Read Dagara, Northern A Yielu za pʋɔ yiel-vla vla 4 Bible Online

A Yielu za pʋɔ yiel-vla vla 4 - Dagara, Northern bible

A Yielu za pʋɔ yiel-vla vla 4

¹Nyɛ̃ fʋ na pɔl a, ɩ̃ sɛn ɩ, nyɛ̃ fʋ na pɔl a! A pɛn na pàw a fʋ niwn a pùorí a, a fʋ mimie vɩɛl'a mɛ̃ naŋmamɛ a. A fʋ zukɔbr-vɔlavɔla ɩ na mɛ̃ bʋʋr na darɛ taa siwr Galaadɩ tãw a.

²A fʋ nyɩmɛ ɩ na mɛ̃ píir bɛ na ŋma a kɔblʋ baarɩ, a yi a kʋ̃ɔ sob zie dúor a. Ŋa za tɛr'ɩ a ʋ yɩb-tɔ, kãw za bɛ cɛ ɩ.

³A fʋ nɔgbãbie ɩ na mɛ̃ pɛn-zɩɛ baala baala a, ɛ́ a fʋ nʋɔr vɩɛl vɩɛl! A fʋ kɔrɛ mʋ̃ɔ na mɛ̃ girenadɩ tɩ-wɔm bɔba nɩ bɔba a, a pɛn na pàw a fʋ niwn a pùorí.

⁴A fʋ nyũu ŋmɛ̃ na mɛ̃ a Daviir yir-cõcowla bɛ na ŋmãa ʋ kpɛmɛ a. Zɛbr-kur-pãgalɩ túr yawl'ɩ a be, gãdaar zɛbr bome n'ɩ a za.

⁵A fʋ bɩrɛ a za ayi ɩ na mɛ̃ bʋli ayi a, mɛ̃ mɔlʋ bili ayi na ɩ yɩbr, ɛ́ 'wɔbr mʋ̃ɔ lisɩ mɔ̃-puuru pʋɔ a.

⁶A zaanɔ-ɓaar, a ɓaarʋ wa lɩɛbɩ a, ɩ̃ na cen nɩ a fʋ mɩ́ɩ̀r tã-kpɛ̃ɛ zu, nɩ a fʋ tɩ-suur-zɔ̃-na-nyùur-vla-vla-a tãle zu.

⁷Ɩ̃ sɛn ɩ, fʋ pɔ̀l'ɩ fʋ za, faalʋ kãw za bɛ be a fʋ zie ɩ.

⁸Ɩ̃ ƴãw-nɩ-yúor i, yi n mɛ̃ a Libã tẽw wa, yi n mɛ̃ a Libã tẽw wa. Yi a Amana, a Seniir nɩ a Hɛrmɔ̃ tan zu siw. Zɔ zãá nɩ a gben gaa ziir á ŋá, a nyoru tan á ŋá.

⁹Fʋ mɩ́ ɩ na ɩ̃ bol, ɩ̃ yeepuule e, ɩ̃ ƴãw-nɩ-yúor i, fʋ mɩ́ ɩ na ɩ̃ bol nɩ a jɩ́rʋ fʋ na jɩ́r mɛ̃ gb'a been a, nɩ a fʋ kɔkɔrɩ́ lɛw-bir-been.

¹⁰Ɩ̃ yeepuule e, ɩ̃ ƴãw-nɩ-yúor i, nyɛ̃ a fʋ nɔ̃wfʋ na vɩɛl a! A fʋ nɔ̃wfʋ nʋmɛ na zuo divɛ̃! A fʋ parfɛ̃ nyũu ɩrɛ nɩ nʋ̃ɔ̀ zuo a parfɛ̃-vɩɛlɩ vɩɛlɩ za.

¹¹A mɔwrʋ fʋ na mɩ́ mɔwrɩ a ɩ̃ nʋɔr a nʋmɛ na man sɩwr. Sɩwr nɩ bʋ̀rʋ be n a fʋ zɛl pile. A fʋ bʋ̃-suuri nyũu ɩ na mɛ̃ Libã tẽw tuwr tɩɩr nyũu a.

¹²Fʋ ɩ n a ɩ̃ yõ zaadɛ̃, ɩ̃ yeepuule e, ɩ̃ ƴãw-nɩ-yúor i, a bul-nʋɔr ɩ̃ na so a, a mãa yõ bule.

¹³Fʋ tɛr'ɩ zaadɛ̃ tɩ-wɔnɩ bɛ na sɛl a ɓaarʋ, zaadɛ̃ bɛ na sɛl girenadɩ tɩɩr a wɔmɛ nʋmɛ nʋmɛ a. Tɩɩr a nyũu na vɩɛl a bule nɩ a be: a hene nɩ a náàr[5],

¹⁴a náàr nɩ a safʋrã, a loriye nɩ a kanɛl, a tɩ-suur-zɔ̃-na-nyùur-vla-vla-a tɩɩr za, a mɩ́ɩ̀r nɩ a alowɛsɩ, lãwnɩ a parfɛ̃ na nyùur vla zuo a za a[6].

¹⁵Fʋ ɩ n bule a zaadɛnɩ sɔwlɩsɔw, kʋ̃ɔ-walwal na bule yire a Libã tãw zu gbɔlɛ siwr a.

¹⁶Cɛ̀r, saa-pɛrɩ́-gʋba-lowr sɛsɛb i! Wa fɔ̃w, saa-pɛrɩ́-dʋrʋ-lowr sɛsɛb i! Nyɩ fure a ɩ̃ zaadɛ̃ pʋɔ, ʋ̀ bɛr a ʋ nyũu na vɩɛl a a yi! Ɛ́ a fʋ̃ʋ, ɩ̃ nɩ-nɔna a, wa a fʋ zaadɛ̃ pʋɔ wa dɩ a ʋ wɔ̃-nʋʋr nʋʋr.