyɔwfʋ ƴãw.

¹⁸Ɛcɛ, a nɩbɛ bɛ ŋa a, bɛ lɛb'a ŋmɛlɩ ƴãwnɛ bɛra a bɛl mɩŋa. A bɛ bʋ-taa na lɛb'a lo a bɛ zu.

¹⁹Bʋ̃ʋ n'ʋ vɛ̃, à ŋá n'a a mɩ́ ŋmɛ̃ a bɛlɩ dem na mɩ́ dier a bɛ taabɛ bome a zie: bɛ mɩ̀ mɩ́ de nɩ a bɛ nyɔ-vʋʋrʋ.

²⁰A Yã-bãwfʋ[2] cɩɩrɛ nɩ a sɛ́ɛ zu. Ʋ zɛw nɩ a kɔkɔr ɛ́ ƴɛ̀rɛ a nɩbɛ tuor-taa ziir.

²¹Ʋ bʋɔlɛ nɩ a be a nɩbɛ na yãwmɛ a, ʋ hiere na yere a tẽ-kpɛ̃ɛ dɩ̃dɛɛ ƴãw:

²²«A nyɩɩm na bɛ bãw bom za a, debor'a nyɩ na nɔ̃w a nyɩ bom bɛ-bãwfʋ tɩ ta? A nyɩɩm nɩ-ɩ-laarbɛ, debor'a nyɩ na ɩ m la tɩ ta? A nyɩɩm dãbole, debor'a nyɩ na zawrɩ a bãwfʋ bɛr tɩ ta?

²³Nyɩ bɛrɛ wone a gɔ́b ɩ̃ na gɔnɛ nyɩ a. Lɛ n'a ɩ̃ na bɛr a ɩ̃ vʋʋrʋ ʋ siw a nyɩ zu ɩ kɛ̀ nyɩ bãw a ɩ̃ ƴɛ̀rʋ.

²⁴Ɩ̃ bʋɔlɛ nyɩ na ɛ́ nyɩ bɛ sàwr ɛ, ɩ̃ ture nyɩ nɩ a nũu ɛ́ nɩr za bɛ cɛlɛ be ɩ.

²⁵Nyɩ zawr'ɩ a ɩ̃ wulu za bɛr, ɛ́ bɛ sàw de a ɩ̃ kpãàfʋ zaa pʋrɩlɛ ɩ.

²⁶Alɛ so, nyɩmɛ wa be a kpɩɛrʋ pʋɔ a lɛn daar a, ɩ̃ na laar'a. A pʋl-vʋ̃ɔ wa tɛr nyɩ a lɛn daar a, ɩ̃ na ɩrɛ nyɩ na laar.

²⁷Bʋ̃ʋ n'ʋ vɛ̃, bibir kãw, a dɛ̃bɩ̃ɛ na lo n a nyɩ zu mɛ̃ sɛsɛb-kpɛ̃ɛ a. A kpɩɛrʋ na ɓáw nyɩ na cen nɩ mɛ̃ saa-sɛsɛb a, a pʋl-vʋ̃ɔ nɩ a pʋ-sãwna na lo n a nyɩ zu.

²⁸Lɛ n'a nyɩ na bʋɔlɛ mɛ̃ ɩ̃ɩ kʋ̃ sɔw nyɩ ɛ, nyɩ na bɔbr mɛ̃ ɛ́ kʋ̃ nyɛ̃ m ɛ.

²⁹A yele á ŋá na ɩ na, nyɩ na zawrɩ na zanɩ a nyɔ-vʋʋrʋ, ɛ́ bɛ sàw kaa ír a Sore zɔba a.

³⁰Nyɩ zawr'ɩ a yã ɩ̃ na wule nyɩ a, ɛ́ bɛ ŋmɛlɩ kaa a ɩ̃ kpãàfʋ ɛ.

³¹A na ɩ à ŋá a, nyɩ na tuo nɩ a sãwna a nyɩ ɩb na wa n a, a lɛ nyɩ na tɩɛrɩ kɛ́ nyɩ ɩ a na gel nyɩ nɩ pʋɔ.

³²Bʋ̃ʋ n'ʋ vɛ̃, a bɛlɩ dem na bɛ bãw bom a zuru mɩ́ kpɛmɛ na, ɛ́ bɛ mɩ́ kpi a bɛ zu-kpɛ̃w kũu. A dãbole mɩ́ vʋʋrɛ na ɛ́ bɛ tɛr tɩɛrʋ ɛ, a mɩ́ wa n a bɛ loba.

³³Ɛcɛ sob nɛ na bɛrɛ wone mɛ̃ a kʋ̃ bãw damnʋ ɛ, ʋ na vʋʋrɛ nɩ zoom ɛ́ bɛ tɛr a kpɩɛrʋ dɛ̃bɩ̃ɛ ɩ.»