Read Dagara, Northern Yã-bãwfʋ 12 Bible Online

Yã-bãwfʋ 12 - Dagara, Northern bible

Yã-bãwfʋ 12

¹Bʋ̃ʋ n'ʋ vɛ̃, a fʋ vʋʋrʋ na bɛ kpiir a be n a bome za na be a pʋɔ.

²Alɛ n'a so, Sore e, fʋ mɩ́ kpãa a bɛlɩ dem na tuli a, bɩɛlbɩɛl. Fʋ mɩ́ paw na yel a bɛ sãwna kʋ̀ bɛ, kɛ́ bɛ gùr pùor cɔw a yel-faa, ɛ́ sàw de fʋ.

³À ŋá n'a fʋ tɩ ɩ a nɩbɛ na tɩ dãw kpɩɛr a tẽ-sõw a zie[45].

⁴Fʋ tɩ hɩ̃ɛn bɛ na a bɛ ɩ-faar na bɛ maal'ɩ wob a ƴãw: tɩtɩblʋ nɩ tub na kpɛ faar a.

⁵Bɛ bɛ mɩ́ tɩ zɔrɛ nɩbaalʋ bibiir kʋb ƴãw ɛ, ɛ́ maalɛ cuw dɩb nɩ a nɩsaal ƴã-gã-nɛn nɩ a zɩ̃ɩ tɩ lãwnɩ a pʋ-bome. A bawli bɛ ŋa tɩ pʋɔ nɩ lãw-sɔwlɩ kãw pʋɔ.

⁶A sãà mɩnɛ bɛ ŋa na tɩ kʋrɛ a bɛ bibiir na kʋ̃ tʋ̃ɔ́ zɛb faa bɛ tʋɔra a, fʋ tɩ bɔbr'a kɛ́ fʋ ƴãw a tɩ sãàkʋm-kore kʋ bɛ pàw pɛr.

⁷Fʋ tɩ bɔbr'a k'aa tẽw ʋl, fʋ na nɔnɛ zuo tẽw za a, de nɩ-paalɛ na na kpɩɛr a ʋ pʋɔ a, Naaŋmɩn bibiir na sɛw taa nɩ a ʋ kpɛb a.

⁸Ɛcɛ a nɩbɛ bɛ ŋa tɛɛ za a, fʋ zɔ n bɛ nɩbaalʋ, bɛ na tɩ ɩ nɩsaalbɛ a ƴãw. Fʋ ƴãw na vurkperi[46], na na kʋ bɛ bɩɛlbɩɛl pàw pɛr a, de a fʋ zɛbr-nɩbɛ niwn.

⁹Yel-mɩŋa n'a, fʋ nãá tʋ̃ɔ́ na de a nɩ-faar bɛ ŋa ƴãw a nɩ-mɩn nuru pʋɔ zɛb-been pʋɔ, bɩɩ ƴãw dʋ̃-faar sãw bɛ bɛr gb'a been daadaa, bɩɩ fʋ sãw bɛ bɛr nɩ ƴɛ̀rʋ na bɛ tɛr nɩbaal-zɔba a.

¹⁰Ɛcɛ bɩɛlbɩɛl'a fʋ tɩ wul a fʋ mɩnʋ, kɛ́ fʋ bɛr bɛ vuo bɛ sàw a bɛ sãwna. Ɛcɛ a bɛ tɩ kaar mɛ̃ fʋ bɛ bãw kɛ́ nɩsaal-faa-pɛr bʋʋrɛ nɛbɛ ɩ, kɛ́ bɛ lãw na dɔw nɩ a bɛ faalʋ ɛ, nɩ k'aa bɛ tɩɛrʋ bɛ be za nãà lɩɛbɩ ɛ.

¹¹Bʋ̃ʋ n'ʋ vɛ̃, nɩ-bʋʋrɛ bɛ na ŋmɛ ƴãw a nɛbɛ a tib daar za[47]. Nɩr kãw za dɛ̃bɩ̃ɛ ƴãw bɛ n'a fʋ bɛ tɩ dɔwrɩ bɛ a bɛ yel-bebe zũú ɛ.

¹²Bʋ̃ʋ n'ʋ vɛ̃, ãa n'ʋ na sàw sowre kɛ́ fʋ manɩ a fʋ ɩb pɛr? Ãa n'ʋ na tʋ̃ɔ́ yel k'aa lɛ fʋ na yel a kʋ̃ ɩ? Ãa n'ʋ na bʋɔlɩ fʋ ƴɛ̀rʋ zie, fʋ na sãw nɩ-bʋʋrɛ fʋ̃ʋ mɩŋa na ír a bɛr a? Ãa n'ʋ na sàw ìr àr ƴɛ̀rʋ zie a fʋ ƴãw, k'ʋʋ ƴɛ̀r faa nɩbɛ na sãw a?

¹³Naaŋmɩn bɛ lɛb be be a bɛ ɩ a fʋ̃ʋ na kaarɛ bom za zie, fʋ nãá tɩ wul k'aa ƴɛ̀rʋ fʋ na dɩ a tu n mɩnʋ ɛ.

¹⁴Nãà kãw za nɩ zu-sob kãw za mɩ̀ bɛ lɛb be be na tʋ̃ɔ́ bà gbɛ́r a fʋ niŋé, k'ʋʋ ƴɛ̀r faa a bɛlɩ dem fʋ na dɔwrɛ a ɩ.

¹⁵Fʋ na ɩ mɩŋa sob a n'a so, Sore e, fʋ kaarɛ a tẽ-daa zie nɩ mɩnʋ. Fʋ na na dɔwrɩ nɩr na bɛ sɛwnɩ dɔwrʋ a, fʋ nyɛ̃ na a bɛ sɛw taa nɩ a fʋ kpɛnʋ ɛ.

¹⁶Bʋ̃ʋ n'ʋ vɛ̃, a fʋ fãw n'ɩ a fʋ mɩnʋ yib zie, ɛ́ fʋ̃ʋ na n'ʋ so bom za a, fʋ kaarɛ nɩ a za zie nɩ nɔ̃wfʋ.

¹⁷Fʋ mɩ́ wul'ɩ a fʋ fãw na bɛ tɛr ʋ tɔ a, a sob nɛ na bʋ́nɛ nɩ ʋ a, ɛ́ sob nɛ na saa bãw a fʋ fãw, ɛ́ bɔbr fʋ nɔhaarʋ a, fʋ mɩ́ ɩ na ʋ pàw a ʋ nʋɔr.

¹⁸Fʋ na bãw a fʋ fãw tɛrʋ a, fʋ mɩ́ dɩrɛ nɩ a ƴɛ̀rʋ zʋmnɛ nɩ, ɛ́ kaarɛ a tɩ zie nɩ su-ɓaarʋ yaga. Ɛcɛ fʋ tɛr'ɩ a bom ɩb fãw, lɛn daar za fʋ na mɩ́ bɔbr a.

¹⁹À à ŋá fʋ na ɩ a, fʋ wul'ɩ a fʋ nɩ-bʋʋrɛ k'aa fɛr'a k'aa nɩ-mɩŋa nɔnɛ a nɩsaalbɛ. Fʋ ɩ na a fʋ bibiir tɛr tɩɛrʋ yaga za, fʋ na ɩ kɛ̀ bɛ tʋ̃ɔ́ mɩ́ zawrɩ a bɛ yel-bebe bɛr a.

²⁰Tʋɔra-nyɔwfʋ nɩ su-ɓaarʋ yaga n'a fʋ tɩ dɔwr'ɩ a fʋ bibiir dɔ̃ dem, bɛl na saa tɩ sɛwnɩ kũu a. Fʋ tɩ bɔbr'a kɛ́ fʋ kʋ̀ bɛ daar nɩ vuo, bɛ zawrɩ a faa bɛr.

²¹Ɛcɛ fʋ tɩ tɛr'ɩ maal-ɩb zuo lɛ dɩ n a fʋ bibiir a ƴɛ̀rʋ, fʋ̃ʋ na tɩ maal'ɩ a bɛ sãàkʋm-kore wõ-taa, ƴãw nʋɔr pɔ kɛ́ fʋ na kʋ̀ bɛ nɩ bʋ̃-vɩɛlɩ pɛ-bʋʋrɛ za a.

²²A na ɩ à ŋá a, a tɩ wulu ƴãw a, fʋ dɔwrɛ nɩ a tɩ dɔ̃ dem zʋmnɛ nɩ, kɛ́ tɩ mɩ́ lɛb tɩɛrɛ a fʋ nɔ̃wfʋ a lɛn daar tɩ na mɩ́ wa dɩrɛ ƴɛ̀rʋ a, ɛ́ tɩɛrɛ a fʋ su-ɓaarʋ fʋ na mɩ́ wa dɩrɛ nɩ tɩ ƴɛ̀rʋ a.

²³Alɛ n'a so a bɛlɩ dem na tɩ vʋʋrɩ nyɔ-vʋʋr-faa a bɛ dãbolu pʋɔ a, fʋ ɩ bɛ wõ tuo. A dʋ̃-faar al na bɛ tɛr ŋmɛ̃a ɛ́ bɛ tɩ puore a, alɛ n'a fʋ tɩ ɩ n bɛ bɛ wõ a tuo.

²⁴Bɛ tɩ bɔr'ɩ a bɔrʋ sɔ́r zu tɩ zãá bɛ gbʋ́r ɛ, mɩ́ tɩ de a dʋ̃-faar nɩ a dʋ̃-jewri za na bɛ tɛr ŋmɛ̃a bʋɔlɛ ŋmɩmɛ, bɛr a tuli bɛ mɛ̃ bibiir na bɛ tɛr yã a.

²⁵Lɛ n'a, mɛ̃ bibiir na bɛ tɛr yã a, fʋ ƴãw bɛ dɔwrʋ kɛ́ fʋ ɩ bɛ la.

²⁶Ɛcɛ a bɛlɩ dem na bɛ tɩ bãw a dɔwr-pʋrɩ ŋa pɛr a, nãà nyɛ̃ nɩ ƴɛ̀rʋ-dɩb na sɛw taa nɩ Naaŋmɩn dem a.

²⁷A dʋn al na tɩ kʋrɛ bɛ suur a, tɩ ɩrɛ na a kpɩɛr bɛ, a al bɛ na tɩ bʋɔlɛ a ŋmɩmɛ a tɩ dɔwrɛ bɛ na. Lɛ n'a a bɛ mimie tɩ yuo, bɛ bãw k'aa Naaŋmɩn-sɩza n'ɩ a ʋl bɛ na tɩ dãw zawrɩ bɛr a. Lɛ so a dɔwrʋ na bɛ tɛr ʋ tɔ a lo a bɛ zu.