Read Dagara, Northern Zʋkpaɩ 4 Bible Online

Zʋkpaɩ 4 - Dagara, Northern bible

Zʋkpaɩ 4

¹Ɩ̃ bibiir i, nyɩ bɛrɛ wone yã sãà na wule a. Nyɩ cɛlɛ be ɛ́ nyɩ na zanɩ nɩ a yã tɛrʋ.

²Bʋ̃ʋ n'ʋ vɛ̃, bãwfʋ na ɩ sɩza a n'a ɩ̃ kʋ̀rɛ nyɩ, nyɩ taa zawrɛ a ɩ̃ wulu bɛrɛ ɩ.

³A mãa mɩ̀ a, ɩ̃ mɩ̀ tɩ ɩ n bi-vla a ɩ̃ sãà zie. A ɩ̃ mã tɩ nɔ̃w mɛ̃ nɩ yaga za mɛ̃ bi-been tẽtẽ a.

⁴A ɩ̃ sãà tɩ wul mɛ̃ nɩ à ŋá: «Tɛr a ɩ̃ ƴɛ̀rʋ a fʋ socir pʋɔ vla, tuur a lɛ ɩ̃ na yere kʋ̀rɛ fʋ a, ɛ́ fʋ na vʋʋrɛ na.

⁵Ƴãw fãw tɛr a yã-bãwfʋ nɩ a yã. Taa yiire a ɩ̃ ƴɛ̀rʋ bɛrɛ ɩ, ɛ́ taa zãánɛ nɩ a ɩ.

⁶Taa zawrɛ a yã-bãwfʋ bɛrɛ ɩ, ʋʋ na gùre fʋ na. Nɔnɛ ʋ, ʋʋ na kaarɛ nɩ a fʋ zie.

⁷A yã-bãwfʋ tib zie n'ɩ kɛ́ fʋ ƴãw fãw tɛr a yã. Tɩr a alɩ bome nɛ za fʋ na tɛr a tʋ̃ɔ́ páw a yã.

⁸Weri a yã-bãwfʋ fɩɩrɩ tɛr, ʋʋ na ɩ na fʋ ɩ kpɛ̃ɛ. Fʋ̃ʋ wa were ʋ a, ʋ na ɩ na fʋ tɛr yúor.

⁹A fʋ zie a, ʋ na ɩ na mɛ̃ pɩ̃ɛmɛ na vɩɛl vɩɛl a, mɛ̃ nãà-kpawɔ-yúor a.»

¹⁰Ɩ̃ bie e, bɛr wõ m. Sàw de a ɩ̃ ƴɛ̀rʋ, ɛ́ fʋ na vʋʋr'a cɛlɩ.

¹¹Ɩ̃ wule fʋ nɩ a yã-bãwfʋ sɔ́r, ɩ̃ wule fʋ nɩ lɛ fʋ na na tʋ̃ɔ́ vʋʋrɛ mɛ̃ nɩ-mɩŋa a.

¹²À ŋá n'a a fʋ cenu na ɩ mɔlɛ kʋ̀ b, ɛ́ fʋ̃ʋ saa wa zɔrɛ a, fʋ kʋ̃ ŋmɩɛr gbɛ́ɛ kãkarɛ ɩ.

¹³Tɛr a wulu bɛ na wul fʋ a kpɛ̃w kpɛ̃w za, taa zawrɛ ʋ bɛrɛ ɩ. Maal tɛr ʋ, ʋ ɩ n a fʋ nyɔ-vʋʋrʋ.

¹⁴Taa cɔwrɛ a nɩ-faar ɩ-ɩrɩ ɛ, taa tuur a yel-fa-maalbɛ sɔ́r ɛ.

¹⁵Bɛr ʋ, taa tuur ʋ ɛ! Dɛ ʋ bɛr ɛ́ tɔlɛ.

¹⁶A nɩbɛ bɛ ŋa bɛ wa maalɩ yel-faa a, bɛ bɛ gúre ɩ. Bɛlɛ bɛ wa ɩ nɩr lo sãwna pʋɔ a, a gʋ̃ɔ mɩ́ zawrɩ bɛ na.

¹⁷Bʋ̃ʋ n'ʋ vɛ̃, a ɩ-faa n'ɩ a bɛ dɩb, ɛ́ a po-to-fãw-ɩb ɩ a divɛ̃ na mɩ́ kuoli bɛ a.

¹⁸A nɩ-mɩn nyɔ-vʋʋrʋ nɩ̃ɛ na ɩ mɛ̃ zi-wɛl-paala cãà na mɩ́ dɔwlɛ cere tɩ ta a mʋ̃tɔ̃-tuo a.

¹⁹A nɩ-faar nyɔ-vʋʋrʋ mɩ́ liw na mɛ̃ a tɩ̃ɩsɔw a. Bɛ bɛ mɩ́ bãw ʋlɩ bom nɛ ƴãw bɛ na na ŋmɛ a gbɛ́r a ɩ.

²⁰Ɩ̃ bie e, bɛrɛ wone a ɩ̃ ƴɛ̀rʋ, ƴãw tobr a yã ɩ̃ na wule fʋ a ƴãw.

²¹Taa yiire a bɛrɛ ɩ, maal tɛr a a fʋ socir pʋ̃ɔmɩ za.

²²Bʋ̃ʋ n'ʋ vɛ̃, a mɩ́ kʋ̀ n nyɔ-vʋʋrʋ nɩ ƴã-ɓaarʋ a bɛlɩ dem na sàw de a a.

²³Piwre a fʋ socir gãw bom za, bʋ̃ʋ n'ʋ vɛ̃, ʋlɛ n'ɩ a nyɔ-vʋʋrʋ yib zie.

²⁴Ta bɛr a fʋ nʋɔr ʋ ŋmarɛ ziri ɛ, ta manɛ a fʋ taabɛ yel-faar ɛ.

²⁵Mɩ́ càarɩ jɩ́r a nɩr, mɩ́ tori niwn jɩ́r a bom.

²⁶Mɩ́ tɩ́ɛrɩ ɛ́ bãw tĩ a bom, mɩ́ kaa ír sɛ́ɛ na bɛ tɛr bʋnʋ a.

²⁷Taa bɩ̀ɛrɛ dʋrʋ bɩɩ gʋba ɩ. Zãá nɩ a faa.