Read Dagara, Northern Yã-bãwfʋ 19 Bible Online

Yã-bãwfʋ 19 - Dagara, Northern bible

Yã-bãwfʋ 19

¹Ɛcɛ, a fʋ suur na bɛ bãw nɩbaalʋ zɔba a tɩ lo n a nɩ-faar zu, tɩ ta a ʋ baarʋ zie. Bʋ̃ʋ n'ʋ vɛ̃, fʋ tɩ de nɩ niwn bãw a bom ʋl bɛ na na ɩ a:

²a dɔ̃ dem na bɛr'ɩ a fʋ nɩbɛ bɛ cen, ɛ́ ƴãw bɛ a sɔ́rɩ́ fɔ̃wlɛ. Al pùorí, a bɛ tɩɛrʋ na lɩɛb'a, bɛ ìr ta tu bɛ[68].

³Yel-mɩŋa n'a, a lɛ bɛ na tɩ cãà be a wahala pʋɔ, àr kɔw a bɛ kũuni yarʋ kone a, lɛn daar'a bɛ tɩ nyɛ̃ yã-yũo, yã na bɛ tɛr pɛr a: a nɩbɛ bɛl bɛ na tɩ lɔb nuru zɛlɩ kɛ́ bɛ cere a, bɛ tɩ ìr'a ta tu bɛ mɛ̃ nɩbɛ na zɔrɛ a.

⁴A lɛ a na tɩ fɛr k'aa ɩ a bɛ zie, ɛ́ bɛ sɛw taa nɩ mɩ́ a, tɩ ƴãw na bɛ ɩ a ɩb ŋa, ɛ́ yiiri a bom nɛ na tɩ dãw ɩ a. A tɩ fɛr'a kɛ́ bɛ páw a dɔwrʋ tɩ tɔ, ɛ́ bom ta cɛ a bɛ kpɩɛrʋ pʋɔ ɩ.

⁵Lɛ n'a a fʋ nɩ-bʋʋrɛ nãá cen cenu na bɛ tɛr ʋ tɔ a, ɛ́ a bɛl kpi kũu-bɩɛ bɩɛ.

⁶Bʋ̃ʋ n'ʋ vɛ̃, fʋ tɩ lɛb'a mɛ a bʋ̃-íri za na sàwr a fʋ nʋɔr a, ŋa nɩ ʋ ŋmɛ̃a, ŋa nɩ ʋ ŋmɛ̃a, kɛ́ faa za ta páw a fʋ bibiir ɛ.

⁷Bɛ tɩ nyɛ̃ nɩ a zũzuwr ʋ pàw a fʋ nɩbɛ laɩ nɩ a ʋ ɓaarʋ, ɛ́ tẽsɔw-kõw pur yi be kʋ̃ɔ na tɩ dãw be a. A Kʋ̃ɔ-kpɛ̃ɛ-zɩɛ tɩ lɩɛb'ɩ sɔr-ɓobee, ɛ́ a kʋ̃ɔ-mie na ìre nɩ fãw a lɩɛbɩ tɩ̃tal na sɔb tĩtĩ a.

⁸Be n'a a fʋ nɩ-bʋʋrɛ za tɩ tu tɔl, a fʋ nũu piw bɛ tɛr, ɛ́ bɛ tɩ dɩ nɔ-ɓãa-yele dãsɩɛ.

⁹Bɛ tɩ yɛ́r'a pàw a zie mɛ̃ wie na àr mʋ̃ɔ 'wɔbrʋ zie a, bɛ tɩ ƴawr'a cɩrkarɛ mɛ̃ péli a, danɛ nɩ fʋ, Sore e, fʋ̃ʋ na tɩ faa bɛ a.

¹⁰Bɛ tɩ cãà na lɛb bãwnɩ a yele na tɩ ɩ a lɛn daar bɛ na tɩ be tẽ-yũo pʋɔ a: a tẽw tɩ bɛr'ɩ a dʋn tɩrʋ, ɛ́ tɩr dʋ̃-dʋnɩ, ɛ́ a man bɛr a zʋ́mɛ́ tɩrʋ, ɛ́ ow lɔn na bɛ dɩ vuo a[69].

¹¹Al pùorí, bɛ tɩ nyɛ̃ nɩ lili-bʋʋr-paala kãw, a lɛn daar a kɔ̃ na tɩ cã bɛ ƴãw bɛ zɛlɩ bʋ̃-dɩ-nʋ̃ɔ̀ nʋ̃ɔ̀ a.

¹²Lɛ n'a caparapɩɩr[70] tɩ yi a kʋ̃ɔ-kpɛ̃ɛ pʋɔ do a bɛ tɩwfʋ ƴãw.

¹³Ɛcɛ dɔwrʋ n'a tɩ lo a yel-bebe dem zu, ɛ́ saa na nyɩwrɛ tanɛ nɩ kpɛ̃w za a, tɩ n'ɩ a bãwfʋ na de niwn a. A nɩbɛ bɛ ŋa tɩ nyɛ̃ nɩ dɔwrʋ na sɛw taa nɩ bɛ a, bʋ̃ʋ n'ʋ vɛ̃, a hɩ̃ɛnʋ bɛ na tɩ hɩ̃ɛn a nɩ-sãan a[71] tɩ kpɛ n faa bɛ tɛr manʋ ɛ.

¹⁴Sɩza n'a, a dãwdãw a, a Sodɔm tẽw dem bɛ tɩ sàw tuori de nɩbɛ bɛ na bɛ bãw a na tɩ ta a ɩ[72]. Ɛcɛ a bɛl a, bɛ tɩ ɩ na nɩ-sãanbɛ na tɩ maalɩ bɛ vla a lɩɛbɩ gbãgbaar[73].

¹⁵Sɩza n'a, dɔwrʋ cɛlɛ nɩ a bɛlɩ dem na tuori nyɔw a nɩ-sãanbɛ mɛ̃ dɔ̃ dem a.

¹⁶Bʋ̃ʋ n'ʋ vɛ̃, bɛ tɩ maal'ɩ cuw a nɩbɛ na ta paalʋ a ƴãw, ɛ́ ƴãw bɛ tɛr sɔ́r ɩrɛ mɛ̃ a bɛl mɩŋa a, ɛ́ a pùorí bɛ dĩ nɩ bɛ tõ-kpɛn kpɛn.

¹⁷Alɛ n'a so zɔnʋ mɩ́ tɩ nyɔw bɛ, mɛ̃ a Sodɔm tẽw nɩbɛ na tɩ àr a nɩ-mɩŋa Lɔtɩ dɩ̃dɔrɩ́ a: liw-lige varkpara tɩ pili na pàw bɛ, ɛ̀ ŋa za mɩ́ tɩ bɔblɛ bɔbr a ʋl mɩŋa yir dɩ̃dɔr[74].

¹⁸A korijom fomie kɔkɛɛ na saa mɩ́ ɩ dẽdeni a, a mɩ́ lãw nɩ taa ŋmɛ zʋkpa-bʋʋrɛ bʋʋrɛ za. Lɛ mɩ̀ n'a, a lɛn daar a, a tẽ-daa bʋ̃-íri tɩ lãw nɩ taa, lãw-taa kãw na ɩ paala a. Fʋ̃ʋ maal jɩ́r a lɛ a na tɩ ɩ a lɛn daar a, a yel ŋa sãá nɩ cãàmɩlɛ:

¹⁹tẽw zu dʋn tɩ lɩɛb'ɩ kʋ̃ɔmɩ́ dʋn[75], ɛ́ a al na duwre kʋ̃ɔmɩ́ a[76] cere a tẽsɔw-kõw zu.

²⁰A vũu mɩ́ tɩ lɛb'a bãw dɩrɛ kpɛ̃w za a kʋ̃ɔmɩ́, ɛ́ a kʋ̃ɔ bɛ mɩ́ tɩ tɛr fãw na kpiiri a vũu ɛ[77].

²¹Ɛcɛ a dʋ̃-vɛlvɛl[78] na mɩ́ tɩ cɔlɛ viire a vũu zɛlɛ sɔwlɩsɔw a, a vũu zɛlɛ bɛ tɩ mɩ́ dɩ a ƴã-gamɛ ɩ, ɛ́ a mɩ̀ bɛ mɩ́ tɩ ɩ a Naaŋmɩn bʋ̃-dɩra ʋ[79] nyɩl ɛ, ʋl na ɩ mɛ̃ kʋ̃ɔ-kuur na mɩ́ nyɩl mɔlɛ mɔlɛ lɛ a.

²²Sore e, a za pʋɔ a, fʋ zɛw nɩ a fʋ nɩ-bʋʋrɛ, ɩ a bɛ yúor yi. Kʋralɛ nɩ ziir za a, fʋ àr'a kɔw bɛ.