Read Dagara, Northern Zʋkpaɩ 22 Bible Online

Zʋkpaɩ 22 - Dagara, Northern bible

Zʋkpaɩ 22

¹Yo-vla sa tɛra yaga. A nɩbɛ na nɔnɛ fʋ a vɩɛl'a zuo a salm-zɩɛ nɩ a salm-pla.

²Bom ŋa n'ʋ a nãà nɩ a nã́w sob lãw, a Sore n'ʋ maalɩ bɛ za ayi.

³A kpɩɛrʋ wa waar a, a nɩr na bãw maal-ɩb a mɩ́ sɔwl'a. Ɛcɛ a bɛlɩ dem na bɛ bãw bom a mɩ́ cãà na lo a bɛ sɔ́r tɩ páw a tuo.

⁴A nɩr na siwre ʋ tʋɔra a mɩ́ tɛr'ɩ a Sore zɔba. Ʋ mɩ́ kpɛ n naalʋ, tɛr yúor ɛ́ vʋʋrɩ cɛlɩ.

⁵Gʋʋr nɩ bɛrɩ n'a mɩ́ pàw a nɩsaal-gõlõgõlõ sɔ́r. Nɩr na bɔbr a nyɔ-vʋʋrʋ a na zãá nɩ ʋ na.

⁶Ɩ a bibile tɛr mil-vɩɛlɩ a pɛr-tib daar. Ʋ na tɩ kor'a ɛ́ cãà tɛr a.

⁷A nãà mɩ́ so nɩ a nan dem. Bɛlɩ dem na tɛr samɛ a mɩ́ ɩ n a bɛlɩ dem na pɛ̃w bɛ a gbãgbaar.

⁸Sob nɛ na ɩrɛ a ɩ-ɩrɩ na bɛ tu mɩnʋ a yàarɛ pàwr a ziir za a nãà wa wob'ɩ a kpɩɛrʋ.

⁹Nɩr na tɛr nɩsaalʋ a na nyɛ̃ nɩ maalʋ, bʋ̃ʋ n'ʋ vɛ̃, ʋ mɩ́ ɩ n a ʋ bʋ̃-dɩrɩ kʋ̀ a nã́w sob.

¹⁰Diw a bɛlɩ dem na mɩ́ ɩrɛ bom za laar a, ɛ́ a zɛb-taa na tɛw na. Taw-taa nɩ tʋ-taa kʋ̃ cãà be ɩ.

¹¹Sob nɛ na nɔnɛ a soci-parpar sob ɛ́ mɩ́ ƴɛ̀rɛ nɩ nɔ̃wfʋ a, a ʋ bá mɩ́ n'ɩ a nãà.

¹²A Sore mɩ́ gù n a bãwfʋ na ɩ sɩza a, ɛcɛ ʋ mɩ́ ŋmɛ n a nɩsaal-libelibe ƴɛ̀rʋ lɔb.

¹³A ƴã-tuo sob mɩ́ yel'a: «Gbẽw be n a yẽw! Ʋ na kʋ mɛ̃ nɩ a sɔ́r zu!»

¹⁴A pɔw-pɩ̃ɔ-yel-maalbɛ ƴɛ̀rʋ ɩ n bɛra na bɛ vɩɛl a. Bɛlɩ dem a Sore na bɛ de a bɛ yele a na lo n a pʋɔ[34].

¹⁵A bibiir nɔnɛ nɩ a dãbolu. A dabɔl na kpãànɛ bɛ a na ɩ na bɛ bɛr ʋ.

¹⁶Nɩr na dɔwrɛ nã́w sob a, ʋ na ƴãw ʋ nɩ naalʋ pʋɔ a baarʋ daar[35]. Nɩr na kʋ̀rɛ nãà bom a, ʋ na lɩɛb'ɩ nã́w sob a baarʋ daar.

¹⁷Ƴãw tobr, bɛr wõ a yã-bãwnbɛ ƴɛ̀rʋ, ɛ́ cɛlɛ a ɩ̃ bãwfʋ zie.

¹⁸A na ɩ b'ɩ nʋ̃ɔ̀ fʋ na na tɛr a tɩ́ɛrɛ a fʋ socir pʋɔ ɛ́ a be a fʋ nʋɔrɩ́ kʋralɛ a.

¹⁹Ɩ̃ bɔbr'a kɛ́ fʋ ƴãw a fʋ tɩ́ɛrʋ a Sore ƴãw, alɛ n'a so ɩ̃ na ɩ kɛ̀ fʋ mɩ̀ bãw a a dɩ̃a tɔr za.

²⁰Nyɛ̃, ɩ̃ sɛb'ɩ zʋkpaɩ lɩzɛr'ɩ pie na wule yã ɛ́ tɩrɛ bãwfʋ a, a fʋ ƴãw,

²¹k'ɩ̃ɩ wul fʋ fʋ mɩ́ sɩrɩ ƴɛ̀r a tori. Nɩr wa tone fʋ a, fʋ na ɩ n nɩ-tona na mɩ́ yel a yel-mɩŋa a.

²²Ta faa a bãbàal bome ɩ, bãbàal'ʋ. Nɩr na bɛ tɛr sõwne a, ta ƴɛ̀r dĩ nɩ ʋ a ƴɛ̀rʋ-dɩb zie ɩ.

²³Bʋ̃ʋ n'ʋ vɛ̃, a Sore na ƴɛ̀r'a kpɛ bɛ. Ʋ na de nɩ a bɛlɩ dem za nãà wa fa a bɛ bʋ̃-tɛrɩ za a nyɔ-vʋʋrʋ.

²⁴Ta nyɔw nɩ suur sob báalʋ ɛ. Ta tuur nɩr na bɛ mɩ́ yaa kɛ́ nyɛ̃ suur a ɩ.

²⁵Alɛ bɛ ɩ lɛ, fʋ na cɔwr'ʋ na lo bɛra pʋɔ.

²⁶Ta ŋmɛ nyãa yel kɛ́ fʋ so nɩ nɩ-yũo samɛ ɩ[36].

²⁷Bʋ̃ʋ n'ʋ vɛ̃, fʋ̃ʋ bɛ wa tɛr a na ya a, bɛ na de nɩ a fʋ gado tɔr za.

²⁸A póru tʋr-bɔwrɩ kʋsɛbɛ a fʋ sãàkʋm-kore na ƴãw a, taa vire a ƴãwn zi-yoru ɛ.

²⁹Jɩ́r a nɩr na bãw a ʋ tome vla a. Ʋ na tʋ̃ɔ́ na cen tɩ kpɛ tome a nãà zie, ɛ́ ta cãà be a tõ-tonbɛ a nɩbɛ na bɛ bãw a sɔgɔ ɩ.