Read Dagara, Northern Yã-bãwfʋ 1 Bible Online

Yã-bãwfʋ 1 - Dagara, Northern bible

Yã-bãwfʋ 1

¹Nyɩ nɔnɛ a mɩnʋ, nyɩɩm na kaarɛ a tẽw zie a! Nyɩ tɛr tɩɛrʋ na tori a Sore ƴãw a, nyɩ bɔbr ʋ nɩ nyɩ pʋɔ za.

²Bʋ̃ʋ n'ʋ vɛ̃, ʋ mɩ́ sàw nɩ a bɛlɩ dem na bɛ ɩrɛ ʋ kaar a, bɛ nyɛ̃ ʋ, ʋ mɩ́ ɩ na a bɛlɩ dem na sàw de ʋ a, bɛ bãw ʋ.

³A nɩsaalbɛ tɩɛr-gõlõgõlõ mɩ́ taw bɛ na zãá nɩ a Naaŋmɩn, ɛ́ a dãbole na ɩrɛ ʋ kaar a, a ʋ kpɛnʋ mɩ́ pàw bɛ nɩ a nʋɔr.

⁴A Yã-bãwfʋ[1] bɛ kpɩɛr socir na ɩrɛ faa a pʋɔ ɩ, ʋ bɛ kpɩɛr ƴã-gan yel-bier na so a pʋɔ ɩ.

⁵Bʋ̃ʋ n'ʋ vɛ̃, a Vʋʋrʋ sõw na wule a nɩsaalbɛ a ciir'ɩ a ziri, ʋ tawr'a zãánɛ nɩ a nɩbɛ na mɩ́ tɛr a dãbol tɩɛrʋ a, ʋ hɩ̃ɛn nɩ sob nɛ na maalɛ a faa a.

⁶A Yã-bãwfʋ ɩ n vʋʋrʋ na nɔnɛ a nɩsaalbɛ a, ɛcɛ ʋ bɛ mɩ́ vɛ̃ a sob nɛ na tʋʋr a Naaŋmɩn nɩ a ʋ nʋɔr ƴɛ̀rʋ a dɔwrʋ ɛ. Bʋ̃ʋ n'ʋ vɛ̃, a Naaŋmɩn mɩ́ nyɛ̃ nɩ a nɩsaal pʋɔ pʋ̃ɔmɩ za, ʋ sɩrɩ na bãw a nɩsaal tɩɛrʋ, ɛ́ wone bom nɛ za ʋ na yere a.

⁷Sɩza n'a, a Sore Vʋʋrʋ paal'ɩ a tẽw, ʋlɛ n'ʋ mɩ́ ɩ a bome za nyɔw taa vla, alɛ so ʋ bãw ƴɛ̀r-bir za bɛ na mɩ́ yel a.

⁸A na ɩ lɛ a, ƴɛ̀r-fa-ƴɛ̀rɛ za kʋ̃ tʋ̃ɔ́ sɔwlɩ ɛ, ɛ́ kʋ̃ tʋ̃ɔ́ nɩɩrɩ a dɔwrʋ na sɛw taa nɩ ʋ a bɛr ɛ.

⁹Naaŋmɩn na ƴãw na bɛ jɛl jɛl a nɩ-faar pʋ-tɩɛrʋ kaa. Bɛ na man nɩ a bɛ ƴɛ̀rʋ za kʋ̀ a Sore, ʋʋ na ƴãw bɛ nɩ dɔwrʋ a bɛ ɩ-faar ƴãw.

¹⁰A Naaŋmɩn na ƴãw tobr a, bɛ̀rɛ na wone bom za: ʋ mɩ́ wõ n a waalʋ al za na waalɩ pile pile a.

¹¹A na ɩ lɛ a, nyɩ gù nyɩ tʋɔra ta mɩ́ zure yere a nɩbɛ ɛ́ a bɛ tɛr pɛr ɛ, nyɩ maal tɛr a nyɩ nʋɔr a tɔ yel-faar manʋ ƴãw. Bʋ̃ʋ n'ʋ vɛ̃, ƴɛ̀rʋ za na sɔwlɩ ƴɛ̀r a bɛ ganɛ zawla ɩ, ɛ́ a nʋɔr na ŋmarɛ ziri a kʋrɛ nɩ a zi-ŋmarɛ.

¹²Nyɩ ta vʋʋrɛ sãsaralɛ zɛlɛ a kũu ɛ, nyɩ ta sãwnɛ nyɩ tʋɔra nɩ a nyɩ ɩ-ɩrɩ ɛ.

¹³A Naaŋmɩn a, ʋlɛ bɛ n'ʋ maalɩ a kũu ɛ, ɛ́ a bʋ̃-vʋʋrɩ wɛb bɛ mɩ́ pɛlɩ a ʋ pʋɔ ɩ[2].

¹⁴Ʋ ír'ɩ a bome za k'aa be be. Bom za ʋ na ɩ ʋ be a tẽ-daa zu a, be na k'ʋʋ tɩrɛ nyɔ-vʋʋrʋ. Kũu lɔw bɛ ka a ʋ ton pʋɔ ɩ. A kũu bɛ n'ʋ dɩrɛ naalʋ a tẽw zu ɛ,

¹⁵bʋ̃ʋ n'ʋ vɛ̃, a mɩnʋ bɛ tɛr kũu daar ɛ.

¹⁶A nɩ-faar mɩ́ zɛlɛ nɩ a kũu nɩ a bɛ ɩ-ɩrɩ nɩ a bɛ ƴɛ̀rʋ. Bɛ kpiir'a lore a ʋ ƴãw, bʋ̃ʋ n'ʋ vɛ̃, bɛ tɩɛrɛ kɛ́ bɛ bá n'ʋ, ɛ́ maal'ɩ ʋ wõ-taa. Yel-mɩŋa n'a, bɛ sɩrɩ na sɛwnɩ na tu ʋ!