Read Dagara, Northern Yã-bãwfʋ 10 Bible Online

Yã-bãwfʋ 10 - Dagara, Northern bible

Yã-bãwfʋ 10

¹A Yã-bãwfʋ n'ʋ tɩ piw a nɩsaal-dãw-niwn sob tɛr, a tẽ-daa sãà, a lɛ ʋ na tɩ cãà ɩ ʋ yõ a. Ɛ́ a pùorí, ʋ na wa lo a yel-bier pʋɔ a, a Yã-bãwfʋ n'ʋ vɩr ʋ yi n,

²ɛ́ kʋ̀ ʋ a fãw ʋ dɩrɛ nɩ naalʋ bom za zu.

³Ɛcɛ nɩsaal-faa kãw[30] tɩ zawr'ɩ a Yã-bãwfʋ bɛr nɩ suur. Ʋ tɩ kpi na, ʋ na kʋ a ʋ yɛb a ʋ su-yãyaar pʋɔ a ƴãw.

⁴Ʋlɛ n'ʋ so a kʋ̃ɔ-paalʋ tɩ vɔl a tẽw a Yã-bãwfʋ na cãà lɛb faa a. Welmaalɛ dàar gbor pʋɔ n'a ʋ tɩ tɛr a nɩ-mɩŋa cere nɩ a kʋ̃ɔnɩ zu[31].

⁵A lɛ a nɩ-bʋʋrɛ na tɩ wõ taa maalɩ a faa ɛ̀ bɛ dɔwrɩ bɛ, bɛ bɛ cãà wone taa ƴɛ̀rʋ a, a Yã-bãwfʋ n'ʋ tɩ nyɛ̃ a nɩ-mɩŋa, piw ʋ tɛr, ʋ bɛ tɛr sãwna a Naaŋmɩn niŋé ɩ. Ʋlɛ n'ʋ tɩ kʋ̀ ʋ a fãw ʋ sàw a Naaŋmɩn nʋɔr, ʋ na saa tɩ nɔnɛ a ʋ bidɛb a[32].

⁶Lɛ mɩ̀ n'a, a lɛn daar a nɩ-faar na tɩ kpiir pàwr pɛr a, ʋlɛ mɩ̀ cãà n'ʋ tɩ faa a nɩ-mɩŋa. Ʋ tɩ ɩ na ʋ zɔ cɩ̃ɛ, a vũu na dɩrɛ a tẽ-bɛrɛ anũu a bɛ páw ʋ dɩ ɛ[33].

⁷A bɛ faalʋ dãsɩɛ bome cãà na nɩ dɩ̃a: tẽ-kõw na cãà ɩrɛ zʋ̀ʋ́r a, tɩɩr a wɔmɛ na bɛ tɛr nãà mʋ̃ɔ a, nɩ nyaarʋ kpul[34] na àr a, kɛ́ bɛ cãà bãwnɩ nɩr kãw yele na bɛ sàw de a Naaŋmɩn a.

⁸A nɩbɛ bɛ ŋa taw na zãá nɩ a Yã-bãwfʋ, alɛ so bɛ kʋ̃ tʋ̃ɔ́ bãw a vla ɩ, ɛ́ a pùorí nɩbɛ na cãà bãwnɩ a bɛ dãbol-ɩb. Lɛ n'a nɩr bɛ yiire a bɛ tulu ɛ.

⁹Ɛcɛ a Yã-bãwfʋ faa nɩ a ʋ tõ-tõ-biir a bɛ kpɩɛrʋ za pʋɔ.

¹⁰Bibir kãw, nɩ-mɩŋa kãw tɩ zɔrɛ na nɩɩrɛ a ʋ yɛb suur bɛrɛ: a Yã-bãwfʋ n'ʋ tɩ wul ʋ a sɔr-vla. Ʋ tɩ wul ʋ nɩ a Naaŋmɩn Naalʋ, ɛ́ ɩ ʋ bãw a bʋ̃-son. Ʋ tɩ ɩ na a ʋ bàlʋ tome maalɩ vla, ɛ́ a ʋ hanʋ tome wa n tɔnɛ yaga[35].

¹¹A lɛ nɩbɛ na nɔnɛ a naalʋ na tɩ bɔbr kɛ́ bɛ nɛb ʋ a, a Yã-bãwfʋ tɩ sõw ʋ na, ɛ́ ɩ ʋ kpɛ naalʋ.

¹²Ʋ tɩ piw ʋ na tɛr a ʋ dɔ̃ dem, nɩ a bɛlɩ dem na tɩ ƴãwnɛ ʋ bɛrɩ a ƴãw. Ʋ tɩ ɩ na ʋ zɛb tʋ̃ɔ́ zɛb-kpɛ̃w[36] kãw pʋɔ, k'ʋʋ wul ʋ k'aa Naaŋmɩn tub tɛr'ɩ fãw gãw bom za.

¹³Nɩ-mɩŋa kãw bɛ na tɩ nyɔw kʋɔrɩ a, a Yã-bãwfʋ bɛ tɩ jɛ ʋ bɛr ɛ, ʋ tɩ faa ʋ nɩ a yel-bier pʋɔ[37].

¹⁴Ʋ tɩ lãwnɩ ʋ na siw a bul-kõw pʋɔ, ɛ́ bɛ bɛr ʋ a lɛn daar bɛ na tɩ lɔb ʋ ƴãw a gaso pʋɔ a ɩ. Ɛcɛ ʋ tɩ ɩ na ʋ tɛr nãà fãw, ɛ́ ɩ ʋ so a bɛlɩ dem na tɩ dɔwr'ʋ yaga yaga a. À ŋá n'a ʋ tɩ wul kɛ́ zir-ŋmarbɛ n'ɩ a bɛlɩ dem na tɩ yere a nɩr ŋa sãwna a, ɛ́ tɩ ɩ ʋ tɛr yúor kʋralɛ.

¹⁵A Yã-bãwfʋ tɩ faa nɩ a nɩ-bʋʋr-sõw, a nɩ-bʋʋrɛ na bɛ tɛr sãwna a, ʋ tɩ faa bɛ nɩ a tẽw ʋl nɩbɛ na dɔwrɛ bɛ a nuru pʋɔ[38].

¹⁶Ʋ tɩ kpɛ n Sore tõ-tõ-bie[39] kãw sɩ́ɛ pʋɔ, maalɩ nɔ-ɓãa-yele nɩ yel-bãw-guuri, bà n gbɛ́r na-kpɛn kpɛn niŋé.

¹⁷Ʋ tɩ kʋ̀ n a Naaŋmɩn nɩbɛ a bɛ tõ-kpɛn sã-ya, ɛ́ tɛr bɛ tu n sɔr-vla vla kãw. Ʋ tɩ ɩ n ɓaarʋ na mɩ́ piw bɛ a mʋ̃tɔ̃w a, ɛ́ ɩ ŋmar-bi-nyɩwrɩ cãà a tɩ̃ɩsɔw.

¹⁸Ʋ tɩ ɩ na bɛ kpɛ gãw a Kʋ̃ɔ-kpɛ̃ɛ-zɩɛ nɩ gbɛ́ɛ, ʋ tɩ tɛr bɛ na tɔl'ɩ kʋ̃ɔnɩ na bɛ tɛr vuo a sɔgɔ.

¹⁹Ɛcɛ ʋ tɩ ɩ na a kʋ̃ɔ paalɩ pàw a bɛ dɔ̃ dem, ɛ́ a pùorí, ʋ ír bɛ a kʋ̃ɔ-kpɛ̃ɛ pɛrɩ́ lɔb bɛr a kõkowr zu.

²⁰Lɛ n'a a nɩ-mɩn tɩ fá a nɩ-faar bome za. Sore e, bɛ tɩ zɛw nɩ a fʋ yo-sõw, bɛ tɩ ɓã n taa danɩ a fʋ kpɛnʋ na faa bɛ a.

²¹A Yã-bãwfʋ tɩ ɩ na a wõw-takpalɛ tʋɔr ƴɛ̀rɛ, ɛ́ ɩ a bibi-cãpili tɛɛ za ƴɛ̀rɛ welwel.