Read Dagara, Northern Yã-bãwfʋ 5 Bible Online

Yã-bãwfʋ 5 - Dagara, Northern bible

Yã-bãwfʋ 5

¹Lɛ n'a a nɩ-mɩŋa na ìr àr saaƴẽwn, bɛ mĩin a ɩ, a bɛlɩ dem na tɩ dɔwrɩ ʋ a niŋé, nɩ a bɛlɩ dem na tɩ ɩrɛ ʋ laar, a fãw ʋ na tɩ ƴãw a vla maalʋ ƴãw a niŋé.

²Bɛlɛ wa nyɛ̃ ʋ a, dɛ̃bɩ̃ɛ na ɩrɛ bɛ na bɛ màwr, bɛ na bɛ tɩ tɩɛrɛ k'ʋʋ na nyɛ̃ nɩ a faafʋ a, nʋɔr na ɓãá bɛ na ʋ na nyɛ̃ a faafʋ a.

³Pʋl-vʋ̃ɔ na nyɔw bɛ na bɛ kone, bɛ na yere na kɛ́ bɛlɛ tɩ bãw kɛ́ lɛ, bɛ kʋ̃ʋ tɩ ɩ a lɛ bɛ na ɩ a ɩ, ɛ́ bɛ na yere nɩ à ŋá kʋ̀rɛ taa:

⁴«A nɩr ʋl tɩ na tɩ dãw ɩ la a n'ʋ, a ʋl tɩ na tɩ kpɔwrɩ la a. Dãbole tɩ n'ɩ tɩ! Tɩ tɩ nyɛ̃ nɩ a ʋ nyɔ-vʋʋrʋ ʋ ɩ yãya-ɩb, ɛ́ a ʋ kũu ɩ vĩ-kũu.

⁵Ƴɛrɛŋa a, ʋlɛ n'ɩ ŋa pʋɔ a Naaŋmɩn bibiir pʋɔ, ʋ lãw nɩ nɩ a malkɩ mɩnɛ a yúor-vɩɛlʋ-danʋ pʋɔ!

⁶A na ɩ à à ŋá a, tɩmɛ nɛbɛ bɔr zãá nɩ a yel-mɩŋa sɔ́r. A mɩnʋ cãà bɛ caalɩ a tɩ nyɔ-vʋʋrʋ ɛ, a mʋ̃tɔ̃w bɛ pur a tɩ ƴãw ɛ!

⁷A faalʋ na sãwnɛ bom za bɛrɛ a sɔr'ʋ tɩ tɩ lo cen bɛ gbʋ́r ɛ, tɩ tɩ cɔlɩ nɩ wɛja-kpalɩ na bɛ tɛr sɛ́ɛ a. Ɛcɛ tɩ bɛ tɩ bãw a Sore sɔ́r ɛ.»

⁸«A tɩ na tɩ ɩrɛ a, a yel-ɩra n'ɩ bo? A naalʋ tɩ na tɩ pɔrɛ nɩ a, bʋ̃ʋ n'a a ɩ kʋ̀ tɩ?

⁹À á ŋá za bɔr'a mɛ̃ ɓaarʋ a, mɛ̃ yel bɛ na yiiri bɛr fɔ̃wlɛ a.

¹⁰Tɩ ŋmɛ̃ na mɛ̃ gbor-kpɛ̃ɛ na tʋ̃ɔ̀nɛ kʋ̃ɔ na damnɛ a zu a, nɩr bɛ nyɛrɛ a ʋ tɔlʋ pɔl ɛ: a ʋ pɛr bɛ bɛrɛ pɔl a kʋ̃ɔ-mie zu ɛ.

¹¹Tɩ ŋmɛ̃ na mɛ̃ lile na mɩ́ ƴaw do a saa-zu a, nɩr bɛ nyɛrɛ a ʋ pɔl bãwfʋ kãw ɛ: a ʋ pɩgɛ n'a ʋ ŋmɩɛr'ɩ a pɩɛlʋ, ʋ mɩ́ ɓar ʋ na nɩ fãw puo sɔ́r. Ɛcɛ a pùorí a, bãwfʋ kãw za bɛ wule k'ʋʋ tɔl'ɩ a be ɩ.

¹²Tɩ ŋmɛ̃ na mɛ̃ pĩi bɛ na tɛ k'ʋʋ tɩ nyɔw bom a. A pɩɛlʋ ʋ na cɩɛrɩ a mɩ́ lɛb'a taw pàw daadaalɛ, kɛ̀ nɩr bɛ bãw a sɔ́r ʋ na tu a ɩ.

¹³À ŋá n'a tɩ mɩ̀ ŋmɛ̃: tɩ mɩ́ dɔwr'a wa báarɛ ɛ́ bɔr, tɩ bɛ mɩ́ bɛr a tɩ ɩ-vɩɛlɩ pɔl kãw za a tɩ pùorí ɛ: a tɩ faalʋ mɩ́ ɩ na tɩ bɛ tɛr pɛr ɛ.»

¹⁴Yel-mɩŋa n'a, a bom nɛ a nɩ-faar na tɩɛrɛ a ɩ na mɛ̃ ur sɛsɛb na mɩ́ ɓáw cen nɩ a, bɩɩ mɛ̃ kʋ̃ɔ-puuru saa-sɛsɛb na diw a. A bom nɛ bɛ na tɩɛrɛ a mɩ́ bɔr'a mɛ̃ zʋ̀ʋ́r sɛsɛb na de cere nɩ a, mɛ̃ sãan na gã sãanbɛ-yir bibi-been bɛ yiiri a ʋ tɔlʋ bɛr a.

¹⁵Ɛcɛ a nɩ-mɩn mɩ́ vʋʋrɛ nɩ kʋralɛ. A Sore zie n'a a bɛ sã-ya mɩ́ yi, a Naaŋmɩn-na-do-saa-bɛ-pɩɛl-a n'ʋ kaarɛ a bɛ zie.

¹⁶Alɛ so, a Sore nũú n'a bɛ na páw a naalʋ kpawɔ-vla vla, a naalʋ na tɛr yúor a bãwfʋ. Bʋ̃ʋ n'ʋ vɛ̃, a ʋ dʋrʋ nũu na piw bɛ na tɛr, a ʋ kpãkpã-kpɛ̃w na zɛb'a faa bɛ.

¹⁷A tʋlʋ ʋ na tʋlɛ a na ɩ n a ʋ zɛbr bom, a ʋ bʋ̃-íra na lɩɛb'ɩ zɛbr bom a ʋ dɔ̃ dem diwfʋ ƴãw.

¹⁸Ʋ na su n a mɩnʋ mɛ̃ zɛbr-nyãa-kpale a. A ƴɛ̀rʋ-dɩb na tu yel-mɩŋa a na ɩ n kpawɔ-kpow ʋ vɔblɩ.

¹⁹A ʋ sonu na bɛ tɛr tʋ̃ɔ́fʋ a n'ʋ na ɩ a zɛbr-kur-pãgala,

²⁰ɛ́ a ʋ suur na bɛ ɓãanɛ a ɩ zɛbr-sɔ-kpɛ̃ɛ na dɩrɛ a[16]. A tẽ-daa za na wa na wa lãw nɩ ʋ zɛbr'ɩ a dãbole.

²¹A saa-nyɩwrʋ na yi n a zũzuge pʋɔ ɛ́ wɩɛr a bom ƴãw, mɛ̃ tam na dúori vla a pime bɛ na jɩ́r vla ɛ́ tɛ a.

²²Sa-bi-kube na lore na nɩ suur, mɛ̃ kʋsɛbɛ bɛ na vãw nɩ kpala a. A kʋ̃ɔ-kpɛ̃ɛ kʋ̃ɔnɩ na ìr'ɩ a nɩ-faar ƴãw, ɛ́ a mamɛ kʋ̃ɔnɩ bɛr nɩbaalʋ ɛ́ vɔl bɛ.

²³Sɛsɛb na fure nɩ fãw a na ìr'ɩ a bɛ ƴãw, ɓáw bɛ cen nɩ mɛ̃ saa-sɛsɛb a. Lɛ n'a a faalʋ zũú, a tẽw za na lɩɛbɩ wɛja-kpalɛ, ɛ́ a ɩ-faa cã a fãw dem naalʋ-dà-kɔwr lɔb.