Read Dagara, Northern Yã-bãwfʋ 14 Bible Online

Yã-bãwfʋ 14 - Dagara, Northern bible

Yã-bãwfʋ 14

¹Kãw mɩ̀ n'ɩ ŋan cɔbrɛ k'ʋʋ kpɛ gbor-kpɛ̃ɛ duwri a kʋ̃ɔ-kpɛ̃ɛ kʋ̃ɔ-mie na bɛ dɩ̃ɛnɛ a zu. Ʋ zɛlɛ nɩ sõwfʋ dà-ŋmãa[49] zie, dà-ŋmãa na bɛ tɛr fãw man a gbor-kpɛ̃ɛ na na tɛr ʋ cen nɩ a ɩ.

²Nɩr'ʋ tɩ bɔ a gbor-kpɛ̃ɛ ŋa tɔnɛ ƴãw, ɛ́ nuru tõ-tone na bãw tome a, maal'ʋ.

³Ɛcɛ, tɩ Sãà a, a fʋ nɔ̃wfʋ na mɩ́ de niwn cɔbrɩ bom za a n'ʋ dãanɛ ʋ. Fʋ puo nɩ sɔ́r kʋ̀ ʋ a kʋ̃ɔ-kpɛ̃ɛ zu, sɔrle na bɛ tɛr bʋnʋ a, a kʋ̃ɔ-mie pʋɔ.

⁴À ŋá n'a fʋ wul kɛ́ fʋ mɩ́ tʋ̃ɔ́ na faa nɩr yel-faa za pʋɔ, ʋlɛ saa kpɛ a gbor-kpɛ̃ɛ ɛ́ bɛ bãw a kʋ̃ɔ-kpɛ̃ɛ a.

⁵Fʋ bɔbr'a k'aa fʋ Yã-bãwfʋ bʋ̃-maalɩ tɛr yel-ɩra. Alɛ n'a so a nɩsaalbɛ mɩ́ tʋ̃ɔ́ de a bɛ nyɔ-vʋʋrʋ ƴãw dàa bʋ̃-maala zaa pʋrɩ ƴãw, ɛ́ kpɛ gbor-cãpile tɔl kʋ̃ɔ-mi-bɛrɛ bɛrɛ pʋɔ yi, ɛ́ bom bɛ ɩ bɛ ɩ.

⁶À à ŋá n'a a tɩ ɩ a pɛr-tib daar, a lɛn daar a nɩ-kɛrɩ jarmam jarmam na ɩrɛ pɔ̀lʋ a na tɩ kpi pàw pɛr a. A bɛlɩ dem ƴãw a tẽ-daa na tɩ ƴãw a ʋ tɩɛrʋ a, tɩ nyɛ̃ nɩ sɔwlʋ zie gbor kãw pʋɔ a fʋ nũu na tɩ dãanɛ a. Fʋ tɩ kaa bɛ na bɛ kʋ̀ nɩ-bʋʋr-paala pɛr a tẽ-daa[50].

⁷Dàa na sɛwnɩ danʋ a n'ɩ a dàa ʋl na lɩɛbɩ a fʋ mɩnʋ tõ-tõ-bom a!

⁸Ɛcɛ ŋmɛ-ƴãw, a páw a tɩɩb nɩ a tɩɩb-pɛnɛ na pɛnɩ ʋ nɩ a ʋ nuru a: a páw a tɩɩb-maalɛ ʋ na maal'ʋ a ƴãw, ɛ́ páw a tɩɩb, bɛ na bʋɔl'ʋ ŋmɩn a ƴãw, ʋʋ ɩ dàa tɛwr na na wɛ a.

⁹Bʋ̃ʋ n'ʋ vɛ̃, a lɛ a Naaŋmɩn na hɩ̃ɛn a nɩ-faa a, lɛ tɔr za n'a ʋ hɩ̃ɛn a ʋ faalʋ:

¹⁰ʋ mɩ́ lãw na dɔwrɩ a tɩɩb nɩ a tɩɩb-pɛnɛ.

¹¹Sɩza, a Naaŋmɩn na ìr'ɩ a nɩ-bʋʋrɛ tɩbɛ ƴãw, bʋ̃ʋ n'ʋ vɛ̃, a na saa pʋɔ a ʋ bʋ̃-íri pʋɔ a, a lɩɛb'ɩ bʋ̃-faar na bɛ tɛr a taabɛ a a ʋ niŋé. A ɩrɛ na a nɩsaalbɛ farɛ lore, a ɩ n bɛrɩ a dãbole gbɛ́ɛ pile.

¹²A nɩsaalbɛ na wa tĩ tɛr a tɩbɛ pɛnʋ tɩɛrʋ a n'a, bɛ tĩ a Naaŋmɩn zawr-bɛrʋ. A bãwfʋ ŋa n'ʋ sãw a nyɔ-vʋʋrʋ bɛr.

¹³A pɛr-tib daar a, a tɩbɛ bɛ tɩ ka be ɩ, ɛ́ kʋ̃ be be kʋralɛ ɩ.

¹⁴A nɩsaalbɛ bʋ̃-zawlɛ sàw-deb zũú n'a a tɩbɛ kpɛ a tẽ-daa, alɛ n'a so a kʋ̃ yaa kɛ́ bɔr fɔ̃wlɛ ɩ.

¹⁵Sãà kãw bidɛb pʋ̃ɔ na kpi, a ɩ ʋ kpɩɛrʋ bɛ dɩ vuo ɩ, ʋ̀ ƴãw bɛ maalɩ a ʋ bie na dãwnɩ kũu zuo a dasule. Lɛ n'a, a sob nɛ na tɩ ɩ kũu a, ʋ tĩ ƴãwnɛ ʋ mɛ̃ ŋmɩn a, ɛ́ lʋɔrɩ yel-sɔwlɩ nɩ ɩ-ɩrɩ kʋ̀ a ʋ nɩbɛ.

¹⁶À ŋá n'a bɛ tɛr lɛɛɛ, a ɩ-faa ŋa tɩ ɩ nʋɔr bɛ tuur. Lɛ mɩ̀ cãà n'a, na-mɩnɛ tɩ ƴãw bɛ puore a bɛ dasuli bɛ na pɛnɩ a.

¹⁷Fʋ na mɩ́ tɩ zãá kʋ̃ tʋ̃ɔ́ ƴãw a na-mɩnɛ bɛ ŋa a bɛ niŋé a, fʋ mɩ́ tɩ maal'ɩ a nãà fʋ na ƴãwnɛ a dasule fʋ na na tʋ̃ɔ́ mɩ́ nyɛ̃ a. Lɛ n'a fʋ mɩ́ tʋ̃ɔ́ tʋlɛ a nãà na bɛ be a fʋ zie a ƴãwfʋ ƴãw, mɛ̃ ʋ be n be a.

¹⁸Mɔ̃ mɩ̀, a bɛlɩ dem na saa bɛ tɩ bãw a nãà ŋa a, a ʋ dasule bãw-maalɛ na bɔbr a lɛ a zũú n'a a ʋ puoru tɛr tɩ yɛ̀r.

¹⁹A dasule bãw-maalɛ ŋa na tɔ̃w tɩ bɔbr k'ʋʋ ɩ a pɛlɩ a nãà pʋɔ a, ʋ tɩ tõ n nɩ a ʋ bãwfʋ za, maalɩ dasule na vɩɛl zuo a lɛ a nãà na sɩrɩ ŋmɛ̃ a.

²⁰Lɛ n'a a bʋ̃-maala vɩɛlʋ tɩ bɛlɩ nyɔw a zu-sɛbla, bɛ tĩ gbine dume puore a sob nɛ bɛ na tɩ dãw ƴãwnɛ mɛ̃ nɩsaal a.

²¹Kũu bɛra tɩ n'ʋ a nɩsaalbɛ ƴãw, bʋ̃ʋ n'ʋ vɛ̃, a kpɩɛrʋ bɩɩ a naalʋ-dɩb zũú, bɛ tɩ kʋ̀ n a yúor Naaŋmɩn yõ na so a kʋsɛbɛ bome bɩɩ dàar bome.

²²Lɛb waar, a tulu bɛ na tuli a Naaŋmɩn bãwfʋ pʋɔ a bɛ sɛw bɛ ɩ. Zɛb-faar na yi a bɛ zɔnʋ zie a pʋɔ n'a bɛ vʋʋrɛ, ɛ́ bʋɔlɛ a yel-faar á ŋá kɛ́ ƴã-ɓaarʋ.

²³Bɛ kʋrɛ nɩ bibiir maalɛ nɩ bagɛ, ɛ́ tɛr tub-sɔwlɩ, bɛ maalɛ nɩ cuwr bɛ na mɩ́ bʋ̀nɛ ɩrɛ a be a.

²⁴Bɛ bɛ cãà ƴãwnɛ a nɩsaal nyɔ-vʋʋrʋ ɛ, mɩ̀ bɛ lɛb ƴãwnɛ a kul-taa vɩɛlʋ ɛ. Nɩsaal mɩ́ mɩl'ɩ ʋ nɩsaal-tɔ tɩ kʋ, bɩɩ nyɔw a ʋ pɔw gã nɩ ƴãw ʋ kpɩɛrʋ.

²⁵A yele za bʋnɩ na nyaw taa: zɩ̃ɩ-ciru, nɩ-kʋ, nyãnyuwlu, bɛ̀lɩ-taa, nʋɔr-ŋmɛb, libelibe, damnʋ, pɔ-ziri,

²⁶nɩ-mɩn dɔwrʋ, barka yee, nyɔ-vʋʋrʋ na sãw a, dɛb mɩ́ gã nɩ ʋ dɛb-tɔ, pɔw gã nɩ ʋ pɔw-tɔ, kul-taa bɛ cãà tu sɔ́r ɛ, pɔw-gaa yel-bebe nɩ pɩ̃ɔ-ɩb.

²⁷Yel-mɩŋa n'a, a tɩbɛ na bɛ tɛr yúor póru a puoru n'ɩ a yel-faa za tib zie. Ʋlɛ n'ʋ so a yel-faa, ɛ́ ʋlɛ n'ʋ wa n a yel-faa.

²⁸A bɛlɩ dem na puore a tɩbɛ á ŋá a, a bɛ zu mɩ́ dam'ɩ a bɛ ƴã-cɩrʋ pʋɔ, bɩɩ bɛ mɩ́ ƴɛ̀rɛ nɩ naaŋmɩn-ƴɛ̀r-man-ziri ƴɛ̀rʋ, bɛ mɩ́ bʋnɩ na vʋʋrɛ bɩɩ bɛ mɩ́ yaa kɛ́ lɩɛbɩ a bɛ pɔɛ bɛr ɛ.

²⁹Bɛ na ƴãw a bɛ tɩɛrʋ tɩbɛ na bɛ vʋʋrɛ a ƴãw a, bɛ bɛ tɩɛrɛ kɛ́ bɛ na nyɛ̃ nɩ dɔwrʋ a bɛ pɔ-ziri ƴãw ɛ.

³⁰Ɛcɛ a dɔwrʋ nãà wa páw bɛ nɩ yele ayi ƴãw: a dãw-niwn sob, bɛ na tuli a Naaŋmɩn ƴãw tu tɩbɛ a. A ayi sob, bɛ na jewri a bʋ̃-son bɛlɩ pɔ pɔ-ziri a.

³¹Bɛlɛ saa kʋ̃ zɔrɛ a tɩbɛ bɛ na pɔ n a fãw a, a yel-bebe dem dɔwrʋ n'ʋ na páw a bɛlɩ dem na mɩ́ sãw a sãwna ŋa tɔ a kʋralɛ.