Read Dagara, Northern Zʋkpaɩ 7 Bible Online

Zʋkpaɩ 7 - Dagara, Northern bible

Zʋkpaɩ 7

¹Ɩ̃ bie e, taa yiire a ɩ̃ ƴɛ̀rʋ bɛrɛ ɩ, tuur a lɛ ɩ̃ na yere kʋ̀rɛ fʋ a.

²Fʋ̃ʋ wa bɔbr kɛ́ fʋ vʋʋrɛ a, fʋ̃ʋ maal tɛr a ɩ̃ nɛ-ƴãwnɩ nɩ a ɩ̃ wulu mɛ̃ a fʋ na-bʋ̃-tuo tuo a.

³'Lẽ a ƴãw a fʋ nobie ƴãw, sɛb'a ƴãw a fʋ socir pʋɔ.

⁴De a yã-bãwfʋ ʋ ɩ mɛ̃ a fʋ yeepuule tɔr za a, ɛ́ a yã ɩ mɛ̃ a fʋ sɛn a.

⁵A na gù b'ɩ a nɩ-yoru pɔw ƴãw, a pɔw fʋ na bɛ bãw a nɔ-kãá ƴãw.

⁶Bibir kãw, ɩ̃ tɩ àr'ɩ a ɩ̃ yir tokoro vʋɔr ƴãw jɩ́rɛ a yẽw.

⁷Ɩ̃ tɩ nyɛ̃ nɩ pɔlbili na bɛ bãw bom za a, ɩ̃ɩ mɩ́ tɩ nyɛ̃ nɩ a bɛ pʋɔ pɔlbil-vɛlvɛl na bɛ tɛr yã a.

⁸Ʋ tɩ tɔlɛ nɩ a yɛ-yɛrbɛ sɔ́r zu, pɩɛlɩ a zie ʋl a pɔwbɛ bɛ ŋa ƴen sob na kpɩɛr a, ɛ́ de a ʋ yir sɔ́r.

⁹Zaanʋɔra tɩ n'a, a zie na mɩ́ wa sɔbr, ɛ́ a lige pàwr a.

¹⁰A pɔw tɩ yi na tuore ʋ, su a suuru mɛ̃ pɔw-yɛm a, ɛ́ a tɩɛrʋ bɛ ɩ dẽdẽ ɩ.

¹¹A pɔw ŋa tɩ kpɛ n socir ɛ́ bɛ zɔrɛ vĩ towtow ɛ. Ʋ bɛ tɩ tʋ́ɔr zɩnɛ a ʋ yir ɛ.

¹²Ʋlɛ n'ɩ ŋan a sɛ́ɛ pʋɔ, ʋlɛ n'ɩ ŋan a nɩbɛ tuor-taa zie, ʋ be n a gõgone za pʋɔ piwre.

¹³Ʋ nyɔw nɩ a pɔlbile weri, ɛ́ nyɔw nyãa yel ʋ:

¹⁴«Ɩ̃ tɩ yel'ɩ a Naaŋmɩn k'ɩ̃ɩ na maal'ɩ barka bàwr kʋ̀ ʋ, ɩ̃ɩ maal'ʋ nɩ a dɩ̃a[12].

¹⁵Alɛ n'a so ɩ̃ yi a fʋ tuoru k'ɩ̃ɩ bɔ b, ɩ̃ɩ nyɛ̃ b'a.

¹⁶Ɩ̃ cɔbr'ɩ a ɩ̃ gado nɩ gan-vaarɩ bʋʋrɛ bʋʋrɛ, nɩ gado zu gán bɛ na wob'ɩ Eziptɩ tẽw lɛ̃ pɛnɛ a.

¹⁷Ɩ̃ ŋmɛ n mɩ́ɩ̀r parfɛ̃ na nyùur vla vla a ƴãw a ɩ̃ bʋ̃-gana zu.

¹⁸Wa, tɩ na lãw nɩ taa a nɔ̃wfʋ pʋɔ tɩ vɩɛ a zie, wa tɩ wa lãw wõ nʋ̃ɔ̀!

¹⁹Bʋ̃ʋ n'ʋ vɛ̃, a ɩ̃ sɩr bɛ be a yir ɛ, ʋ yi n sɔr-zãána.

²⁰Ʋ tɛr'ɩ libi-yaga cen nɩ, ɛ́ na lɛb wa a cuw-pla daar.»

²¹A pɔw ŋa kpɛ n yã yaga. Ʋ ƴɛ̀r'a tʋ̃ɔ́ a pɔlbile nɩ a ʋ nɔ-kãá tɛr ʋ cere nɩ.

²²Lɛ n'a ʋ dɛ tuur a pɔw mɛ̃ náab na cere a ʋ kʋb zie a. A nɩr ŋa cere nɩ a ʋ dɔwrʋ zie mɛ̃ gaso nɩr a,

²³ɛ́ gù kɛ́ bɛ wa ŋmɛ ʋ ƴãw bàalʋ ʋ kpi. Mɛ̃ lile na ŋmʋr kpɛ bɛra pʋɔ a, ʋ bɛ bãw kɛ́ kũu jɩɛrɛ nɩ a ʋ nyɔ-vʋʋrʋ ɛ.

²⁴Ƴɛrɛŋa a, ɩ̃ bibiir i, nyɩ bɛrɛ wone mɛ̃, nyɩ cɛlɛ a ɩ̃ ƴɛ̀rʋ zie.

²⁵Nyɩ ta sàw a pɔw ŋa tɔ bɛlɩ nyɩ ɛ, nyɩ ta bɔr yi a ʋ sɔ́r zu ɛ.

²⁶Bʋ̃ʋ n'ʋ vɛ̃, ʋ ƴãw nɩ nɩ-yaga bàalʋ, ƴãw bɛ lo. A bɛlɩ dem za ʋ na kʋ a ɩ n nɩbɛ na kpɛmɛ a.

²⁷A ʋ yir cenu ɩ n a kpɩmɛ tẽw cenu, a ɩ n a kũuni tẽw siwfʋ.