Read Dagara, Northern Zʋkpaɩ 8 Bible Online

Zʋkpaɩ 8 - Dagara, Northern bible

Zʋkpaɩ 8

¹A Yã-bãwfʋ bɛ n'ʋ bʋɔlɛ ɩ? A yã bɛ n'ʋ bʋɔlɛ gbololo ɩ[13]?

²A zi-kɛrɩ zu fʋ na mɩ́ nyɛ̃ a sɔ́r na be a pile a, a sɔ-carɩ pʋɔ a, a Yã-bãwfʋ àr'ɩ saaƴẽwn.

³A tẽ-kpɛ̃ɛ dɩ̃dɛɛ ƴãw a, a nɩbɛ tu-tɔlʋ ziir a, ʋ cɩɩrɛ na yere:

⁴«Nyɩɩm nɩsaalbɛ ɛ, nyɩmɛ nɛbɛ ɩ̃ bʋɔlɛ, nyɩ za zie n'a ɩ̃ ƴɛ̀rɛ.

⁵A nyɩɩm na bɛ bãw bom a, nyɩ zanɩ a maal-ɩb. A nyɩɩm dãbole, nyɩ zanɩ a yã.

⁶Nyɩ bɛrɛ wone, ɩ̃ tɛr'ɩ ƴɛ̀r-sɩza na ƴɛ̀r kʋ̀ nyɩ, ɩ̃ na ƴɛ̀r'ɩ cãamɩ́ a nyɩ zie.

⁷Bʋ̃ʋ n'ʋ vɛ̃, yel-mɩŋa n'a ɩ̃ yere, ɩ̃ hɩ̃ɛn nɩ a ƴɛ̀r-faa ƴɛ̀rʋ.

⁸A ɩ̃ nʋɔr ƴɛ̀rʋ za ɩ n yel-mɩŋa, been kãw za bɛ ɩ ziri bɩɩ bɛ̀lʋ ɛ.

⁹A za mɩ́ ɩ n yel-mɩŋa nɩr na tɛr yã a zie, a bɛ mɩ́ tɛr bʋnʋ nɩr na zanɩ bãw a zie ɩ.

¹⁰Nyɩ bɔbr a wulu ɩ̃ na tɩrɛ a, ɛ́ bɛr a salm-pla. Nyɩ bɔbr a bãwfʋ ɛ́ bɛr a salm-zɩɛ.

¹¹Bʋ̃ʋ n'ʋ vɛ̃, a mãa Yã-bãwfʋ a, ɩ̃ sa n a lɛw-vɩɛlɩ, na-bom kãw za bɛ ta m ɛ[14].»

¹²A mãa Yã-bãwfʋ a, a yã ɩ̃ na bãw a bɩɛlɛ mɛ̃ na. Ɩ̃ mɩ́ ɩrɛ nɩ a bom tɛr'ɩ tɩ́ɛrʋ.

¹³A Sore zɔba n'ɩ a faa hɩ̃ɛnʋ. Ɩ̃ bɛ nɔnɛ a pɔ̀lʋ, a nyɔka-ɩb, a ɩ-faar nɩ a ziri ɛ.

¹⁴A ɩ̃ ton n'ɩ k'ɩ̃ɩ wule a nɩsaalbɛ a yã, ɛ́ wule bɛ bɛ mɩ́ dãw bãwnɩ a yel cɔbrɩ. Mãa n'ɩ a yã, ɛ́ mãa so a kpɛnʋ.

¹⁵Mãa zũú n'a a na-mɩnɛ dɩrɛ a naalʋ, ɛ́ a ƴɛ̀r-dɩrbɛ mɩ́ ƴãw a nɛ́ɛ a tori.

¹⁶Mãa zũú n'a, a nɩ-bɛrɛ dɩrɛ a nɩ-kpɛ̃ɛnʋ, lãwnɩ a nɩ-yée nɩ a bɛlɩ dem za na dɩrɛ a ƴɛ̀rʋ a tẽw zu a.

¹⁷A mãa a, ɩ̃ nɔnɛ nɩ a bɛlɩ dem na nɔnɛ mɛ̃ a, ɛ́ a bɛlɩ dem na bɔbr mɛ̃ a na mɩ́ nyɛ̃ m'a.

¹⁸Mãa n'ʋ tɩrɛ a naalʋ nɩ a yúor, a tɛra na mɩ́ kɔwrɩ a, nɩ a yele za na mɩ́ tu a nɩr a.

¹⁹A ɩ̃ bʋ̃-kʋ̀rɩ sa n a salm-zɩɛ mɩŋa mɩŋa, a ɩ̃ maalʋ sa n a salm-pla mɩŋa mɩŋa.

²⁰Mɩnʋ sɔ́r zu n'a ɩ̃ mɩ́ cere, a lɛ na mɩ́ tu sɔ́r a sɔrle zu.

²¹A be a, ɩ̃ mɩ́ kʋ̀ n bome a bɛlɩ dem na nɔnɛ mɛ̃ a, ɩ̃ mɩ́ paal'ɩ a bɛ yie nɩ na-bome.

²²Mãa n'ʋ a Sore de niwn ír, ɛ́ wa bãw ír a ʋ bʋ̃-íri za.

²³Ʋ ɩ na ɩ̃ be a koro kãw za a yele za pɛr-tib daar, a tẽw na bɛ tɩ be sɛr a.

²⁴A ɩ̃ dɔwfʋ daar a, a kʋ̃ɔ-bɛrɛ bɛ tɩ be sɛr ɛ, bul-nɛ́ɛ kʋ̃ɔ na mɩ́ bule yire a bɛ tɩ be ɩ.

²⁵Ɩ̃ tɩ dɔw na ɛ́ a tan wa bãw be, ɛ́ a tãli wa bãw be.

²⁶A lɛn daar a, a Sore bɛ tɩ ír a tẽw, a póru nɩ a tẽsɔw uuru kãw za sɛr ɛ.

²⁷A lɛn daar ʋ na tɩ ɩ a salom ʋ kpɛmɛ àr a, ɩ̃ tɩ be n be, a lɛn daar ʋ na tɩ tʋ̃ɔ̀ a tẽw tʋra a kʋ̃ɔ-kpɛ̃ɛ zu-sɔw a,

²⁸ʋ na tɩ ƴãw a zũzuge a ɓã taa a saa-zu a, ʋ na tɩ kʋ̀ a fãw a bul-nɛ́ɛ na be a tẽsɔw pʋ̃ɔmɩ za a,

²⁹ʋ na tɩ ƴãw tʋr-bɔw a kʋ̃ɔ-kpɛ̃ɛ a kʋ̃ɔnɩ na bɛ tɛr sɔ́r na gãw a, ʋ na tɩ sʋ̃ɔ́ a tẽw pɛr a, ɩ̃ tɩ be n be.

³⁰A lɛn daar a, ɩ̃ tɩ be n a Sore lõbowrí mɛ̃ a tome zu-sob a. Bibi-vɩɛrɩ za, ɩ̃ mɩ́ tɩ ƴãw ʋ nɩ nʋ̃ɔ̀, ɛ́ be a ʋ zie dɩ̃ɛnɛ kʋralɛ.

³¹Ɩ̃ mɩ́ tɩ dɩ̃ɛnɛ nɩ a tẽ-daa ʋ na ír a tẽsɔw zu, ɛ́ nyɛrɛ a ɩ̃ nʋ̃ɔ̀ a nɩsaalbɛ sɔgɔ.

³²«Ƴɛrɛŋa a, ɩ̃ bibiir i, nyɩ bɛrɛ wone mɛ̃. Zu-nʋ̃ɔ̀ dem'ɩ a bɛlɩ dem na tuur a lɛ ɩ̃ na yere a.

³³Nyɩ bɛrɛ wone a ɩ̃ wulu, tʋ̃ɔ́ ɩ yã-bãwnbɛ. Nyɩ taa zawrɛ a bɛrɛ ɩ.

³⁴Zu-nʋ̃ɔ̀ sob'ɩ a sob nɛ na bɛrɛ wone mɛ̃, na mɩ́ gã ìr a ɩ̃ dɩ̃dɔr ƴãw bibie za, ɛ́ gùre a ɩ̃ dɩ̃dɔr a.

³⁵Bʋ̃ʋ n'ʋ vɛ̃, sob nɛ na nyɛ̃ m a, nyɛ̃ nɩ a nyɔ-vʋʋrʋ, ɛ́ a Sore na de nɩ a ʋ yele.

³⁶Ɛcɛ, sob nɛ na sãwnɛ mɛ̃ a, ʋ ɩrɛ na a kpɩɛr a ʋl mɩŋa. Bɛlɩ dem za na bɛ nɔnɛ mɛ̃ a nɔnɛ nɩ a kũu.»