Read Dagara, Northern Yã-bãwfʋ 6 Bible Online

Yã-bãwfʋ 6 - Dagara, Northern bible

Yã-bãwfʋ 6

¹A na ɩ à ŋá a, nyɩɩm na-mɩnɛ ɛ, nyɩ bɛrɛ wone, ɛ́ bãw a pɛr! Nyɩɩm tẽ-daa kaarbɛ ɛ, nyɩ bɛr bɛ wule nyɩ.

²Nyɩ ƴãw tobr, nyɩɩm na so nɩ-yaga yaga, ɛ́ ɩrɛ pɔ̀lʋ nɩ nɩ-bʋʋr-yaga yaga nyɩ na tʋ̃ɔ́ a.

³A Sore zie n'a nyɩ páw a fãw, a Naaŋmɩn-na-do-saa-bɛ-pɩɛl-a n'ʋ kʋ̀ nyɩ a nɩ-kpɛ̃ɛnʋ[17], ɛ́ ʋlɛ n'ʋ na jɛl a nyɩ ɩ-ɩrɩ kaa, ʋ na kpɩwr'a bãw a nyɩ tɩɛrʋ.

⁴Nyɩ ɩ n a ʋ naalʋ tõ-tõ-biir, ɛcɛ nyɩ bɛ dɩ a ƴɛ̀rʋ a tu sɔ́r ɛ, nyɩ bɛ tu a nʋɔr ɛ, nyɩ bɛ ɩ a ɩb a tu a Naaŋmɩn pʋ-tɩɛrʋ ɛ.

⁵Alɛ so, ʋ na ur'a ìr a nyɩ ƴãw, bɛ tɛr dɩ̃ɛnʋ ɛ, bʋ̃ʋ n'ʋ vɛ̃, ƴɛ̀rʋ-dɩb na kpɛmɛ kpɛmɛ a na dɩ n a nɩ-yée ƴãw.

⁶Bɛ mɩ́ zɔ n a bãbàalbɛ nɩbaalʋ, ɛ́ dɩ suur kʋ̀ bɛ. Ɛcɛ dɩ̃ɛnʋ bɛ ka be a kpɛnʋ dem ɩb jielu pʋɔ ɩ.

⁷A nɩsaalbɛ za Sore kʋ̃ zɔ nɩr za ɩ, ʋ kʋ̃ yel kɛ́ nɩr na ɩ kpɛ̃ɛ a ƴãw ɛ. Ʋlɛ n'ʋ ír a bãbàalbɛ nɩ a kpɛnʋ dem, ɛ́ a lɛ ʋ na kaarɛ a bɛ zie a ɩ n been[18].

⁸Ɛcɛ yele sowru na kpɛmɛ a gùre nɩ a fãw dem.

⁹A na ɩ à ŋá a, nyɩɩm na-mɩnɛ ɛ, nyɩɩm zie n'a ɩ̃ ƴɛ̀rɛ, kɛ́ nyɩ tʋ̃ɔ́ zanɩ a Yã-bãwfʋ ɛ́ taa wa maalɛ yel-bebe ɩ.

¹⁰A bɛlɩ dem na sàwr a nɛ-son vla vla a, bɛ na yel'a kɛ́ nɩ-son nɛbɛ. A bɛlɩ dem na sàwr a wule bɛ a, na tʋ̃ɔ́ na ƴɛ̀r faa bɛ mɩŋa a ƴɛ̀rʋ-dɩb daar.

¹¹A na ɩ à ŋá a, nyɩ ƴãw fãw bɛrɛ wone a ɩ̃ wulu, nyɩ bɔbr ʋ tuotuo ɛ́ nyɩ na sɩrɩ na ɩ nɩbɛ bɛ na wul a.

¹²A Yã-bãwfʋ nyɩwrɛ nɩ nyɩwrʋ na bɛ báarɛ a. A bɛlɩ dem na nɔnɛ ʋ a, ʋ mɩ́ bɛr'a bɛ nyɛ̃ ʋ mɔlɛ lɛ, a bɛlɩ dem na bɔbr ʋ a, ʋ mɩ́ bɛr'a bɛ páw ʋ[19].

¹³Ʋ mɩ́ dãw nɩ a bɛ tɩɛrʋ, ɛ́ de niwn ɩ bɛ bãw ʋ.

¹⁴Sob nɛ na cɔ̃w ìr bɔbr ʋ a kʋ̃ nyɛ̃ bàlʋ ɛ: ʋ na nyɛ̃ ʋ na k'ʋ zɩ̃ a ʋ dɩ̃dɔr nʋɔr.

¹⁵À nɔnɛ a Yã-bãwfʋ vũuvũu n'ɩ a yã na bɩ tɩ tɔ a, ɛ́ sob nɛ na bɛr gʋ̃ɔ ɛ́ bɔbr ʋ a, a ʋ niw-sʋba kʋ̃ yaa kɛ́ baar ɛ.

¹⁶Bʋ̃ʋ n'ʋ vɛ̃, a Yã-bãwfʋ mɩ̀ mɩ́ cɔlɛ na bɔbr a bɛlɩ dem na sɛw taa nɩ ʋ a, ʋ mɩ́ wul bɛ nɩ ʋ tʋɔra nɩ nɔ̃wfʋ a bɛ sɛ́ɛ pʋɔ, ɛ́ kʋralɛ bɛlɛ wa tɛr a ʋ tɩɛrʋ a, ʋ mɩ́ cen na tuori bɛ.

¹⁷A Yã-bãwfʋ tib'ɩ fʋ na sɩrɩ bɔbr k'ʋʋ wule fʋ a[20].

¹⁸À bɔbr k'ʋʋ wule fʋ n'ɩ fʋ na nɔnɛ ʋ a. À nɔnɛ ʋ n'ɩ fʋ na tuur a ʋ nɛ́ɛ a. À tuur a ʋ nɛ́ɛ n'ɩ fʋ na bãwnɩ kɛ́ fʋ kʋ̃ kpi a.

¹⁹À fʋ na kʋ̃ kpi a mɩ́ ɩ na fʋ pɩɛlɩ a Naaŋmɩn.

²⁰A na ɩ à ŋá a, a Yã-bãwfʋ bɔb wɩɛr'ɩ nɩ a nɩsaal a naalʋ-dɩb.

²¹À na ɩ à ŋá a, a nyɩɩm, nɩ-bʋʋrɛ na-mɩnɛ, nyɩmɛ wa nɔnɛ a nyɩ naalʋ-dà-kɔwr nɩ a naalʋ-dɩb a, nyɩɩm ƴãwnɛ a Yã-bãwfʋ ɛ́ nyɩ na dɩrɛ nɩ naalʋ kʋralɛ.

²²Ɛcɛ bʋ̃ʋ n'ɩ a Yã-bãwfʋ ɛ́ nyɩnɛ n'a ʋ yi? Ɩ̃ na yel ʋ na kʋ̀ nyɩ, ɛ́ bɛ sɔwlɩ nyɩ yel-sɔwla kãw za ɩ. Ɩ̃ na lɛb'a bɩɛrɩ tɩ ta a ʋ beba tib zie. Ɩ̃ na wul'ɩ cãàmɩlɛ bom nɛ a na fɛr kɛ́ bɛ bãw a ʋ ƴãw a, ɩ̃ɩ kʋ̃ zãá nɩ a yel-mɩŋa ɩ.

²³Ɩ̃ kʋ̃ bɛr a nyuur na sãwnɛ yele a, ʋ tɛr mɛ̃ ɩ, bʋ̃ʋ n'ʋ vɛ̃, a nyuur nɩ a Yã-bãwfʋ bɛ lãw bom za ɩ.

²⁴Yã-bãwnbɛ yaga yaga mɩ́ faa nɩ a tẽ-daa, ɛ́ nãà na tɛr yã a, mɩ́ ɩ a ʋ nɩbɛ wone nʋ̃ɔ̀[21].

²⁵À na ɩ à ŋá a, nyɩ sàw a ɩ̃ ƴɛ̀rʋ wule nyɩ, ɛ́ nyɩ na nyɛ̃ nɩ tɔnɛ a pʋɔ.