Read Dagara, Northern Zʋkpaɩ 28 Bible Online

Zʋkpaɩ 28 - Dagara, Northern bible

Zʋkpaɩ 28

¹A nɩ-faa mɩ́ zɔrɛ na, nɩr za saa bɛ diwr ʋ a, ɛcɛ a nɩ-mɩŋa mɩ́ bɛr'ɩ tɩ́ɛrʋ mɛ̃ gbẽw-pɔl a.

²Tẽw wa dam a, a nɩ-bɛrɛ mɩ́ yãwmɛ na, ɛcɛ nɩr na tɛr yã ɛ́ bãw bom wa be be a, a yele mɩ́ lɛb'a tuur a tub.

³Nã́w sob na dɔwrɛ a bãbàalbɛ a ɩ na mɛ̃ saa na mɩ́ wa sãw a bʋ̃-dieri a.

⁴Bɛlɩ dem na bɛ tuur a wulu a mɩ́ mʋʋrɛ nɩ a nɩ-faar. Ɛcɛ a bɛlɩ dem na tuur ʋ a mɩ́ zɛbr'ɩ bɛ na.

⁵A nɩ-faar bɛ mɩ́ bãw a lɛ-na-tu-sɔr-a pɛr ɛ, ɛcɛ a bɛlɩ dem na mɩ́ bɔbr a Sore a mɩ́ bãw nɩ bom za pɛr.

⁶Nã́w sob na tɛr ɩ-ɩrɩ na tori a sa n nɩr na tuur sɔr-gõlõgõlõ a, ʋlɛ saa kpɛ naalʋ a.

⁷Nɩr na tuur a wulu a ɩ n bibile na tɛr yã a, nɩr na lãw cere nɩ a nɩ-faar a ƴãwnɛ nɩ a ʋ sãà vĩ.

⁸Nɩr na zɔrɛ a bãbàalbɛ nɩbaalʋ a, ʋ na so nɩ a nɩr na kpɛ naalʋ ʋ na pɛ̃wnɛ nɩbɛ libie dier'ɩ dɔwlɛ yaga a tɛra.

⁹Nɩr na fùr a ʋ tobe a wulu bɛr-wob ƴãw a, a ʋ puoru tɔr za ɩ n bʋ̃-faa na bɛ maal'ɩ wob a.

¹⁰Nɩr wa tɛr nɩsaal-dẽdẽ mɩnɛ tu n sɔr-faa a, ʋ na lo n a ʋl mɩŋa bɔw ʋ na tuw a pʋɔ. Ɛcɛ nɩbɛ na bɛ tɛr sãwna a na so a nʋ̃ɔ̀.

¹¹A tɛra sob mɩ́ nyɛ̃ na ʋ ɩ yã-bãwnɛ, ɛcɛ nã́w sob na tɛr yã a, na wul'ɩ a ʋ ŋmɛ̃a.

¹²A nɩ-mɩn wa zɛb tʋ̃ɔ́ a, yúor mɩ̀ n'ʋ a nɩbɛ za zie. Ɛcɛ a nɩ-faar wa nɛbɛ so a zie a, nɩr za mɩ́ sɔwlɛ na.

¹³Nɩr na sɔwlɛ a ʋ sãwna bɛrɛ a, a ʋ yel kãw za kʋ̃ maal ɛ, ɛcɛ nɩr na bãw a ʋ sãwna, ɛ́ zawr'ʋ bɛr a, ʋ na páw nɩ suur-dɩ-kʋ̀b.

¹⁴Zu-nʋ̃ɔ̀ sob'ɩ a nɩr nɛ na zɔrɛ a faa maalʋ dɛ̃bɩ̃ɛ kʋralɛ a, ɛcɛ zu-kpɛ̃w sob na bãw nɩ kpɩɛrʋ.

¹⁵Nɩ-kpɛ̃ɛ-po-to-sob na dɔwrɛ nɩbɛ na ɩ bãbàalbɛ a ŋmɛ̃ na mɛ̃ gbẽw na ùore a, mɛ̃ wɛ-dʋ̃-faa bɛ na bʋɔlɛ ursɩ a na ƴaw yi a.

¹⁶Nɩ-kpɛ̃ɛ na bɛ tɛr yã a, mɩ́ so a fáb fárɛ. Nɩr na bɛ nɔnɛ a nyãnyu-bome a na vʋʋr'a cɛlɩ.

¹⁷Nɩ-kʋrɛ na zɔ na tɩ ta a ʋ yàa-bɔw nʋɔr: nɩr za taa nyɔwr ʋ tɛrɛ ɩ.

¹⁸Sob nɛ a nyɔ-vʋʋrʋ na tori a na nyɛ̃ nɩ faafʋ. Ɛcɛ sob nɛ a nyɔ-vʋʋrʋ na tu sɛ́ɛ ayi a na bɔr'ɩ a kãw nɛ za zu.

¹⁹Nɩr na kʋɔr a ʋ púo a na mɩ́ dɩ na tɩw, nɩr na zɔrɛ tuur yele na bɛ tɛr pɛr a na be n nã́w pʋɔ.

²⁰A nɩ-dẽdẽ na páw nɩ maalʋ yaga, nɩr na paw fɔ̃w kpɛ naalʋ a na nyɛ̃ nɩ dɔwrʋ bibir kãw.

²¹A owru bɛ vɩɛl ɛ. Ɛcɛ nɩbɛ bɛ mɩnɛ na tʋ̃ɔ́ na bɛ mɩ́ tu a yel-mɩnʋ ɛ, bʋ̃-dɩ-cãpile kãw ƴãw.

²²Nɩr na nyùur'ɩ a ʋ taabɛ a bɛ bʋ̃-tɛrɩ ƴãw a, ʋ mɩ́ zɔrɛ na tuur a naalʋ ɛ́ bɛ bãw kɛ́ nãw-woro na lo n a ʋ zu ɛ.

²³Nɩr na wule nɩr a ʋ sãwna a, ʋ mɩ̀ na bãw nɩ a sob nɛ pʋ-pɩɛlʋ zuo nɩr na tɛr nɔ-kãá a ʋ zie a.

²⁴Nɩr na zure a ʋ sãà nɩ a ʋ mã ɛ́ mɩ́ yel kɛ́ yel-bier bɛ n'ʋ a, ʋ bɛ sa nyãnyu-nɩ-kʋrɛ ɩ.

²⁵Nɩr na bɔbr bome bɛ tɛr sɛwfʋ a mɩ́ wa n nɩ zɛb-taa, ɛcɛ sob nɛ na ƴãw a ʋ tɩ́ɛrʋ a Sore ƴãw a na kpɛ n naalʋ.

²⁶Dãbol'ɩ a sob nɛ na mɩ́ ƴãw a tɩ́ɛrʋ a ʋl mɩŋa ƴãw a, ɛcɛ sob nɛ na ɩrɛ a ʋ ɩb nɩ yã-bãwfʋ a na nyɛ̃ nɩ faafʋ.

²⁷Nɩr na kʋ̀rɛ bom a nan dem a bɛ be na bɔ bom gù ɛ. Ɛcɛ sob nɛ na mɩ́ zawrɩ na jɩ́r bɛ kaa a, ŋmɛ-ƴãw yaga na páw ʋ na.

²⁸A nɩ-faar wa so a zie a lɛn daar a, ŋa za mɩ́ sɔwlɛ na. Bɛlɛ wa kpi a, a nɩ-mɩn mɩ́ yãwmɛ na dɔwlɛ.