Read Dagara, Northern Yã-bãwfʋ 11 Bible Online

Yã-bãwfʋ 11 - Dagara, Northern bible

Yã-bãwfʋ 11

¹A Yã-bãwfʋ tɩ ɩ na a Naaŋmɩn nɩ-bʋʋrɛ yele za maalɩ vla, naaŋmɩn-ƴɛ̀r-man-sõw kãw zũú[40].

²Bɛ tɩ tu na tɔl wɛja-kpalɛ pʋɔ nɩr na bɛ kpɩɛr a, ɛ́ maalɩ a bɛ pɛnɛ-sɛwr ziir nɩsaal na bɛ dãw nɛ̃ gbɛ́r a.

³Bɛ tɩ bà n gbɛ́ɛ a bɛ dɔ̃ dem niŋé, ɛ́ diw a bɛlɩ dem na tɩ zɛbr'ɩ bɛ a bɛ lɛb pùor.

⁴Kʋ̃ɔ-nyúur tɩ kpɛ n a Ɩsɩrayɛl biir bɛ kõ bʋɔlɩ fʋ, Sore e, ɛ́ fʋ tɩ ɩ na kʋ̃ɔ yi pì-nɔ-cɩlʋ pʋɔ a bɛ ƴãw. Kʋsɛ-kpam'ʋ tɩ ɩ a bɛ kʋ̃ɔ-nyúur ɓãa[41].

⁵À ŋá n'a a kʋ̃ɔ na tɩ ɩ a bɛ dɔ̃ dem dɔwrʋ bom a, tɩ lɩɛbɩ bʋ̃-vla a bɛ kpɩɛrʋ daar.

⁶A bɛlɩ dem na tɩ yel kɛ́ bɛ kʋ a fʋ nɩ-bʋʋrɛ bi-pɩɩlɛ a dɔwrʋ ƴãw a, fʋ ɓʋɔl'ɩ a man na bɛ sɩrɛ a kʋ̃ɔ bɛr nɩ zɩ̃ɩ-mɛ̃mɛrɛ. Ɛcɛ fʋ kʋ̀ n a Ɩsɩrayɛl biir kʋ̃ɔ na ʋr a, kʋ̃ɔ bɛ na bɛ tɩ cãà tɩɛrɛ a[42].

⁸A lɛn daar a kʋ̃ɔ-nyúur na tɩ kpɛ bɛ a n'a fʋ tɩ wul bɛ a lɛ fʋ na dɔwrɩ a bɛ dɔ̃ dem a.

⁹Bʋ̃ʋ n'ʋ vɛ̃, fʋ na saa kpãa bɛ nɩ nɔ̃wfʋ a, fʋ ɩ bɛ na kaa, kɛ́ bɛ bãw a niw-sʋba al na mɩ́ tɛr a nɩ-faar fʋ na mɩ́ dɩ n a ƴɛ̀rʋ nɩ suur a.

¹⁰A fʋ nɩbɛ a, fʋ ɩ bɛ na kaa mɛ̃ sãà na kpãanɛ a ʋ bibiir a. Ɛ́ a bɛl a, fʋ sowri bɛ nɩ bom, mɛ̃ nãà na gù k'ʋʋ dɔwrɩ faa faa a.

¹¹Bɛ tɩ zãá nɩ nɩ a fʋ nɩbɛ bɩɩ bɛ tɩ pɩɛlɩ bɛ na a, bɛ wõ n a tuo-been nɛ.

¹²Lɛ n'a pʋ-sãwna tɩ tɛr bɛ ziir ayi: a yele na ɩ tɔl a tɩɛrʋ tɩ ƴãw bɛ nɩ kon,

¹³ɛ́ lɛb waar, bɛ na tɩ bãw k'aa bʋ̃-faar al na tɩ páw bɛ a lɩɛb'ɩ bʋ̃-vɩɛlɩ a Ɩsɩrayɛl biir ƴãw a, bɛ tɩ bãwnɩ a na, Sore e, kɛ́ fʋ̃ʋ mɩŋa n'ʋ tõ nũu.

¹⁴A sob nɛ bɛ na tɩ jɛ bɛr, zawrɩ bɛr a kʋ̃ɔ zu a, bɛ tɩ diw ʋ nɩ a pùorí ɩ n ʋ la[43]. Ɛcɛ a yele al pùorí a, kʋ̃ɔ-nyúur tɩ kpɛ bɛ na, kʋ̃ɔ-nyúur na bɛ tɩ ɩ mɛ̃ a nɩ-mɩn dem a. Lɛ n'a nɔ-ɓãan tɩ nyɔw bɛ.

¹⁵A nɩbɛ bɛ ŋa faalʋ tɩ ƴãw bɛ nɩ tɩɛrʋ na bɔr'ɩ bɛ, tɩ ƴãw bɛ puore bʋ̃-vuri na bɛ tɛr yã a, nɩ dʋ̃-sãsarɩlɛ. Sore e, a bɛ dɔwrʋ ƴãw a, fʋ ƴãw nɩ dʋ̃-yaga mɩ̀ na bɛ tɛr yã a wa a bɛ ƴãw[44],

¹⁶kɛ́ bɛ bãw k'aa zie ʋl bɛ na mɩ́ maal'ɩ a yel-bier a n'ʋ bɛ mɩ́ páw nɩ a dɔwrʋ.

¹⁷A fʋ kpɛnʋ na bɛ dɩ vuo a na de bom na bɛ tɛr ŋmɛ̃a ír'ɩ a tẽ-daa a zũú, fʋ nãá tʋ̃ɔ́ na ƴãw bɛ dɔwr-yoru mɔlɛ mɔlɛ lɛ: mɛ̃ wɛ-dʋn faar na bɛ tɛr tɛwr a, ursɩrɩ bɩɩ gben.

¹⁸Bɩɩ fʋ nãá tʋ̃ɔ́ na ír dʋ̃-bʋʋr-paalɛ a mɩnɛ kãw na ɩ suur tɛwr a, dʋ̃-bɩɩr bɩɩr na na mɩ́ tʋ̃ɔ́ ow vũu, bɩɩ ùori zʋ̀ʋ́r yi pàw a ziir za nɩ gɔmɛ a, bɩɩ na na tʋ̃ɔ́ mɩ́ tɛ saa-nyɩwrʋ na ɩrɛ dɛ̃bɩ̃ɛ a bɛr a yi a mimie pʋɔ a.

¹⁹A kʋ̃ʋ mɩ́ tɩ fɛr a dʋn á ŋá taabɛ a zɛb'ɩ a fʋ dɔ̃ dem kʋ bɛ pàw pɛr ɛ: a nyɛ́b tɛwr nãá mɩ́ sɛw na, ƴãw bɛ dɛ̃bɩ̃ɛ bɛ kpi.

²⁰Mɔ̃ mɩ̀, à á ŋá za saa bɛ tɩ ka be a, fʋ nãá tʋ̃ɔ́ na pɛblɩ bɛ gb'a been lɔb, fʋ na na ɩ a fʋ mɩnʋ ìr a bɛ ƴãw a, nɩ fʋ na na diw bɛ yaarɩ nɩ a fʋ pɩɛlʋ fãw a. Ɛcɛ, fʋ cɔbr'ɩ bom za ʋ tɛr zɛ̃a, tɛr sɔ́rʋ nɩ tɩbrʋ.

²¹Sore e, fʋ na tʋ̃ɔ́ na wul a fʋ fãw na ɩ kpɛ̃ɛ a kʋralɛ, ɛ́ nɩr kʋ̃ tʋ̃ɔ́ bà gbɛ́r a fʋ fãw niŋé ɩ.

²²A fʋ zie a, a tẽ-daa za ɩ na mɛ̃ tɩbrʋ zaa pʋrɩ na dɔwlɩ bʋ̃-kera zu a, bɩɩ biɓaara ɓɩɛl-bir na lore a tẽsɔw a.

²³Ɛcɛ fʋ na tʋ̃ɔ́ bom za a ƴãw a, fʋ zɔrɛ nɩ a nɩbɛ za nɩbaalʋ. Fʋ mɩ́ pàw nɩ a fʋ mimie tɛr a nɩsaalbɛ yel-bebe ƴãw, kɛ́ bɛ tʋ̃ɔ́ lɩɛbɩ a bɛ ɩb.

²⁴Fʋ nɔnɛ nɩ a bome za na be a, ɛ́ bɛ hɩ̃ɛn fʋ bʋ̃-maala kãw za ɩ. Fʋ̃ʋ tɩ hɩ̃ɛn a kãw a, fʋ kʋ̃ʋ tɩ ír ʋ ɛ.

²⁵Ɛ́ ŋmɩŋmɩn n'a bom nãá tʋ̃ɔ́ be, fʋ̃ʋ bɛ tɩ bɔbr ʋ a? Ŋmɩŋmɩn n'a ʋ nãá tʋ̃ɔ́ cãà be kɔwrɩ, fʋ̃ʋ bɛ tɩ bʋɔl'ʋ k'ʋʋ be a?

²⁶Fʋ mɩ́ bɛr'ɩ a za a vʋʋrɛ, fʋ̃ʋ na n'ʋ so a a, fʋ̃ʋ Zu-sob na nɔnɛ a nyɔ-vʋʋrʋ a.