Read Dagara, Northern Yã-bãwfʋ 7 Bible Online

Yã-bãwfʋ 7 - Dagara, Northern bible

Yã-bãwfʋ 7

¹A mãa mɩ̀ a, nɩsaal na ɩ bʋ̃-kpiira a nɛ m mɛ̃ a nɩsaalbɛ za a. A nɩsaal-dãw-niwn sob bɛ na mɛ n a tẽsɔw tanɛ a bʋʋrɛ nɛ m. Dɛb yɔ-kʋ̃ɔ n'a bɛ dɔw nɩ mɛ̃ nɔ̃w-taa nʋ̃ɔ̀ pʋɔ. Mã púorí n'a a ɩ̃ ƴã-gan mɛ. Cuwr piwaɩ a, a ɩ̃ mã zɩ̃ɩ ɩ na ʋ kpɛmɛ.

³A mãa mɩ̀ a, a ɩ̃ dɔwfʋ daar a, ɩ̃ ta n a tẽw zu, a tẽw na mɩ́ tuori nyɔw tɩ za a tuori-nyɔwfʋ been nɛ a. Ɩ̃ vʋʋr'ɩ a pɩɛlʋ na ɩ a tɩ za bom a, ɛ́ tɩ kõ cɩɩrɩ mɛ̃ a bi-pɩɩlɛ za a.

⁴Bɛ pili nɩ pɛnɛ pàw mɛ̃, ɛ́ kaa a ɩ̃ zie vla vla za.

⁵Nãà kãw za bɛ tĩ a ʋ beba tib-yũo ɩ.

⁶A nɩsaalbɛ za zie a, a nyɔ-vʋʋrʋ pʋɔ kpɛb ɩ n been, a nyɔ-vʋʋrʋ pʋɔ yib mɩ̀ ɩ been.

⁷Alɛ n'a so ɩ̃ puori, ɛ́ a Naaŋmɩn kʋ̀ m a yã. Ɩ̃ zɛlɩ nɩ yãayãa, ɛ́ a Yã-bãwfʋ vʋʋrʋ wa a ɩ̃ zie[22].

⁸Ɩ̃ nyɛ̃ ʋ na k'ʋ sa a naalʋ-dà-kɔw nɩ a naalʋ-dɩb. A ʋl ƴãw a, ɩ̃ nyɛ̃ nɩ a na-bome a bɛ tɛr pɛr ɛ.

⁹Ɩ̃ bɛ de ʋ man nɩ a kʋsɛ-bi-nyɩla ʋl na bɛ tɛr ʋ tɔ a ɩ. Bʋ̃ʋ n'ʋ vɛ̃, a tẽ-daa salm-zɩɛ za ɩ na mɛ̃ biire blã a ʋ niŋé a, ɛ́ a salm-pla ɩ mɛ̃ mɛ̃mɛrɛ a[23].

¹⁰Ɩ̃ nɔ̃w nɩ a Yã-bãwfʋ zuo a ƴã-ɓaarʋ nɩ a vɩɛlʋ, ɛ́ kaa ír ʋ ʋ ɩ a ɩ̃ cãà, a ʋ cãà na bɛ kpiire a ƴãw.

¹¹Ɛcɛ ʋlɛ n'ʋ ɩ̃ páw, lãw páw nɩ a na-bome za. Ʋ tɩ tɛr'ɩ na-bome na bɛ dɩ vuo a, a ʋ nuru pʋɔ.

¹²Ɩ̃ wõ n nɩ a bʋ̃-vɩɛlɩ á ŋá za nʋ̃ɔ̀, a Yã-bãwfʋ na n'ʋ tɩ kʋ̀rɛ mɛ̃ a ƴãw. Ɛcɛ ɩ̃ cãà bɛ tɩ bãw kɛ́ ʋl tɔr za n'ɩ a yib zie ɩ.

¹³A bom nɛ ɩ̃ na pɛlɩ pʋɔ zanɩ a ʋ zie a, ɩ̃ manɛ nɩ ʋ za kʋ̀rɛ a ɩ̃ taabɛ, ɩ̃ bɛ sɔwlɛ a ʋ na-bom kãw za ɩ,

¹⁴bʋ̃ʋ n'ʋ vɛ̃, a nɩsaalbɛ zie a, a Yã-bãwfʋ ɩ n na-bom na bɛ báarɛ a. A bɛlɩ dem na tɛr ʋ a, mɩ́ páw nɩ a Naaŋmɩn báalʋ: a wulu yel-vɩɛlɩ mɩ́ ɩ na bɛ pɛlɩ a ʋ pʋɔ.

¹⁵A Naaŋmɩn, ʋ́ sàw kʋ̀ m ɩ̃ ƴɛ̀rɛ nɩ yã, ɛ́ tɛr tɩɛrʋ na sɛw taa nɩ a bʋ̃-kʋ̀rɩ ɩ̃ na páw a. Bʋ̃ʋ n'ʋ vɛ̃, ʋlɛ n'ʋ wule a Yã-bãwfʋ a sɔ́r, ɛ́ wule a yã-bãwnbɛ a cenu.

¹⁶Ʋlɛ so a tɩɩm tɛɛ za nɩ a tɩ ƴɛ̀rʋ, a tɩ yã za nɩ a tɩ bãwfʋ za.

¹⁷Ʋlɛ n'ʋ ɩ k'ɩ̃ sɩrɩ bãw bom za na be a. Ʋlɛ n'ʋ wul mɛ̃ a lɛ a tẽ-daa na ŋmɛ̃ a nɩ a lɛ a pɩɛlʋ, a kʋ̃ɔ, a vũu nɩ a tẽsɔw na mɩ́ ɩrɛ a.

¹⁸Ʋlɛ n'ʋ mɩ̀ cãà wul mɛ̃ a zie na cɔbrɩ bin lɛ a: a ʋ tib, a ʋ põ-zɛ̃-taa nɩ a ʋ baarʋ, a mʋ̃tɔ̃w cenu nɩ a ziir lɩɛbʋ,

¹⁹a yome na lɩɛbɛ a, nɩ a salom zu bʋ̃-nyɩwrɩ na àr lɛ a,

²⁰a dʋn ŋmɛ̃a nɩ a wɛ-dʋn ɩb, a kɔ̃tɔmɛ fãw nɩ a nɩsaalbɛ tɩɛrʋ, a tɩ-bʋʋrɛ za nɩ a tɩ̃ɩnɩ a nyɩgɛ na tɛr a.

²¹Ɩ̃ bãw nɩ a bʋ̃-nyɛrɩ nɩ a bʋ̃-bɛ-nyɛrɩ, bʋ̃ʋ n'ʋ vɛ̃, a Yã-bãwfʋ na ír a tẽ-daa a, ʋlɛ n'ʋ wul mɛ̃ ɩ̃ bãw.

²²A Yã-bãwfʋ tɛr'ɩ vʋʋrʋ na bãw yã, ɛ́ ɩ sõw a. Ʋ ɩ n been yõ, ɛ́ a ʋ ɩb pɛ́ɛ yãwmɛ. Ʋ cɩ na, ɛ́ bɛ bere zi-been ɛ, ʋ bãw nɩ yel za pɛr, bɛ tɛr dɛwr ɛ, ɛ́ ɩ cãà. Faalʋ bɛ tʋ̀ɔr ʋ ɛ, ʋ nɔnɛ nɩ a vla, ɛ́ mɩ́ tʋlɛ a yel maalʋ ƴãw.

²³Ʋ so nɩ ʋ tʋɔra, ʋ ɩrɛ nɩ vla, ɛ́ ɩ a nɩsaalbɛ bá. Ʋ kpɛmɛ na, bɛ bʋ́nɛ ɩ, ɛ́ bom bɛ damnɛ ʋ ɛ. Ʋ mɩ́ tʋ̃ɔ́ nɩ bom za, ɛ́ piwre bom za. Ʋ bãw nɩ a vʋʋrʋ al za na tɛr yã ɛ́ ɩ parpar a, alɛ saa cɩ sɛw ŋmɩn a.

²⁴A Yã-bãwfʋ mɩ́ paw nɩ fɔ̃w zuo bom za na cere a. Ʋ mɩ́ kpɛ n bom za pʋɔ, ɛ́ tu tɔl bom za pʋɔ, ʋ na vɩɛl parpar a zũú.

²⁵Bʋ̃ʋ n'ʋ vɛ̃, pɩɛlʋ kãw na yire a Naaŋmɩn kpɛnʋ pʋɔ a n'ʋ, a kpɛnʋ-za-sob yúor-vɩɛlʋ-danʋ pʋɔ n'a ʋ yi daadaa. Lɛ so dɛwr kãw za kʋ̃ tʋ̃ɔ́ kpɛ a ʋ pʋɔ ɩ.

²⁶A cãà na be kʋralɛ a nyɩwrʋ kãw n'ʋ, a Naaŋmɩn ton càalá na bɛ tɛr dɛwr a, a ʋ nɔ̃wfʋ dasule kãw n'ʋ.

²⁷Ʋ ɩ n ʋ yõ, ɛ́ mɩ́ tʋ̃ɔ́ ɩ bom za. Ʋ bɛ lɩɛbɛ towtow ɛ, ɛ́ mɩ́ ɩ bom za lɩɛbɩ bʋ̃-paala. A nɩbɛ na dɔwr lɩɛrɛ taa a zie a, ʋ mɩ́ kpɛ n a nɩ-son sɩ́ɩr pʋɔ, k'ʋʋ tʋ̃ɔ́ ɩ bɛ lɩɛbɩ Naaŋmɩn bárɩ nɩ a ʋ ƴɛ̀r-manbɛ,

²⁸bʋ̃ʋ n'ʋ vɛ̃, a bɛlɩ dem na lãw nɩ a Yã-bãwfʋ a, bɛl tɛwr nɛbɛ a Naaŋmɩn nɔnɛ.

²⁹A Yã-bãwfʋ nyɩwrɛ na zuo a mʋ̃tɔ̃w nɩ a ŋmar-bie za. Bɛlɛ de ʋ man nɩ a mʋ̃tɔ̃w cãà a, a mʋ̃tɔ̃w cãà bɛ gbʋ́r ʋ ɛ:

³⁰bʋ̃ʋ n'ʋ vɛ̃, a tɩ̃ɩsɔw mɩ́ lɩɛr'ɩ a mʋ̃tɔ̃w, ɛcɛ a faa bɛ be za na tʋ̃ɔ́ a Yã-bãwfʋ ɛ.