Read Dagara, Northern Yã-bãwfʋ 18 Bible Online

Yã-bãwfʋ 18 - Dagara, Northern bible

Yã-bãwfʋ 18

¹Ɛcɛ a ʋlɩ daar nɛ a, cãà na nyɩwrɛ a n'ʋ tɩ caalɛ a nɩbɛ fʋ na so a. A bɛ dɔ̃ dem tɩ wone nɩ a bɛ kɔkɛɛ, ɛ́ bɛ mɩ́ tɩ nyɛ̃ bɛ ɩ. Bɛ tɩ yere na kɛ́ a fʋ nɩbɛ páw nɩ zu-nʋ̃ɔ̀, bɛ na bɛ wone a tuo mɛ̃ a bɛl a.

²Bɛ tɩ puore nɩ a nɩbɛ fʋ na so a barka, bɛ na bɛ tɩ dɔwrɩ bɛ yáa a san a ƴãw, ɛ́ tɩ zɛlɛ bɛ kɛ́ bɛ dɩ suur kʋ̀ bɛ, bɛ na tɩ ɩ dɔ̃-ɩb a bɛ zie a ƴãw.

³Vũu na ɩ mɛ̃ kpul a n'ʋ fʋ tɩ kʋ̀ a nɩbɛ fʋ na so a, lɩɛr'ɩ a lige, k'ʋʋ tɛr bɛ tu n sɛ́ɛ bɛ na bɛ bãw a[60]. Ʋ tɩ ɩ na mɛ̃ mʋ̃tɔ̃w na bɛ dɩrɛ a, na tɩ bɩɛlɛ bɛ a bɛ cenu ŋa na tɛr yúor a pʋɔ.

⁴Ɛcɛ a dɔ̃ dem bɛl a, bɛ tɩ sɛwnɩ nɩ a cãà bɛ-páwfʋ, nɩ a lige gaso pʋɔ beba, bʋ̃ʋ n'ʋ vɛ̃, a bɛl tɛɛ za tɩ nyɔw nɩ a fʋ bibiir bɛ ɩ gaso-nɩbɛ. Ɛcɛ a fʋ bibiir zie n'a a tẽ-daa tɩ sɛw k'ʋʋ páw a wulu cãà na bɛ tɛr kpiiru daar a.

⁵A fʋ nɩ-bʋʋrɛ dɔ̃ dem tɩ yel'a kɛ́ bɛ kʋ a nɩbɛ fʋ na so a bi-pɩɩlɛ. A bɛl a na tɩ sɛw kɛ́ bɛ kpi a pʋɔ a, been yõ n'ʋ tɩ nyɛ̃ a faafʋ. A bɛ dɔwrʋ ƴãw a, fʋ tɩ ír'ɩ a bɛ bibiir yaga yaga a bɛ zie, ɛ́ a bɛl tɛɛ za a, fʋ tɩ ƴãw na a kʋ̃ɔ-kpɛ̃ɛ kʋ̃ɔ-mie na ìre nɩ fãw a, lãw vɔl bɛ za[61].

⁶Fʋ tɩ dãw na yel a tɩ̃ɩsɔw ŋa yele kʋ̀ a tɩ sãàkʋm-kore[62], kɛ́ bɛ tʋ̃ɔ́ ɓãá ƴãw cɩlɛ. Bʋ̃ʋ n'ʋ vɛ̃, bɛ tɩ nyɛ̃ na k'aa nɛ́ɛ al ƴãw bɛ na tɩ ƴãw a bɛ tɩɛrʋ a bɛ tɛr bʋnʋ ɛ.

⁷A fʋ nɩ-bʋʋrɛ tɩ bãwnɩ a na, k'aa tɩ̃ɩsɔw ŋa na wa n nɩ faafʋ a nɩ-mɩn ƴãw, ɛ́ wa n a bɛ dɔ̃ dem loba.

⁸Bʋ̃ʋ n'ʋ vɛ̃, a alɩ bome nɛ fʋ na tɩ dɔwr'ɩ a tɩ dɔ̃ dem a, alɛ n'a fʋ tɩ zɛw nɩ a tɩ yúor, bʋɔlɩ tɩ a fʋ zie.

⁹A nɩ-mɩn bibi-son tɩ sɔwlɛ na maalɛ bagɛ. Bɛ tɩ wõ n taa, ɛ́ sàw tu a Naaŋmɩn nʋɔr na yere k'aa ʋ nɩ-sori na lãw nɩ a yel-vɩɛlɩ nɩ a yel-faar na jɩɛrɛ bɛ a, ɛ́ tɩ tĩ cɛ a danʋ yielu al a sãàkʋm-kore na mɩ́ tɩ yiele a.

¹⁰A dɔ̃ dem cɛlsɩ na ŋmɛ nyaw taa a mɩ́ tɩ sɔw bɛ na. A ziir za a, a bɛlɩ dem na kone a bɛ bibiir a cɛlsɩ tɩ n'a bɛ wone.

¹¹Dɔwrʋ been n'ʋ tɩ páw a gbãgbaa nɩ a zu-sob, 'wɔbrʋ been n'ʋ tɩ 'wɔbr a nɩ-zawla nɩ a nãà.

¹²Bɛ za tɩ lãw na tɛr kũuni na bɛ tɛr nʋɔr a. Bɛ za tɩ kpiir'ɩ a kũu-been nɛ. A nɩ-vʋʋrɩ na cɛ a bɛ tɩ saalɩ a kũuni ũufʋ ƴãw ɛ, bʋ̃ʋ n'ʋ vɛ̃, a bɛ bi-nɔnɩ nɔnɩ za tɩ lãw na kpi a pɛr nɛ pʋɔ.

¹³Wa tɩ tɔ a lɛn daar a, a nɩbɛ bɛ ŋa bɛ tɩ cɛlɛ kpãàfʋ kãw za zie ɩ, a bɛ tɩtɩlbɛ ɩ-ɩrɩ zũú[63]. Ɛcɛ a bɛ bidɛb-dãw-dɔwrɩ na wa kpi a, bɛ tɩ fɛr'a sàw k'aa Ɩsɩrayɛl nɩ-bʋʋrɛ ɩ n Naaŋmɩn bibiir.

¹⁴A tɩ̃ɩsɔw tɩ põ na zɛ̃ taa ɛ́ a zie tɩ ŋmãa vʋʋrʋ cɩ̃ɩɩ a ziir za.

¹⁵Bɛ wa bere na a fʋ Ƴɛ̀rʋ na ɩ kpɛnʋ-za-sob a yi a fʋ naalʋ-dà-kɔw pɛr, a salom zu, siw fɔ̃wlɛ a tẽ-ŋmɛ-ƴãwna ŋa sɔwlɩsɔw, mɛ̃ zɛbr-nɩr na bɛ zɔrɛ nɩbaalʋ a.

¹⁶A lɛ fʋ na yel, ɛ́ a bɛ lɩɛbɛ bɛrɛ a, tɩ n'ɩ a zɛbr-sɔ-kpɛ̃ɛ na dɩrɛ ʋ na tɛr a. A ʋ zu tɩ tɔ n a salom, ɛ́ a ʋ gbɛ́ɛ nɛbr a tẽw. Ʋ tɩ àr'a ɛ́ ƴãw a kũu a ziir za.

¹⁷Daadaalɛ, a nɩbɛ tɩ zánɩ nɩ zán-faar faar na ƴãw bɛ pʋl-vʋ̃ɔ na bɛ tɛr manʋ a.

¹⁸Bɛ tɩ lo lo na kpi cɛ ŋmãa a ziir ziir, ɛ́ tɩ manɛ a bɛ kũu pɛr:

¹⁹bʋ̃ʋ n'ʋ vɛ̃, a zánʋ al na tɩ vʋ̃ɔ bɛ a pʋ̀lá a tɩ de nɩ niwn yel a yel ŋa kʋ̀ bɛ, kɛ́ bɛ taa wa kpiir ɛ́ bɛ bãw a bɛ kpɩɛrʋ pɛr ɛ.

²⁰A fʋ nɩ-sori mɩ̀ tɩ lɛm'ɩ a kũu kaa. Bɛ tɩ kʋ n nɩ-yaga yaga a bɛ pʋɔ a wɛja-kpalɛ pʋɔ. Ɛcɛ a fʋ suur bɛ tɩ kɔwrɩ ɛ, Sore e[64].

²¹Bʋ̃ʋ n'ʋ vɛ̃, nɩr na bɛ tɛr sãwna a[65] tɩ ìr'ɩ fɔ̃wlɛ k'ʋʋ piw bɛ tɛr: ʋ tɩ de nɩ a zɛbr bome na ɩ a ʋ bàwr-maalɛ tõ-nʋɔr zɛbr bome a, a puoru nɩ a tɩ-suur-zɔ̃-na-nyùur-vla-vla-a de-kʋ̀b, k'ʋʋ páw nɩ a yel-bebe suur-dɩ-kʋ̀b. Ʋ tɩ ìr'a tori a fʋ suur, ɛ́ ɩ a kpɩɛrʋ baarɩ, wul k'ʋʋ ɩ n a fʋ tõ-tõ-bie.

²²Ƴã-gan kpɛ̃w nɩ zɛbr bome fãw bɛ n'a ʋ tɩ tʋ̃ɔ́ nɩ a fʋ suur ɛ: a ƴɛ̀rʋ n'a ʋ tɩ tʋ̃ɔ́ nɩ a sob nɛ fʋ na tɩ tõ ʋ ƴãwnɛ a dɔwrʋ a, ʋ na tɩ lɛb yel a nɛ́ɛ al fʋ na tɩ ƴãw kʋ̀ a tɩ sãàkʋm-kore a nɩ a wõ-taa al fʋ na tɩ maal'ɩ bɛ a.

²³A kũuni tɩ gbone nɩ taa baarɩ, a lɛ a nɩr ŋa na tɩ kpɛ a kũu na kʋrɛ a nɩ a nɩbɛ cara pʋɔ ɩ ʋ tɛw àr, ʋʋ piw ʋ a nɩ-vʋʋrɩ zie sɔ́r a.

²⁴A tẽ-daa za bãwfʋ tɩ be n a ʋ bàwr-maalɛ kpar-kpɛ̃ɛ-wogo zu. A sãàkʋm-kore yée na tɛr danʋ a tɩ wi na ƴãw kʋsɛ-bi-nyɩlɩ na pɩɛrɩ gbɛlɛ anaar a zu, ɛ́ a fʋ na ɩ kpɛ̃ɛ a bãwfʋ be a ʋ zu-pɛn-vila zu[66].

²⁵A Kʋ-pàw-pɛr[67] na tɩ nyɛ̃ a lɛ a, dɛ̃bɩ̃ɛ tɩ nyɔw ʋ na, ʋ lɛb pùor. Bʋ̃ʋ n'ʋ vɛ̃, a fʋ nɩbɛ tɩ bãw nɩ a lɛ a fʋ suur na ŋmɛ̃ a, ɛ́ a tɩ man.