Read Dagara, Northern Yã-bãwfʋ 15 Bible Online

Yã-bãwfʋ 15 - Dagara, Northern bible

Yã-bãwfʋ 15

¹Ɛcɛ fʋ̃ʋ a, tɩ Naaŋmɩn i, fʋ ɩ n nɩ-vla ɛ́ ŋmɛ̃ fʋ ŋmɛ̃a, fʋ bɛ páwr ɛ, ɛ́ kaarɛ a yele za zie nɩ su-ɓaarʋ.

²Tɩmɛ saa maalɛ yel-bebe a, fʋ̃ʋ cãà so tɩ, bʋ̃ʋ n'ʋ vɛ̃, tɩ sàw na kɛ́ fʋ̃ʋ so bom za. Ɛcɛ tɩ kʋ̃ maalɩ yel-bier ɛ, tɩ na bãw kɛ́ fʋ sɔ́r tɩ na ƴãw a fʋ nɩbɛ pʋɔ a.

³Bʋ̃ʋ n'ʋ vɛ̃, à bãw ãa nɛ b a, ʋlɛ n'ʋ waar'ɩ a mɩnʋ na vɩɛl ʋ za a, ɛ́ à sàw kɛ́ fʋ̃ʋ n'ɩ bom za sore a, ʋlɛ n'ɩ a nyɔ-vʋʋrʋ na be kʋralɛ a.

⁴A nɩsaal bʋ̃-maalɩ a bãw-bãw-faar na mɩ́ maalɩ a, nɩ a bɛlɩ dem na mɩ́ bʋ́lɛ dasuli nɩ a sãáfʋ bʋʋrɛ al za, a cãà na mɩ́ ɩ a bome a sãá a tõ-zawla a, a bɛ tuli tɩ ɛ.

⁵A dãbole na mɩ́ nyɛ̃ a bʋ̃-maalɩ á ŋá taabɛ a, ƴãw mɩ́ cɩ́rɛ bɛ na, ɛ́ mɩ́ ƴãw bɛ a dasul-kũu ŋa vʋla, dasule na bɛ damnɛ a.

⁶A bɛlɩ dem na bine a tɩbɛ á ŋá, bɩɩ bɔbr a, bɩɩ puore a a, nɔnɛ nɩ a faa bɛ za, ɛ́ sɛwnɩ a bom nɛ a tɩɛr-zawlɛ á ŋá taabɛ na bin gùre nɩ bɛ a.

⁷Yawr-mɩɛrɛ n'ɩ ŋan naw ʋ yawra hanɩ nɩ, mɛ n bʋ̃-pɛ-bʋʋrɛ bʋʋrɛ tɩ na mɩ́ tɛr tone nɩ bibie za a. A yawr-been nɛ nɩ a mɛb-been nɛ n'a ʋ mɩ́ mɛ n bome a bibi-bɛrɛ yel-maalɩ ƴãw, ɛ́ mɛ a mɩnɛ a bibie za yel-maalɩ ƴãw. Ɛcɛ a ʋl yawr-mɩɛrɛ n'ʋ mɩ́ yel bom nɛ bɛ na na ɩrɛ nɩ bom ŋa za a[51].

⁸Al pùorí, ʋ mɩ̀ cãà na de a yawr-been nɛ mɛ n ŋmɩn-bɛlɛbɛlɛ, nyɛ̃ bàlʋ ʋ na bàl ʋ tʋɔra zawla a! A ʋl na yi tẽsɔw pʋɔ daar yɩ̃ɛ ŋa, ɛ́ kʋ̃ yaa kɛ́ lɛb kpɛ a tẽsɔw pʋɔ bɛ na ír ʋ a, a lɛn daar bɛ na na yel k'ʋʋ lɛb tɩr a sɩ́ɛ bɛ na pɛ̃w ʋ a, ʋlɛ n'ʋ ɩ à à ŋá.

⁹Ʋ bɛ tɩɛrɛ a ʋ nyɔ-vʋʋrʋ na ɩ ŋmãalɛ a ɩ, nɩ ʋ na kʋ̃ yaa kɛ́ kpi a ɩ, ɛ́ bɛr ɛ́ tone ciere nɩ salm-zɩɛ nɩ salm-pla tõ-tonbɛ, ɛ́ cɔwrɛ kur-zɩɛ nyɩlbɛ. Ʋ tɩɛr kɛ́ yúor'ʋ ʋ páwr a bʋ̃-bɛlɛbɛlɛ mɛb pʋɔ.

¹⁰Tãpɛlʋ tɛwr'ɩ a ʋ socir, a bom nɛ ƴãw ʋ na ƴãw a ʋ tɩɛrʋ a bɛ ta a tẽsɔw tanɛ ɩ, ɛ́ a ʋl mɩŋa nyɔ-vʋʋrʋ bɛ ta a yawra dàarʋ ɛ.

¹¹Bʋ̃ʋ n'ʋ vɛ̃, ʋ bɛ bãw a Sob nɛ na mɛ ʋ a ɩ, a sob nɛ na pɛblɩ pɩɛlʋ ɩ sɩ́ɛ na tone a kpɛ a ʋ pʋɔ, ʋʋ kʋ̀ ʋ vʋʋrʋ na ɩ ʋ vʋʋrɛ a ɩ.

¹²Ʋl zie a, a tɩ nyɔ-vʋʋrʋ ɩ n bibi-dɩ̃ɛnʋ, ɛ́ a tɩ beba ɩ da-kpɛ̃ɛ, libi-yaga bɔb zie. Ʋ mɩ́ tɩɛr'ɩ ʋ pʋɔ à ŋá: «A fɛr'a k'ɩ̃ɩ ír tɔnɛ a za pʋɔ, alɛ saa ɩ a faa pʋɔ a.»

¹³A nɩr ŋa bãwnɩ a nɩ vla zuo nɩr za, k'ʋʋ maalɛ nɩ yel-bier, ʋ na de a tẽsɔw tanɛ mɩɛr'ɩ bome na na ŋmɛr a, ɛ́ mɩ̀ lɛb mɩɛr'ɩ tɩbɛ a.

¹⁴Ɛcɛ Sore e, a fʋ nɩ-bʋʋrɛ dɔ̃ dem a, a bɛl na tɩ dãw dɔwrɩ bɛ a, bɛ wul'a kɛ́ dãbol-bɛrɛ nɛbɛ, bɛ bɛ tɛr yã man bibi-cãpile ɩ.

¹⁵Bɛ de nɩ a nɩ-bʋʋr-yoru tɩbɛ za a ɩ ŋmɩmɛ: a tɩbɛ á ŋá tɛr'ɩ mimie[52] ɛ́ bɛ nyɛrɛ ɩ, tɛr nyɔbɔgɛ ɛ́ bɛ vʋʋrɛ ɩ, tɛr tobe ɛ́ bɛ wone ɩ, tɛr nobie ɛ́ kʋ̃ tɔ bom ɛ, tɛr gbɛ́ɛ ɛ́ kʋ̃ cen ɛ.

¹⁶Bʋ̃ʋ n'ʋ vɛ̃, nɩsaal'ʋ maalɩ a: nyɔ-vʋʋr-pɛ̃wna n'ʋ bɛ pɛ̃w a sob nɛ na maalɩ a a. Ɛcɛ nɩsaal kãw za kʋ̃ tʋ̃ɔ́ maalɩ ŋmɩn ʋ ŋmɛ̃ taa nɩ ʋ ɛ.

¹⁷Nɩsaal na ɩ bʋ̃-kpiira a n'ʋ, ɛ́ bʋ̃-kũu yõ n'ʋ a ʋ nuru ʋ na maalɛ nɩ a faa a na tʋ̃ɔ́ maalɩ. Ʋl mɩŋa zuo nɩ a bome ʋ na puore a: ʋl nɩ̃ɛ na sa mɩ́ vʋʋrɩ ta tab kãw, ɛcɛ a al bɛ be na ɩ bʋ̃-vʋʋrɩ ɛ.

¹⁸A nɩbɛ bɛ ŋa puore na tɩ lãwnɩ a dʋ̃-jewri za, a al na bol zuo a taabɛ za a.

¹⁹Vɩɛlʋ zaa pʋrɩ bɛ mɩ́ sãá a pʋɔ ɩ, vɩɛlʋ na na tʋ̃ɔ́ mɩ́ ɩ fʋ nɔnɛ a mɛ̃ a dʋn a mɩnɛ a ɩ. Naaŋmɩn bɛ sàw de a ɩ, ɛ́ mɩ̀ bɛ kʋ̀ a a ʋ maalʋ ɛ.