Read Dagara, Northern Zʋkpaɩ 5 Bible Online

Zʋkpaɩ 5 - Dagara, Northern bible

Zʋkpaɩ 5

¹Ɩ̃ bie e, cɛlɛ a ɩ̃ yã-bãwfʋ zie, ɛ́ ƴãw tobr a wulu a ɩ̃ yã na wule fʋ a ƴãw.

²Lɛ n'a fʋ na páwr tɔnɛ a ɩ̃ wulu pʋɔ, ɛ́ mɩ́ bãw a fʋ ƴɛ̀rʋ pɛr.

³Bʋ̃ʋ n'ʋ vɛ̃, a nɩ-yũo pɔw ƴɛ̀rʋ mɩ́ nʋmɛ na mɛ̃ sɩwr a, ɛ́ ɩ bàalʋ bàalʋ mɛ̃ kãá a.

⁴Ɛcɛ a baarʋ zie a, a mɩ́ tome na mɛ̃ lɔw a, ɛ́ dɩrɛ mɛ̃ zɛbr-sɔ-kpɛ̃ɛ na dɩrɛ a lowe a za ayi a.

⁵A pɔw ŋa ɩb wɩɛr'ɩ ʋ nɩ a kũu zie, ɛ́ a ʋ gbɛ-ceni siwr'ɩ ʋ a kpɩmɛ tẽw daadaa.

⁶Ʋ bɛ tuur a nyɔ-vʋʋrʋ sɔ́r ɛ, ʋ tuli nɩ a sɔ́r ɛ́ bɛ bãwnɩ a ɩ.

⁷Ƴɛrɛŋa a, ɩ̃ bie e, bɛrɛ wone a ɩ̃ ƴɛ̀rʋ, taa zawrɛ a yã ɩ̃ na wule fʋ a bɛrɛ ɩ.

⁸Zãá nɩ a pɔw ŋa tɔ, ɛ́ taa pɩɛlɛ a ʋ yir dɩ̃dɔr mɩ̀ ɛ.

⁹Alɛ bɛ ɩ lɛ, ʋ na sãw nɩ a fʋ yúor, ɛ́ sɩr na bɛ zɔrɛ nɩbaalʋ a sãw a fʋ nyɔ-vʋʋrʋ.

¹⁰Nɩ-sãanbɛ n'a na de a fʋ bʋ̃-tɛrɩ, ɛ́ nɩr fʋ na bɛ bãw a so a fʋ tome za tɔnɛ.

¹¹Ɛ́ a baarʋ daar a, a fʋ fãw za na baar'a, ɛ́ fʋ ùore mɛ̃ dʋ̃w a.

¹²Lɛ n'a fʋ na yel: «Ɩ̃ bɛ tɩ nɔ̃w a kpãàfʋ ɛ, ɩ̃ bɛ tɩ sàw a yelu bɛ na tɩ yere mɛ̃ a ɩ,

¹³ɩ̃ bɛ tɩ bɛr wõ a lɛ a ɩ̃ wul-wulbɛ na tɩ yere kʋ̀rɛ mɛ̃ a ɩ, ɩ̃ bɛ tɩ ƴãw tobr a bɛ wulu ƴãw ɛ.

¹⁴Ƴɛrɛŋa a, mãa n'ɩ ŋa kpɩɛrʋ tɛr yaga za, ɛ́ a cɛ blã a ɩ̃ nɩbɛ lãw na jɛ m bɛr.»

¹⁵A fʋ pɔw ɩ na mɛ̃ kʋ̃ɔ-walwal bul-nʋɔr a. Nyúur a bul-nʋɔr ŋa kʋ̃ɔ!

¹⁶Ta bɛr a fʋ kʋ̃ɔ a gbɔlɛ yire yẽw nɩ a dàa pʋɔ ɩ.

¹⁷Ʋ́ be fʋ̃ʋ yõ tẽtẽ ƴãw, ta ɩ fʋ̃ʋ nɩ nɩ-sãanbɛ lãw ɛ.

¹⁸Paal'ʋ nɩ nʋ̃ɔ̀, nyɛrɛ a nʋ̃ɔ̀ nɩ a fʋ dɛpaalʋ pɔw.

¹⁹A fʋ pɔw tɛr'ɩ a nɔ̃wfʋ mɛ̃ wala a, ɛ́ pɔl mɛ̃ mɔlʋ a. Ɩ k'ʋ wone nʋ̃ɔ̀. A ʋ ƴã-gan, ʋ mɩ́ ƴãw fʋ nʋ̃ɔ̀ kʋralɛ! A ʋ nɔ̃wfʋ, ʋ mɩ́ ƴãw fʋ yãyaar kʋralɛ!

²⁰Ɩ̃ bie e, bʋ̃ʋ n'ʋ so fʋ bɛr fʋ tʋɔra kʋ̀ nɩ-yũo pɔw, ɛ́ bɔbr a nʋ̃ɔ̀ pɔw fʋ na bɛ bãw a zie?

²¹A Sore nyɛrɛ nɩ nɩsaal za ɩb, ʋ jɩ́rɛ nɩ a ʋ ɩ-ɩrɩ been been.

²²A nɩ-faa ɩ-faar tɛɛ za bɛra n'ʋ na nyɔw ʋ, ɛ́ a ʋ yel-bier mie lɩr ʋ tɛr.

²³Ʋ na kpi na, ʋ na bɛ páw a wulu a. Ʋ na bɔr'a, a ʋ dãbolu na zuo ʋ a ƴãw.