Read Dagara, Northern Zʋkpaɩ 3 Bible Online

Zʋkpaɩ 3 - Dagara, Northern bible

Zʋkpaɩ 3

¹Ɩ̃ bie e, taa wa yiire a ɩ̃ wulu bɛrɛ ɩ, tɛr a ɩ̃ nɛ-ƴãwnɩ a fʋ socir pʋɔ.

²Fʋ̃ʋ wa maal tɛr a a, fʋ na vʋʋr'a cɛlɩ, ɛ́ fʋ na tɛr'ɩ ƴã-ɓaarʋ.

³A nɔ̃wfʋ nɩ a pùor-bɛ-lɛbrʋ, a be a fʋ zie kʋralɛ, 'lẽ a ƴãw a fʋ kɔkɔrɩ́, sɛb a ƴãw a fʋ socir pʋɔ.

⁴Lɛ n'a a Naaŋmɩn nɩ a nɩsaalbɛ na nɔnɛ fʋ, ɛ́ fʋ ɩ nɩr.

⁵Ƴãw a fʋ tɩ́ɛrʋ za a Sore ƴãw, taa wa ɩrɛ ƴãwn a fʋ mɩŋa yã ƴãw ɛ.

⁶Bãw ʋ a fʋ yele za fʋ na maalɛ a pʋɔ, ʋʋ na wule fʋ nɩ a cenu.

⁷Ta tɩ́ɛrɛ kɛ́ fʋ ɩ n yã-bãwnɛ ɩ, nɩ̃ɛ zɔrɛ a Sore, ɛ́ gùr pùor cɔw a yel-faa[6].

⁸A na sanɩ nɩ a fʋ ƴã-gan ɛ́ kʋ̀ b fãw.

⁹Ƴãwnɛ a Sore nɩ a fʋ bʋ̃-tɛrɩ, mɩ́ de a fʋ kɔb bʋ̃-dan kʋ̀ ʋ.

¹⁰Lɛ n'a a bʋ̃-bie na mɩ́ paalɩ a fʋ boge, ɛ́ a fʋ divɛ̃ ʋr bɛ nyɛrɛ ƴãwfʋ zie ɩ.

¹¹Ɩ̃ bie e, taa zawrɛ a Sore kpãàfʋ ɛ, fʋ̃ʋ wa sãw ʋ yere fʋ a, ta nyɛ̃ a ɩ faa ɩ.

¹²Bʋ̃ʋ n'ʋ vɛ̃, a Sore mɩ́ yere nɩ a sob nɛ ʋ na nɔnɛ a, mɛ̃ a lɛ sãà na mɩ́ yere a ʋ bi-nɔna a[7].

¹³Zu-nʋ̃ɔ̀ sob'ɩ sob nɛ na nyɛ̃ a yã-bãwfʋ ɛ́ páw a yã a!

¹⁴Bʋ̃ʋ n'ʋ vɛ̃, a ʋ tɛrʋ sa n a salm-pla tɛrʋ, ɛ́ a ʋ tɔnɛ sa a salm-zɩɛ.

¹⁵A yã-bãwfʋ ɩ n bʋ̃-sɩza zuo lɛw-vɩɛlɩ, ɛ́ bʋ̃-bɔbra kãw za kʋ̃ tʋ̃ɔ́ man taa nɩ ʋ ɛ[8].

¹⁶Ʋ mɩ́ sõw nɩ a nɩsaal ʋ vʋʋrɩ cɛlɩ, ʋ mɩ́ kʋ̀ ʋ nɩ naalʋ nɩ yúor.

¹⁷Ʋ mɩ́ tɛr ʋ na lo n sɛ́ɛ na vɩɛl a, ʋ cere ɛ́ bɛ bãw damnʋ ɛ.

¹⁸A yã-bãwfʋ ɩ n nyɔ-vʋʋrʋ tɩɛ a bɛlɩ dem na nyɔw ʋ a zie, ɛ́ zu-nʋ̃ɔ̀ dem n'ɩ a bɛlɩ dem na nyɔw ʋ tɛr a[9].

¹⁹A Sore yã-bãwfʋ n'ʋ ʋ ír'ɩ a tẽw, a ʋ yã n'a ʋ ɩ n a salom ʋ kpɛmɛ àr.

²⁰A ʋ bãwfʋ zũú n'a a tẽsɔw pile kʋ̃ɔ tɛ wa yi, ɛ́ a zũzuwe mɩ́ bɛr a saa ʋ wa.

²¹Ɩ̃ bie e, a maal-ɩrɛ nɩ a yele-jielu a, a taa wa zãánɛ nɩ fʋ ɛ: tuur a.

²²A na sõw fʋ na fʋ tɛr nyɔ-vʋʋr-vla.

²³Lɛ n'a fʋ na mɩ́ ɓãa ƴãw cere, ɛ́ a fʋ gbɛ́ɛ bɛ sarɛ ɩ.

²⁴Fʋ̃ʋ wa ganɛ a, pʋl-vʋ̃ɔ kʋ̃ tɛr fʋ ɛ, ɛ́ fʋ̃ʋ wa gã baarɩ a, fʋ na gúr'a wõ nʋ̃ɔ̀.

²⁵A pʋl-vʋ̃ɔ kʋ̃ mɩ́ ùr tɛr fʋ ɛ, ɛ́ nɩ-faar kʋ̃ mɩ́ zɛbr'ɩ fʋ ɛ.

²⁶Bʋ̃ʋ n'ʋ vɛ̃, a Sore na mɩ́ gù b'a, ɛ́ kʋ̃ sàw fʋ lo bɛra pʋɔ ɛ.

²⁷Ta zawrɩ nɩr a na fɛrɛ a maalʋ ɛ, fʋ̃ʋ na na tʋ̃ɔ́ maal'ʋ a.

²⁸Fʋ̃ʋ wa tɛr a bom nɛ a dɩ̃a a, fʋ̃ʋ ta yel a fʋ tɔ: «Cen tɔl cen! Bio, ɩ̃ na kʋ̀ b'ɩ bom» ɛ.

²⁹A fʋ bá na bɛr tɩ̀ɛrʋ ɛ́ be a fʋ zie a, ta tɩ́ɛrɛ kɛ́ fʋ ɩ ʋ faa ɛ.

³⁰Ta zɛbr'ɩ nɩr zawlalɛ ʋlɛ bɛ wa ɩ bom a ɩ.

³¹Ta nyùur'ɩ nɩr na ɩrɛ po-to-fãw-ɩb a ɩ, ta cɔwrɛ a ʋ ɩ-ɩrɩ ɛ.

³²Bʋ̃ʋ n'ʋ vɛ̃, a Sore bɛ nɔnɛ a nɩ-faa ɩ, ɛcɛ ʋ ɩ n a nɩ-dẽdẽ mɩnɛ bá.

³³A Sore mɩ́ ŋmɛ na ƴãw a nɩ-faar yir, ɛ́ maalɩ a nɩ-dẽdẽ mɩnɛ yir.

³⁴A Sore mɩ́ ɩ n a nɩ-ɩ-laarbɛ la, ɛcɛ, ʋ mɩ́ ɩrɛ nɩ nɔ̃wfʋ ɩb a su-siwri dem zie[10].

³⁵A yã-bãwnbɛ bom bɛ na na páw a n'ɩ a ƴãwfʋ, ɛ́ a dãbole dem ɩ a vĩ.