Read Dagara, Northern Yã-bãwfʋ 8 Bible Online

Yã-bãwfʋ 8 - Dagara, Northern bible

Yã-bãwfʋ 8

¹A ʋ fãw paal'ɩ a tẽ-daa za, a tib zie tɩ tɔ a baarʋ zie, ʋʋ kaarɛ bom za zie nɩ nɔ̃wfʋ.

²A Yã-bãwfʋ n'ʋ ɩ̃ nɔ̃w, ɛ́ bɔ a ɩ̃ pɔ̀lʋ daarɩ́ za. Ɩ̃ nɔ̃w na ʋ na pɔ̀l a, ɛ́ bɔbr ʋ k'ɩ̃ɩ kul.

³Ʋ mɩ́ wul'ɩ cãàmɩlɛ ʋ na ɩ nɩ-yúor pɛr a, bʋ̃ʋ n'ʋ vɛ̃, ʋlɛ nɩ a Naaŋmɩn nɛbɛ, ɛ́ a bome za Sore nɔnɛ ʋ.

⁴A Naaŋmɩn ɩ na ʋ bãw a ʋ bãwfʋ yel-sɔwlɩ, alɛ so ʋ mɩ́ yel a lɛ a Naaŋmɩn na na ɩ a.

⁵A naalʋ wa ɩ bʋ̃-vla nɩr za bɔbr a ʋ nyɔ-vʋʋrʋ daar a, bʋ̃ʋ n'ʋ kpɛ naalʋ zuo a Yã-bãwfʋ na ír a bome za a?

⁶A tɩ yã wa tone a, a Yã-bãwfʋ bɛ tone gãw lɛ ɩ? Ʋl na maalɛ bom za na be a!

⁷Nyɩ nɔnɛ nɩ a yel na tori a a? A Yã-bãwfʋ pʋɔ n'a a mil-vɩɛlɩ yire: ʋlɛ n'ʋ wule a tʋɔra-nyɔwfʋ nɩ a maal-ɩb, a mɩnʋ nɩ a kanyir. Bom bɛ be be tɛr yel-ɩra zuo ʋ a nɩsaalbɛ nyɔ-vʋʋrʋ ƴãw ɛ.

⁸Nyɩ bɔbr'a kɛ́ nyɩ ír tɔnɛ yele nyɩ na bãw a cɛlɩ a pʋɔ bɩɩ? A Yã-bãwfʋ bãw nɩ a koro, ɛ́ mɩ́ tɩɛrɩ a lɛ a nɩdaar na na ŋmɛ̃ a. Ʋ bãw nɩ a zʋkpa-kpɛn pɛ́ɛ íru, ɛ́ mɩ́ cɛ̀r a yel-kpɛn nɛ́ɛ. Ʋ mɩ́ dãw na bãwnɩ a nɔ-ɓãa-yele, a yel-bãw-guuri nɩ a daar al a yele na ɩ tu taa a.

⁹À à ŋá n'a so, ɩ̃ yel k'ɩ̃ɩ na de ʋ na lãw kpɩɛr'ɩ a ɩ̃ cãafʋ daar za. Ɩ̃ tɩ bãwnɩ a na k'ʋʋ na wule mɛ̃ nɩ yã-vɩɛlɩ, ɛ́ mɔwlɛ mɛ̃ a kpɩɛrʋ nɩ a pʋ-sãwna daar.

¹⁰Ɩ̃ tɩ tɩɛr'ɩ ɩ̃ pʋɔ à ŋá: «A ʋl zũú, a ɩ̃ yúor na yi n a nɩ-yaga yaga pʋɔ, ɛ́ nɩ a ɩ̃ pɔlbiilu za a, a dɛb-nyamɛ na ƴãwnɛ mɛ̃ na.

¹¹Mãa mɩ́ wa dɩrɛ a ƴɛ̀rʋ a, bɛ na mɩ́ nyɛ̃ nɩ a lɛ ɩ̃ na tɛr tɩɛrʋ a, ɛ́ a na-mɩnɛ na mɩ́ nyɔw nɩ nʋɔr a ɩ̃ niŋé.

¹²Mãa wa ɩ gbili a, bɛ na cɛlɛ na, ɛ́ mãa wa ƴɛ̀rɛ a, bɛ na ƴãw nɩ tobr. A ɩ̃ ƴɛ̀rʋ wa cɛlɛ a, bɛ na nyɔw nɩ nʋɔr.

¹³A Yã-bãwfʋ zũú a, ɩ̃ kʋ̃ kpi ɛ, ɛ́ a pùorí nɩbɛ kʋ̃ yiiri a ɩ̃ yele towtow ɛ.

¹⁴Ɩ̃ na kaarɛ nɩ nɩ-bʋʋrɛ zie, ɛ́ só ten nɩbɛ.

¹⁵Bɛlɛ wa pore a ɩ̃ yúor a, dɛ̃bɩ̃ɛ na nyɔw nɩ na-mɩnɛ na ƴãwnɛ dɛ̃bɩ̃ɛ a nɩbɛ a. Ɩ̃ na ɩ n nɔ̃wfʋ nɩr a ɩ̃ nɩbɛ zie, ɛ́ kpɛ socir a zɛbr zie.

¹⁶Mãa wa lɛb ta a ɩ̃ yir a, a Yã-bãwfʋ zie n'a ɩ̃ na pɩ̃ɛnɛ, bʋ̃ʋ n'ʋ vɛ̃, a ʋ zie beba bɛ bãw tuo kãw za ɩ, nɩr na lãw nɩ ʋ a bɛ tɛrɛ pʋ-sãwna ɩ, pʋ-pla nɩ nʋ̃ɔ̀ tɛwr nɩ̃ɛ mɩ́ n'a.»

¹⁷À ŋá n'a ɩ̃ tɩ tɩɛr'ɩ a ɩ̃ pʋɔ, ɛ́ nyɛ̃ kɛ́ fʋ̃ʋ wa lãw nɩ a Yã-bãwfʋ a, fʋ bɛ be za na kpi ɛ,

¹⁸k'aa ʋ báalʋ n'ɩ a nʋ̃ɔ̀ na vɩɛl ʋ za a yib zie, ɛ́ a ʋ nuru tome waar'ɩ naalʋ na bɛ báarɛ a. Ɩ̃ mɩ̀ tɩ nyɛ̃ na kɛ́ fʋ̃ʋ wa tuur ʋ kʋrakʋralɛ a, fʋ mɩ́ tɛr'ɩ yã, ɛ́ páw yúor fʋ̃ʋ wa ƴɛ̀rɛ nɩ ʋ a. Alɛ so ɩ̃ tɩ nyɔw a ʋ bɔb, k'ɩ̃ɩ kul ʋ.

¹⁹Sɩza n'a, ɩ̃ tɩ ɩ n bi-vla ɛ́ tɩ páw sɩ́ɛ na vɩɛl a[24],

²⁰mɔ̃ mɩ̀, ɩ̃ na tɩ vɩɛl a zũú n'a, ɩ̃ tɩ kpɛ ƴã-gan na bɛ tɛr dɛwr a pʋɔ.

²¹Ɛcɛ, ɩ̃ tɩ bãwnɩ a na k'ɩ̃ɩ kʋ̃ páw a Yã-bãwfʋ, a Naaŋmɩn bɛ wa n'ʋ kʋ̀ m a ɩ, — ɛ́ a bãw ãa zie n'a a bʋ̃-kʋ̀ra ŋa tɔ yi a, tɩ ɩ n a yã baarɩ. — Lɛ so ɩ̃ tɩ lɩɛb cɔw a Sore ɛ́ puor'ʋ nɩ ɩ̃ pʋɔ za.