Read Dagara, Northern Yã-bãwfʋ 16 Bible Online

Yã-bãwfʋ 16 - Dagara, Northern bible

Yã-bãwfʋ 16

¹Alɛ n'a so dʋn a mɩnɛ tɩ ƴãw dɔwrʋ mɛ̃ a na sɛw a, a bɛlɩ dem na puore a dʋn a. Dʋ̃-yaga yaga tɩ ɩ na a kpɛ bɛ.

²Ɛcɛ Sore e, fʋ tɩ faa nɩ a fʋ nɩ-bʋʋrɛ a dɔwrʋ ŋa tɔ ƴãw, ɛ́ maalɩ bɛ vla za: a kɔ̃ na bɛ tɩ bɛrɛ bɛ a ɓãafʋ ƴãw a, fʋ tɩ cɔbr'ɩ bʋ̃-dɩ-nʋ̃ɔ̀ kãw a bɛ ƴãw, caparapɩɩr'a[53].

³À ŋá n'a a fʋ dɔ̃ dem na saa tɩ bɔbr a bʋ̃-dɩrɩ a, bɛ tɩ tɛr a dɩb vʋla kãw za ɩ, a dʋn na ɩrɛ kɔkɔrʋ bɛ na tɩ ƴãw a wa a bɛ ƴãw a zũú. Ɛcɛ a fʋ nɩbɛ tɩ páw nɩ bʋ̃-dɩ-nʋ̃ɔ̀, kɔ̃ blãlɛ pùorí.

⁴A tɩ fɛr'a kɛ́ kɔ̃-faa faa lo a nɩ-dɔwrbɛ zu. Ɛ́ a fʋ nɩ-bʋʋrɛ a, a tɩ sɛw bɛ na, bɛ na nyɛ̃ a lɛ a bɛ dɔ̃ dem na wone a tuo a.

⁵A dʋ̃-faar faar na bɛ dɩ̃ɛnɛ a na saa tɩ ìr a fʋ nɩ-bʋʋrɛ ƴãw nɩ suur, ɛ́ wɩɩr na tɩ vure gõgole kʋ nɩ-yaga a bɛ pʋɔ a, a fʋ suur bɛ tɩ ta a ʋ tab zie kʋ bɛ pàw pɛr ɛ[54].

⁶A bɛ kpãàfʋ ƴãw a, fʋ tɩ sàw na dɛ̃bɩ̃ɛ kpɛ bɛ bibie blãlɛ. Al pùorí, fʋ tɩ kʋ̀ bɛ nɩ faafʋ bãwfʋ, kɛ́ bɛ tʋ̃ɔ́ cãà bãwnɩ a wulu nɛ-ƴãwnɩ.

⁷Bʋ̃ʋ n'ʋ vɛ̃, sob nɛ na mɩ́ tɩ ŋmɛlɩ kaa a bãwfʋ ŋa a, mɩ́ tɩ nyɛ̃ nɩ a faafʋ, a bɛ ɩ a bom ʋ na jɩ́r a zũú ɛ, ɛ́ ɩ a fʋ̃ʋ zũú, fʋ̃ʋ na ɩ a nɩsaalbɛ za Faarɛ a.

⁸À ŋá n'a fʋ tɩ wul a tɩ dɔ̃ dem kɛ́ fʋ̃ʋ n'ʋ mɩ́ faa yel-faa za pʋɔ.

⁹Ɛcɛ a bɛl a, a sãsoge nɩ a nakpon[55] tɩ dʋ̃ bɛ na kʋ. Bɛ bɛ tɩ nyɛ̃ tɩ̃ɩ kãw za na na tʋ̃ɔ́ sanɩ bɛ, bɛ cãà vʋʋrɛ a ɩ, bʋ̃ʋ n'ʋ vɛ̃, bɛ tɩ sɛw na taa nɩ k'aa dʋn á ŋá taabɛ dɔwrɩ bɛ.

¹⁰Ɛcɛ a fʋ bibiir a, wɩɩr na tɛr lɔw a bɛ tɩ tʋ̃ɔ́ kʋ bɛ pàw pɛr ɛ, bʋ̃ʋ n'ʋ vɛ̃, fʋ tɩ zɔ n a bɛ nɩbaalʋ, sõw bɛ ɛ́ sanɩ bɛ.

¹¹A wɩɩr tɩ gɔ́rɛ bɛ na kɛ́ bɛ cãà bãwnɩ a fʋ ƴɛ̀rʋ. Ɛcɛ bɛ tɩ nyɛ̃ nɩ faafʋ fɔ̃wlɛ, kɛ́ bɛ ta yiiri bom za bɛr ɛ, ɛ́ cãà páwr a fʋ yel-vɩɛlɩ.

¹²Váar bɩɩ kãá bɛ n'a tɩ sanɩ bɛ ɩ, a fʋ Ƴɛ̀rʋ n'ʋ, Sore e, a fʋ Ƴɛ̀rʋ na mɩ́ sanɩ bom za a.

¹³Bʋ̃ʋ n'ʋ vɛ̃, fʋ̃ʋ so a nyɔ-vʋʋrʋ nɩ a kũu, fʋ̃ʋ n'ʋ mɩ́ ɩ a nɩbɛ siw a kpɩmɛ tẽw, ɛ́ ɩ bɛ yi a be do wa.

¹⁴Nɩsaal na tʋ̃ɔ́ na kʋ a ʋ po-tuolu zũú, ɛcɛ ʋ kʋ̃ tʋ̃ɔ́ ɩ a vʋʋrʋ na yi a, ʋ lɛb wa ɩ, ɛ́ kʋ̃ tʋ̃ɔ́ faa sɩ́ɛ a kpɩmɛ tẽw na de a ɩ.

¹⁵Sore e, nɩr za kʋ̃ tʋ̃ɔ́ nɩɩrɩ a fʋ fãw bɛr ɛ.

¹⁶A bɛlɩ dem na tɩ zawrɩ na bãw fʋ a, fʋ tɩ ŋmɛ bɛ na nɩ a fʋ kpãkpã-kpɛ̃w: saa na waar gbʋrʋgbʋrʋ a, sa-bi-kube nɩ sa-bɛrɛ na ɩrɛ dɛ̃bɩ̃ɛ a wa n a bɛ ƴãw, ɛ́ vũu kʋ bɛ pàw pɛr.

¹⁷Ɛ́ yel ŋa n'ʋ pãa ɩ nɔ-ɓãan: a kʋ̃ɔ na kpiire bom za a pʋɔ a, a vũu tɩ dɩrɛ nɩ 'helem'helem! Bʋ̃ʋ n'ʋ vɛ̃, a tẽ-daa zɛbr'ɩ a nɩ-mɩn ƴãw!

¹⁸Naaŋmɩn i, vuo kãw a, a vũu-zɛlɛ mɩ́ tɩ lo na, k'aa ta dɩ a dʋn fʋ na ƴãw a wa a fʋ dɔ̃ dem ƴãw a ɩ, nɩ k'aa ɩ bɛ nyɛ̃ a fʋ ƴɛ̀rʋ-dɩb na ta tu bɛ a.

¹⁹Vuo kãw a, a vũu mɩ́ tɩ dɩrɛ na, dɩrɛ a kʋ̃ɔ tɔr za sɔwlɩsɔw, dɩrɛ zuo a lɛ ʋ na mɩ́ dɩrɛ a, k'ʋʋ sãw a tẽ-faa ŋa bʋ̃-dieri bɛr.

²⁰Ɛcɛ, fʋ nɩ̃ɛ na kʋ̀ malkɩ mɩnɛ dɩb[56] a fʋ nɩ-bʋʋrɛ. Fʋ tɩr'ɩ bʋ̃-dɩra na cɔbrɩ ʋ za a, ʋ yi a salom zu siw, ɛ́ a fʋ nɩ-bʋʋrɛ bɛ bàl bɛ tʋɔra ɩ, bʋ̃-dɩra na tɛr nʋ̃ɔ̀ bʋʋrɛ za, ɛ́ nʋmɛ man a lɛ ŋa za na mɩ́ bɔbr k'ʋʋ nʋmɛ a.

²¹A bʋ̃-dɩra ŋa na tɩ yi a fʋ zie a, tɩ wule nɩ a fʋ su-baalʋ a fʋ bibiir. Ʋ mɩ́ tɩ nʋmɛ na mɛ̃ a lɛ a sob nɛ na dɩrɛ ʋ a na bɔbr k'ʋʋ nʋmɛ a, ɛ́ mɩ́ tɩ lɩɛbɩ bom nɛ a sob na bɔbr k'ʋʋ ɩ a.

²²Ʋ na saa tɩ ŋmɛ̃ taa nɩ sa-pupure bɩɩ kʋ̃ɔ-kuur a, ʋ tɩ tʋ̃ɔ́ nɩ a vũu bɛ mɩ́ nyɩl a vũu pʋɔ ɩ. À ŋá n'a a tɩ fɛr k'aa fʋ nɩ-bʋʋrɛ bãw a lɛ a vũu na tɩ sãw a dɔ̃ dem bʋ̃-dieri bɛr a, a vũu ŋa na tɩ dɩrɛ a sa-bi-kube pʋɔ ɛ́ ɩrɛ pʋ̀rpʋ̀rpʋ̀r a saa pʋɔ a.

²³Ɛcɛ a vũu-been ŋa na tɛr fãw sãwnɛ bom za a, fãw mɩ́ tɩ baar'a, k'ʋʋ tʋ̃ɔ́ ɩ a nɩ-mɩn páw a bɛ bʋ̃-dɩrɩ.

²⁴A bʋ̃-íri za cɔbr'a gù a fʋ tome tob, fʋ̃ʋ na ɩ a Íre a: a ɩ na mɛ̃ tam a, mɩ́ dúori a nɩ-faar dɔwrʋ ƴãw, ɛ́ siwri a bɛlɩ dem na ƴãw a bɛ tɩɛrʋ a fʋ ƴãw a maalʋ ƴãw.

²⁵Alɛ n'a so a mɩ́ tʋ̃ɔ́ lɩɛbɩ lɩɛb-pɛ-bʋʋrɛ za: a tɩ be n a bʋ̃-kʋ̀ra ŋa na yi a fʋ zie a tome tob ƴãw, a bʋ̃-kʋ̀ra ŋa na na guoli a nɩbɛ za, ʋ na mɩ́ sàw a lɛ za a bɛlɩ dem na tɛr a ʋ yel-ɩra a na bɔbr a.

²⁶Sore e, yel ŋa n'ʋ a tɩ fɛr k'aa fʋ bi-nɔnɩ bãw a ka: bʋ̃-dieri páwfʋ tɛwr bɛ n'a guole a nɩsaal ɛ, a fʋ Ƴɛ̀rʋ n'ʋ, ʋl na mɩ́ ɩ a bɛlɩ dem na sàw de fʋ a, bɛ vʋʋrɛ a[57].

²⁷A bʋ̃-dɩra ŋa vũu na bɛ tɩ sãwnɛ bɛrɛ a, mʋ̃tɔ̃w tʋlʋ zaa pʋrɩlɛ mɩ́ tɩ ɩ na ʋ nyɩl[58].

²⁸À ŋá n'a fʋ tɩ bɔbr kɛ́ fʋ wul tɩ kɛ́ tɩ mɩ́ dãw a mʋ̃tɔ̃w a fʋ yãanɩ puoru ƴãw, ɛ́ mɩ́ puori fʋ a zie vɩɛfʋ daar.

²⁹Ɛcɛ a sob nɛ na bɛ bãw barka puoru a, a ʋ tɩɛrʋ na nyɩl'a mɛ̃ ƴawr daar sa-pupure a, ʋ na gbɔl'a tɔl mɛ̃ kʋ̃ɔ na bɛ tɛr yel-ɩra a.