Read Dagara, Northern A Yielu za pʋɔ yiel-vla vla 2 Bible Online

A Yielu za pʋɔ yiel-vla vla 2 - Dagara, Northern bible

A Yielu za pʋɔ yiel-vla vla 2

¹Ɛ́ mãa a, ɩ̃ ɩ n a Saron tɩ̃tal[3] mɔ̃-puuru, a bà-fʋɔlɩ pʋɔ mɔ̃-puuru na vɩɛl vɩɛl a.

²Mɛ̃ mɔ̃-puuru na vɩɛl vɩɛl gʋʋr pʋɔ a, lɛ n'a a ɩ̃ sɛn ŋmɛ̃ a pɔwsɩrali sɔgɔ!

³Mɛ̃ tɩ-wɔna na be tuw pʋɔ a, lɛ n'a a ɩ̃ nɩ-nɔna ŋmɛ̃ a pɔ́lɛ́ sɔgɔ! Ɩ̃ nɔnɛ nɩ a ʋ ɓaarʋ́ zɩma, ɛ́ a ʋ wɔmɛ nʋmɛ a ɩ̃ nʋɔrɩ́.

⁴Ʋ tɛr mɛ̃ na kpɛ n a divɛ̃ nyub zie, ʋ pili na pàw mɛ̃ nɩ a ʋ nɔ̃wfʋ.

⁵«Nyɩ kʋ̀ m divɛ̃ tɩɛ wɔmɛ gatori fɔ̃w ɩ̃ 'wɔb tɛr fãw, nyɩ sanɩ mɛ̃ nɩ tɩ-wɔmɛ, bʋ̃ʋ n'ʋ vɛ̃, nɔ̃wfʋ bàalʋ tɛr mɛ̃ na.»

⁶A ʋ gʋba nũu kɔw nɩ a ɩ̃ zu, ɛ́ a ʋ dʋrʋ nũu kãkori mɛ̃.

⁷Zerizalɛm pɔwsɩrali i, ɩ̃ zɛlɛ nyɩ nɩ yãayãa, a muli nɩ a póru pʋɔ walɩ[4] yúor ƴãw: nyɩ ta sɩ̃w a ɩ̃ nɔ̃wfʋ ɛ, nyɩ ta dam ʋ, ʋʋ bɛ sàw sɛr ɛ.

⁸Ɩ̃ wone nɩ a ɩ̃ nɩ-nɔna kɔkɔr! Nyɛ̃ ʋ: ʋ waar'a! Ʋ pálɛ nɩ a tã-bɛrɛ zu, ƴawr dúor a tãli zu.

⁹A ɩ̃ nɩ-nɔna ɩ na mɛ̃ mɔlʋ bɩɩ wal-bile a. Nyɛ̃ ʋ ʋ àr a tɩ dapùorí, ʋ jɩ́rɛ nɩ a tokoro vʋɔrɩ́, ʋ piwre nɩ a tokoro vɛɛ ƴãw.

¹⁰A ɩ̃ nɩ-nɔna ƴɛ̀rɛ nɩ a ɩ̃ zie: «Ɩ̃ nɩ-nɔna a, ɩ̃ pɔl-bɛ-cɛ ɛ, ìr wa.

¹¹Bʋ̃ʋ n'ʋ vɛ̃, a sɩ̃ɔ tɔl'a, a saa ŋmãa na, ʋ kul'a.

¹²A póru mɔ̃-puuru sãá na, a yielu cɛb daar ta na. Ɛ́ a tɩ tẽw pʋɔ a, bɛ wone nɩ a ŋmam kon.

¹³A kãkã-wɔ̃-kɛrɛ mʋ̃ɔnɛ nɩ a tɩɩr zu. A divɛ̃ tɩɩr puuru nyũu pàw nɩ a ziir. Ɩ̃ sɛn ɩ, ɩ̃ pɔl-bɛ-cɛ ɛ, ìr wa!

¹⁴Ɩ̃ naŋmam ɩ, fʋ̃ʋ na be a pie bɔwrɩ pʋɔ a, fʋ̃ʋ na sɔwlɩ a fʋɔl-cũgbuli bɔwrɩ pʋɔ a, wul mɛ̃ a fʋ niwn. Ɩ ɩ̃ wõ a fʋ kɔkɔr, bʋ̃ʋ n'ʋ vɛ̃, a fʋ kɔkɔr vla tɔ! Ɛ́ a fʋ niwn mɩ̀ vla tɔ!»

¹⁵Nyɩ nyɔw a tʋrbaar kʋ̀ tɩ, a tʋr-bali na sãwnɛ a divɛ̃ tɩɩr a, a tɩ divɛ̃ tɩɩr na pu a.

¹⁶Ɩ̃ so nɩ a ɩ̃ nɩ-nɔna, ʋʋ mɩ̀ so m. Ʋ àr'ɩ nɩ a ʋ dʋn a lisɩ mɔ̃-puuru pʋɔ.

¹⁷Ɩ̃ nɩ-nɔna a, a zaanʋɔra wa ta a, a ɓaarʋ wa lɩɛbɩ a, fʋ̃ʋ lɛb wa. Zɔrɛ mɛ̃ mɔlʋ bɩɩ wal-bile a, a tã-bɛrɛ na bʋ́r bʋ́r a zu.