Read Dagara, Northern Zʋkpaɩ 21 Bible Online

Zʋkpaɩ 21 - Dagara, Northern bible

Zʋkpaɩ 21

¹A nãà socir ɩ na mɛ̃ kʋ̃ɔ na zɔrɛ a Sore nuru pʋɔ a. A Sore mɩ́ ɩ na ʋ cere be ʋ na bɔbr'a.

²Ŋa za mɩ́ tɩ́ɛrɛ na k'aa ʋ ɩb tori na, ɛcɛ a Sore n'ʋ mɩ́ jɛl a socie.

³Fʋ na tuur a mɩnʋ nɩ a lɛ-na-tu-sɔr-a, alɛ n'a a Sore nɔnɛ zuo a bagɛ.

⁴A jɩɛlʋ, a pɔ̀l-ɩb, alɛ n'a wule a nɩ-faar yel-bier.

⁵Sob nɛ na mɩ́ ƴãw fãw cɔbrɩ a lɛ ʋ na na ɩ a mɩ́ wa kpɛ n naalʋ. Ɛcɛ sob nɛ na mɩ́ paw a ɩb ƴãw zuo a mɩ́ wa bãw nɩ nã́w.

⁶Bɛlɩ dem na mɩ́ ŋma a ziri kpɛ naalʋ a ɩ n nɩbɛ na wɩɛr a kũu pʋɔ a. Bɛ mɩ́ páw nɩ bome na bɛ tɛr pɛr ɛ́ bɛ cɛlɛ a.

⁷A nɩ-faar po-to-fãw-ɩb mɩ́ bɔr'ɩ bɛ na. Bʋ̃ʋ n'ʋ vɛ̃, bɛ bɛ mɩ́ sàw na ɩ a lɛ-na-tu-sɔr-a ɩ.

⁸A nɩ-kʋrɛ ɩb mɩ́ gõgoli na, ɛcɛ a nɩ-vla ɩ-ɩrɩ mɩ́ tori na.

⁹A yẽw gaa sa fʋ na na lãw kpɩɛr'ɩ pɔw-nɔ-haarʋ sob a.

¹⁰A faa maalʋ tɛwr tɩ́ɛrʋ n'a be a nɩ-faa zie, ʋ bɛ zɔrɛ a ʋ bá tɔr za nɩbaalʋ ɛ.

¹¹Bɛlɛ wa kpãa a nɩ-ɩ-laarɛ a, a nɩr ʋl na bɛ bãw bom za a mɩ́ lɩɛb'ɩ yã-bãwnɛ. Bɛlɛ wa wul yã-bãwnɛ bom a, ʋ mɩ́ maalɩ ʋ na.

¹²A nɩ-mɩŋa mɩ́ piwre nɩ a nɩ-faar yir, ʋ mɩ́ dá bɛ na ƴãw a kpɩɛrʋ pʋɔ.

¹³Nɩr wa fur a ʋ tobe a lɛn daar a bãbàal na kone bʋɔlɛ a, ʋ mɩ̀ kʋ̃ páw sɔwfʋ a lɛn daar ʋlɛ mɩ́ wa bʋɔlɛ a ɩ.

¹⁴A bom fʋ na sɔwlɩ kʋ̀ nɩr a ɓãanɛ nɩ suur. A bom fʋ na ƴãw zaa zoom nɩr bʋ̃-zʋbɛ pʋɔ a mɩ́ ɩ na a su-tʋlʋ kpãkpã baarɩ.

¹⁵A lɛ-na-tu-sɔr-a tub mɩ́ ɩ n nʋ̃ɔ̀ a nɩ-mɩŋa zie, ɛ́ ɩ pʋl-vʋ̃ɔ a yel-fa-maalɛ zie.

¹⁶Nɩr wa bɛr a tɩɛr-vla sɔ́r a, ʋ na cen nɩ fɔ̃w tɩ lãw nɩ a kũuni.

¹⁷Nɩr na nɔnɛ nʋ̃ɔ̀ wob a kʋ̃ tɛr bom za ɩ. Sob nɛ na nɔnɛ k'ʋʋ mɩ́ dɩ kɛ́ nyũ a kpɛ a kʋ̃ kpɛ naalʋ towtow ɛ.

¹⁸A nɩ-faar na lɩɛr'ɩ a bɛlɩ dem nyɔ-vʋʋrʋ na vɩɛl ɛ́ tori a nyɛ̃ a kpɩɛrʋ.

¹⁹Fʋ̃ʋ kpɩɛr wɛja-kpalɛ pʋɔ a sa fʋ na na lãw kpɩɛr'ɩ pɔw na nɔnɛ zɛbr nɩ suur nyɛ́b a.

²⁰Na-bʋ̃-yúor nɩ naalʋ n'a be a yã-bãwnɛ yir pʋɔ, ɛcɛ a dãbol sob mɩ́ sãw nɩ a ʋ dem bɛr.

²¹Nɩr na tu a nɔ̃wfʋ ɩb nɩ a pùor-bɛ-lɛbrʋ pùor a na páw nɩ nyɔ-vʋʋr-wogo, mɩnʋ nɩ ƴãwfʋ.

²²Yã-bãwnɛ na tʋ̃ɔ́ na zɛb de a tẽ-kpɛ̃ɛ bɛ na cɔbrɩ ʋ kpɛmɛ a, ɛ́ dá a dacine al ƴãw a tẽw dem na tɩ ƴãw a bɛ tɩ́ɛrʋ a lɔb.

²³Nɩr na maal tɛr a ʋ nʋɔr nɩ a ʋ zɛl a gù n ʋ tʋɔra a kpɩɛrʋ ƴãw.

²⁴Nɩr na ɩrɛ nyɔka-ɩb nɩ pɔ̀l-ɩb a mɩ́ ɩrɛ nɩ bom za laar. A ʋ pɔ̀lʋ mɩ́ sãá nɩ kpɩlɩlɩ a ʋ ɩb za pʋɔ.

²⁵A ƴã-tuo sob kpiir'a ʋ na kʋ̃ tʋ̃ɔ́ páw a ʋ bʋ̃-bɔbrɩ a ƴãw. Bʋ̃ʋ n'ʋ vɛ̃, a ʋ nuru bɛ bɔ tome ɩ.

²⁶A bibi-ɓil za a, a ʋ mimir mɩ́ zaalɛ nɩ a ʋ taabɛ dem ƴãw! Ɛcɛ a nɩ-mɩŋa mɩ́ tɩr'a bɛ tɩ gbab bom bin ɛ.

²⁷A nɩ-faar bàwr ɩ n bʋ̃-faa faa, bɛ na baa mɩ́ maalɩ ʋ nɩ tɩ́ɛrʋ na bɛ vɩɛl a.

²⁸A dãsɩ-ziri sob na kpi na, ɛcɛ nɩr na bãw a bɛr-wob a na tɛr'ɩ sɔ́r mɩ́ ƴɛ̀r kʋralɛ.

²⁹A nɩ-faa mɩ́ sãá na mɛ̃ bom bɛ damnɛ ʋ a. Ɛcɛ a nɩ-dẽdẽ bɛ bãw bʋnʋ a ʋ cenu pʋɔ ɩ.

³⁰Yã-bãwfʋ kãw za, yã kãw za nɩ tɩ́ɛrʋ kãw za bɛ ɩ bom a Sore niŋé ɩ.

³¹Bɛ mɩ́ cɔbr'ɩ a wie a zɛbr bibir ƴãw, ɛcɛ a Sore n'ʋ mɩ́ ɩ bɛ zɛb tʋ̃ɔ́.