Read Dagara, Northern Yã-bãwfʋ 3 Bible Online

Yã-bãwfʋ 3 - Dagara, Northern bible

Yã-bãwfʋ 3

¹A nɩ-mɩn sɩ́ɩr be n a Naaŋmɩn nũú, ɛ́ kpɩɛrʋ kãw za bɛ lɛb páwr bɛ ɩ.

²A dãbole zie a, bɛ tɩ sɩrɩ na ɩ mɛ̃ bɛ kpi na a, ɛ́ a bɛ kulu ɩ mɛ̃ wɛb'a bɛ wɛ a,

³ɛ́ a bɛ na zãá nɩ tɩ a ɩ bɔr-liwliw bɛ bɔr. Ɛcɛ bɛ nɩ̃ɛ na be a Naaŋmɩn ƴã-ɓaarʋ pʋɔ.

⁴A nɩsaalbɛ zie, alɛ saa tɩ ɩ dɔwrʋ n'a bɛ dɔwrɩ bɛ a, ɛcɛ bɛl tɩ tɩɛrɛ nɩ yaga za, kɛ́ bɛ na páw nɩ a nyɔ-vʋʋrʋ na bɛ kpiir a.

⁵A bɛ tuo bɛ tɩ bibli a nʋ̃ɔ̀-kpɛ̃ɛ bɛ na na páw a ɩ[7]. A Naaŋmɩn ɩ bɛ na kaa, ɛ́ nyɛ̃ bɛ sɛw taa nɩ ʋ.

⁶Ʋ ɩ bɛ na kaa mɛ̃ salm-zɩɛ bɛ na zuw ír a[8], ʋ sàw na de bɛ mɛ̃ nyɩw-a-za-bàwr de-kʋ̀b bom a.

⁷A daar ʋl a Naaŋmɩn na ƴãw a ƴɛ̀rʋ-maalʋ ƴãw wa ta a, bɛ na nyɩwrɛ nɩ pɩnpɩn, bɛ na ɩ na mɛ̃ vũu-zɛli na nyɔw mɔ̃-kon dɩrɛ lʋɔrɛ a.

⁸Bɛ na dɩ n nɩ a ten ƴɛ̀rʋ[9], ɛ́ so a nɩ-bʋʋrɛ, ɛ́ a Sore na ɩ n a bɛ nãà kʋralɛ.

⁹A bɛlɩ dem na ƴãw a bɛ tɩɛrʋ a ʋ ƴãw a na bãw nɩ a yel-mɩŋa. A bɛlɩ dem na tu a nɔ̃wfʋ bɛ lɛb pùor a na be n a ʋ zie. Bʋ̃ʋ n'ʋ vɛ̃, maalʋ nɩ su-ɓaarʋ mɩ́ n'a a ʋ nɩ-kaa-íri ƴãw.

¹⁰A nɩ-faar bɛl a, bɛ na páw nɩ a dɔwrʋ na sɛw taa nɩ a bɛ tɩɛrʋ a, bɛ na jewri a nɩ-mɩŋa ɛ́ zawrɩ a Sore bɛr a ƴãw.

¹¹Bʋ̃ʋ n'ʋ vɛ̃, a bɛlɩ dem na bɛ ŋmɛlɛ kaar a Yã-bãwfʋ nɩ a ʋ wulu a, baw-bio dem nɛbɛ. Bɛ bɛ mɩ́ ƴãw a bɛ tɩɛrʋ bom za ƴãw ɛ, zawlalɛ n'a bɛ mɩ́ bàlɛ bɛ tʋɔra ɛ́ a bɛ tome bɛ tɛr pɛr ɛ.

¹²A bɛ pɔwbɛ bɛ bãw yã ɩ, ɛ́ a bɛ bibiir kpɛ po-tuo. Ŋmɛ-ƴãw na páw nɩ a bɛ bʋ̃-dɔwrɩ za.

¹³Zu-nʋ̃ɔ̀ sob nɩ̃ɛ n'ɩ a pɔw-ãan[10] na bɛ tɛr dɛwr, ɛ́ ʋlɛ nɩ dɛb bɛ lãw taa lãwfʋ na ciir a pʋɔ a! Ʋ na nyɛ̃ nɩ maalʋ a ƴɛ̀rʋ-dɩb bibir.

¹⁴Zu-nʋ̃ɔ̀ sob mɩ̀ n'ɩ a dɛ-vár na bɛ maalɩ faa, ɛ́ bɛ tɛr tɩɛr-faar a Sore ƴãw a: a ʋ pùor-bɛ-lɛbrʋ zũú, ʋ na páw nɩ maalʋ na be ʋ tʋɔra a: ʋ na tɛr'ɩ zie ʋ na nyɛrɛ ƴãwfʋ a, a Sore Yir-kpɛ̃ɛ pʋɔ[11].

¹⁵Bʋ̃ʋ n'ʋ vɛ̃, sob nɛ na tone a vla ƴãw a, mɩ́ wɔ̃ n wɔmɛ na vɩɛl a, sob nɛ ɩb na tu a Yã-bãwfʋ a, ɩ na mɛ̃ tɩɛ a nyɩgɛ na bɛ kpiir a.

¹⁶Ɛcɛ a sɛ̃sɛ̃-biir kʋ̃ ɩ nɩbɛ ɩ, ɛ́ a bibiir bɛ na dɔw lãwfʋ na bɛ tu a wulu a pʋɔ a na bɔr a.

¹⁷Bɛlɛ saa vʋʋrɩ kɔwrɩ a, nɩr za kʋ̃ nɔ̃w bɛ ɩ, ɛ́ a bɛ koru daar a, bɛ na jewre bɛ na tɩ ta n a bɛ kũu daar.

¹⁸Ɛ́ bɛlɛ wa ɩ pɔ̀lɛ ɛ́ kpi a, bɛ kʋ̃ ƴãw a bɛ tɩɛrʋ bom kãw za ƴãw ɛ. Bɛ kʋ̃ nyɛ̃ mɔwlʋ kãw za a ƴɛ̀rʋ-dɩb bibir ɛ.

¹⁹Bʋ̃ʋ n'ʋ vɛ̃, a bɛlɩ dem na maalɛ a faa a baarʋ ɩrɛ nɩ dɛ̃bɩ̃ɛ!