Read Dagara, Northern A Yielu za pʋɔ yiel-vla vla 5 Bible Online

A Yielu za pʋɔ yiel-vla vla 5 - Dagara, Northern bible

A Yielu za pʋɔ yiel-vla vla 5

¹Ɩ̃ yeepuule e, ɩ̃ ƴãw-nɩ-yúor i, ɩ̃ waar'ɩ a ɩ̃ zaadɛ̃ pʋɔ. Ɩ̃ 'lawrɛ nɩ a ɩ̃ mɩ́ɩ̀r súur, kárɛ nɩ a ɩ̃ va-nyùure a mɩnɛ. Ɩ̃ dɩrɛ nɩ a ɩ̃ sɩw-gamɛ kãá, ɛ́ nyúur a ɩ̃ divɛ̃ nɩ a ɩ̃ bʋ̀rʋ. Nyɩ dɩrɛ, ɩ̃ bá mɩnɛ ɛ, nyɩ nyúur, nyɩ nɔ̃w taa tɩ kuoli!

²Ɩ̃ tɩ gúre na, ɛcɛ ɩ̃ zaw na: ɩ̃ wone nɩ a ɩ̃ nɩ-nɔna na kpáwrɛ a pan a! «Ɩ̃ yeepuule e, ɩ̃ sɛn ɩ, ɩ̃ naŋmam ɩ, ɩ̃ pɔl-bɛ-cɛ ɛ, yuo mɛ̃ a pan. A ɩ̃ zu za ɩ n ɓɩɛlʋ, ɛ́ a tɩ̃ɩsɔw ɓɩɛlʋ bùr mɛ̃ a zukɔbɛ.»

³Ɩ̃ yaar'ɩ a ɩ̃ bʋ̃-suuri, ɩ̃ bɛ lɛb suur ɛ! A ɩ̃ gbɛ́ɛ n'a ɩ̃ pɛ́wr wa báarɛ à ŋá, ɩ̃ bɛ lɛb dɛwr a bɛrɛ ɩ!

⁴A ɩ̃ nɩ-nɔna ture nɩ a nũu a pan vʋɔrɩ́, ɛ́ a ɩ̃ socir tʋɔr mɛ̃ ger ger!

⁵Ɩ̃ ìre na k'ɩ̃ɩ yuo a ɩ̃ nɩ-nɔna a pan. A ɩ̃ nuru ɩ n mɩ́ɩ̀r kãá tɛwr, ɛ́ a kãá-nyũu á ŋá yule nɩ a ɩ̃ nobie ƴãw lore a pan kpàrá nyɔwfʋ zie zu.

⁶Ɩ̃ yuore nɩ a ɩ̃ nɩ-nɔna a pan, ɛcɛ ʋ lɛb'a tɔl cen. Ɩ̃ yire nɩ a ʋ diw-bɩɛrʋ, ɩ̃ bɔbr ʋ na ɛ́ bɛ nyɛrɛ ʋ ɛ, ɩ̃ bʋɔl'ʋ na, ʋ́ʋ̀ bɛ sàw ɛ.

⁷Ɩ̃ tuor'ɩ a tẽ-kpɛ̃ɛ gùrbɛ. Bɛ cɔlɛ na piwre a dacĩ-bɛrɛ na piw a tẽw a. Bɛ pɔb mɛ̃ na ƴãw mɛ̃ bàalʋ, bɛ faa nɩ a gãw ɩ̃ na páw a bawŋmamɛ a.

⁸Zerizalɛm pɔwsɩrali i, ɩ̃ zɛlɛ nyɩ nɩ yãayãa: nyɩmɛ wa tuori a ɩ̃ nɩ-nɔna a, nyɩ na yel'a kɛ́ bʋnʋ kʋ̀ ʋ? Kɛ́ nɔ̃wfʋ bàalʋ tɛr mɛ̃ na.

⁹Fʋ̃ʋ na pɔ̀l gãw a pɔwbɛ za a, yel kʋ̀ tɩ, bʋ̃ʋ n'ʋ a fʋ nɩ-nɔna tɛr gãw nɩ-yũo? Bʋ̃ʋ n'ʋ ʋ tɛr gãw nɩ-yũo, kɛ̀ fʋ zɛlɛ tɩ à à ŋá?

¹⁰A ɩ̃ nɩ-nɔna pɛlɩ nɩ parpar, ʋ mɩ́ sãá nɩ nɩbɛ tùr-pie pʋɔ.

¹¹A ʋ zu ɩ n salm-zɩɛ mɩŋa. A ʋ zukɔbɛ gbil gbil'a ɩ mɛ̃ datɩ tɩɛ puuru a, ɛ́ sɔb mɛ̃ gbagba a.

¹²A ʋ mimie vɩɛl'a mɛ̃ naŋmamɛ na dɔm kʋ̃ɔ nʋɔr a. A dɔm'ɩ koli-nyúura nʋɔr zu, ɩ mɛ̃ bʋ̀rʋ na a suor a.

¹³A ʋ kɔ́rɛ ɩ na mɛ̃ zaadɛ̃ zie kãw na nyùur vla a, zie bɛ na sɛl mʋ̃ɔ na nyùur vla vla a. A ʋ nɔgbãbie ɩ na mɛ̃ lisɩ puuru, na bɛrɛ mɩ́ɩ̀r kãá a gbɔlɛ a.

¹⁴A ʋ nuru ɩ na mɛ̃ salm-zɩɛ bamɛ na ƴãw kʋsɛ-bi-nyɩlɩ a. A ʋ púor ɩ na mɛ̃ wɔb nyɩɩm bɛ na saalɩ a, ɛ́ kʋsɛ-bi-nyɩlɩ kãw bɛ na bʋɔlɛ safɩɩr a páw ʋ ʋ za.

¹⁵A ʋ gbɛ́ɛ ɩ na mɛ̃ kʋsɛ-pla kãw bɛ na bʋɔlɛ maabʋr a kpule na dɔwlɩ salm-zɩɛ mɩŋa kpule-pɛ́ɛ zu a. A ʋ niwn ŋmɛ̃ na mɛ̃ a Libã tan a, ʋ pɔ̀l'a mɛ̃ a sɛɛdɩr tɩɩr a.

¹⁶A ʋ nʋɔr ɩ n a nʋ̃ɔ̀ mɩŋa, ɛ́ a ʋ tɔr za n'ʋ ɩ̃ bɔbr. Zerizalɛm pɔwsɩrali i, nyɩ nyɛ̃ a ɩ̃ nɩ-nɔna, nyɩ nyɛ̃ a ɩ̃ sɛn!