Read Dagara, Northern Ekilezɩasɩ 7 Bible Online

Ekilezɩasɩ 7 - Dagara, Northern bible

Ekilezɩasɩ 7

¹Yo-vla sa n parfɛ̃ a daarʋ na bɛ gbʋ́r a, ɛ́ a kũu bibir sa a dɔwfʋ bibir.

²Yir kuor na kone a cenu sa yir bɛ na dɩrɛ cuw a. A kũu n'ɩ a nɩsaal za baarʋ zie, ɛ́ a fɛr'a k'aa nɩ-vʋʋrɩ mɩ́ tɛr a ʋ tɩɛrʋ.

³Pʋ-sãwna sa a laarʋ. Bʋ̃ʋ n'ʋ vɛ̃, fʋ na tʋ̃ɔ́ na sãw niwn, ɛ́ a fʋ socir cɩlɛ.

⁴A yã-bãwnbɛ mɩ́ be n a be a nɩbɛ na wone tuo a, ɛ́ a dãbole be a be bɛ na dɩ̃ɛnɛ a.

⁵A yã-bãwnɛ na yere fʋ a bɛr-wob sa, mʋʋrʋ a dãbole na mʋʋrɛ fʋ a.

⁶Mɛ̃ a lɛ gʋʋr na dɩrɛ pure ziduwle pile a, lɛ mɩ̀ n'a a dãbol laarʋ ŋmɛ̃. Ɛcɛ à á ŋá za mɩ̀ ɩ n bàlʋ zawla.

⁷Yã-bãwnɛ na tɛr fãw dɔwrɛ a ʋ taabɛ a na tʋ̃ɔ́ na lɩɛbɩ dãbol, ɛ́ a bʋ̃-kʋ̀rɩ sãw a ʋ socir bɛr.

⁸Bom za baarʋ sa a ʋ tib. Tʋɔra-nyɔwfʋ sa a pɔ̀l-ɩb.

⁹Ta mɩ́ ŋmʋr nyɛ̃ a suur ɛ, a dãbole tɛwr nɛbɛ bɛ mɩ́ yaa kɛ́ nyɛ̃ a suur ɛ.

¹⁰Ta mɩ́ yel k'aa koro za sa a dɩ̃a ɩ. Yã-bãwnɛ ƴɛ̀rʋ bɛ n'ɩ a ƴɛ̀rʋ ŋa tɔ ɩ.

¹¹A yã-bãwfʋ vɩɛl'a mɛ̃ gbã-dɩ-bom a, ɛ́ a nɩbɛ za nyɛrɛ nɩ tɔnɛ a ʋ pʋɔ.

¹²Bʋ̃ʋ n'ʋ vɛ̃, a fʋ na be a yã-bãwfʋ ɓaarʋ́ a, a ɩ na mɛ̃ libir ɓaarʋ́ n'a fʋ be a. A bɛlɩ dem na tɛr ʋ a, ʋ mɩ́ ɩ na a bɛ nyɔ-vʋʋrʋ wõwme dɔwlɩ: alɛ n'a so a ʋ bãwfʋ tɛr yel-ɩra.

¹³Tɩ nyɛ̃ a Naaŋmɩn tome a! Ãa n'ʋ na tʋ̃ɔ́ dɛnɩ a bom ʋ na ɩ ʋ gʋɔ a?

¹⁴A yele za wa cere vla a, fʋ̃ʋ cɩlɛ. Ɛ́ alɛ bɛ wa cere vla a, fʋ̃ʋ tɩɛrɩ nyɛ̃. A Naaŋmɩn mɩ́ tɩr'ɩ a nʋ̃ɔ̀ nɩ a kpɩɛrʋ, k'aa nɩsaal ta mɩ́ tʋ̃ɔ́ bãw a ʋlɩ bom nɛ na na ɩ a ʋ pùorí a ɩ.

¹⁵A ɩ̃ nyɔ-vʋʋr-ŋmãa ŋa pʋɔ a, ɩ̃ nyɛ̃ nɩ bom za: nɩ-mɩŋa na kpi a ʋ mɩnʋ zũú, nɩ nɩ-faa na cãà vʋʋrɛ a ʋ ɩ-faa zũú a.

¹⁶Ta wul kɛ́ fʋ ɩ n nɩ-mɩŋa zuo ɩ, ta wul kɛ́ fʋ ɩ n yã-bãwnɛ zuo ɩ. Bʋ̃ʋ n'ʋ so fʋ bɔbr kɛ́ fʋ sãw a fʋ tʋɔra bɛr?

¹⁷Ta kpɛ faa zuo ɩ, ɛ́ ta lɩɛbɩ dãbol ɛ. Bʋ̃ʋ n'ʋ so fʋ bɔbr kɛ́ fʋ kpi, ɛ́ a fʋ daar bɛ ta sɛr?

¹⁸A vɩɛl'a kɛ́ fʋ de a wulu dãw-niwn sob, ɛ́ ta bɛr a ayi sob ɛ, bʋ̃ʋ n'ʋ vɛ̃, nɩr na zɔrɛ a Naaŋmɩn a na tuur'ɩ a za ayi.

¹⁹A yã-bãwfʋ mɩ́ ɩ n a yã-bãwnɛ kpɛmɛ zuo na-kpɛ̃ɛ-lɩɛrbɛ pie na be tẽ-kpɛ̃ɛ kãw pʋɔ a.

²⁰A tẽw zu a, nɩ-mɩŋa bɛ be be na tʋ̃ɔ́ maalɛ vla ɛ́ faa bɛ jɛr ɛ.

²¹Lɛb waar mɩ̀, ta mɩ́ cɛlɛ a ƴɛ̀rʋ za bɛ na ƴɛ̀rɛ a zie ɩ, alɛ bɛ ɩ lɛ, fʋ nãà mab'a wõ a fʋ tõ-tõ-bie ʋ sãwnɛ a fʋ yúor.

²²A fʋ̃ʋ mɩŋa tɔr za bãwnɩ a na kɛ́ gb'aa yaga fʋ mɩ̀ mɩ́ sãw nɩ a fʋ taabɛ yée.

²³Ɩ̃ ɩ n à á ŋá za kaa nɩ yã-bãwfʋ. Ɩ̃ yel'a: «Ɩ̃ na ɩ n yã-bãwnɛ.» Ɛcɛ a yã-bãwfʋ tɩ zãá nɩ mɛ̃ na.

²⁴A zie na be a yɛlmɛ na ɛ́ zulme zulme! Ãa n'ʋ na tʋ̃ɔ́ bãw ʋ pɩɩrɩ?

²⁵Lɛ n'a ɩ̃ su zu zanɩ vla vla k'ɩ̃ɩ bãw ɛ́ bɔ nyɛ̃ bʋ̃ʋ n'ɩ a yã-bãwfʋ. Ɩ̃ tɩ bɔbr'a k'ɩ̃ɩ bãw bʋ̃ʋ n'ʋ so a yele mɩ́ ta. Ɩ̃ mɩ̀ tɩ bɔ na bãw ɛ́ nyɛ̃ k'aa ɩ-faa bɩɩ a dãbolu ɩ n yãya-ɩb.

²⁶Ɩ̃ nyɛ̃ na k'aa pɔw na mɩ́ ɩ a dɛbr lo a, a mɩ́ ɩ n kpɩɛrʋ gãw a kũu. A ʋ nɔ̃wfʋ ɩ na mɛ̃ mɩ̃ɛ a, ɛ́ a ʋ kpãkpamɛ ɩ mɛ̃ bʋ̃-'leni a. Nɩr na pɛlɩ a Naaŋmɩn pʋɔ a bɛ lore a ʋ nuru pʋɔ ɩ. Ɛcɛ a yel-bier-maalɛ mɩ́ bɛr'a ʋ nyɔw ʋ.

²⁷A Kohelɛtɩ yere na: ɩ̃ jiel'ɩ a yele been been k'ɩ̃ɩ bãw bʋ̃ʋ n'ʋ so a mɩ́ ta.

²⁸Ɩ̃ bɔ na a tɩ cɛlɩ ɩ̃ɩ bɛ nyɛ̃ bom ɛ. Nyɛ̃: ɩ̃ nyɛ̃ nɩ dɛb been na ɩ dɛb a, dɛbr túr (1 000) pʋɔ. Ɛcɛ a pɔwbɛ za pʋɔ a, ɩ̃ bɛ nyɛ̃ pɔw been kãw za ɩ.

²⁹Nyɛ̃ a yel-been ʋl pɛr ɩ̃ na wa bãw a: a Naaŋmɩn maal'ɩ a nɩsaal ʋ tori, ɛcɛ a nɩsaal'ʋ bɔ fɛrʋ ƴãw a ʋ mɩŋa.