Read Dagara, Northern Yã-bãwfʋ 9 Bible Online

Yã-bãwfʋ 9 - Dagara, Northern bible

Yã-bãwfʋ 9

¹«Ɩ̃ sãàkʋm-kore Naaŋmɩn nɩ su-ɓaarʋ za Sore e, fʋ ír'ɩ a tẽ-daa nɩ a fʋ ƴɛ̀rʋ.

²Fʋ maal'ɩ a nɩsaal nɩ a fʋ Yã-bãwfʋ k'ʋʋ so a fʋ bʋ̃-íri za[25],

³k'ʋʋ kaarɛ a tẽ-daa zie mɛ̃ a lɛ fʋ na bɔbr a nɩ mɩnʋ, k'ʋʋ mɩ́ dɩ a ƴɛ̀rʋ a tu sɔ́r.

⁴Ɩ̃ zɛlɛ fʋ na: kʋ̀ m a Yã-bãwfʋ na be a fʋ lõbowrí, a fʋ naalʋ-dà-kɔw zu a, ɛ́ ta ír mɛ̃ bɛr a fʋ bibiir pʋɔ ɩ.

⁵Bʋ̃ʋ n'ʋ vɛ̃, ɩ̃ ɩ n a fʋ tõ-tõ-bie, a fʋ tõ-tõ-bi-pɔw bidɛb[26], bãbàal, nyɔ-vʋʋr-ŋmãa sob, na kʋ̃ tʋ̃ɔ́ bãw a mɩnʋ nɩ a nɛ́ɛ vla a.

⁶Mɔ̃ mɩ̀, nɩsaal saa vɩɛl ʋ za, ɛ́ bɛ tɛr a Yã-bãwfʋ na yi a fʋ zie a, bɛ na nyɛ̃ na ʋ bɛ tɛr pɛr ɛ.»

⁷«Fʋ̃ʋ n'ʋ nɔ̃w mɛ̃ zuo a bɛ za, ƴãw k'ɩ̃ ɩ a fʋ nɩ-bʋʋrɛ nãà, mɩ́ dɩ a ƴɛ̀rʋ kʋ̀ a fʋ bidɛbr nɩ a fʋ pɔwyaar[27].

⁸Fʋ yel mɛ̃ na k'ɩ̃ɩ ŋmãa Ŋmɩn-yir-kpɛ̃ɛ a fʋ tãw-sõw[28] zu, ɛ́ mɛ bàwr-maal-kuur a tẽ-kpɛ̃ɛ ʋl pʋɔ fʋ na maalɩ a fʋ tuor-taa pɛn-sɛw a, k'ɩ̃ɩ ɩ ʋ ŋmɛ̃ taa nɩ a tuor-taa pɛn-sɛw-sõw ʋl fʋ na tɩ cɔbrɩ a pɛr-tib daar a.»

⁹«A Yã-bãwfʋ pɩɛlɩ fʋ na, ɛ́ bãw a fʋ tome. Ʋ tɩ be n be a lɛn daar fʋ na tɩ ír a tẽ-daa a[29]. Ʋ bãw nɩ bom nɛ na mɩ́ pɛlɩ a fʋ pʋɔ a, bom nɛ na tu sɔ́r, nɩ bom nɛ na tu a fʋ nɛ-ƴãwnɩ a.

¹⁰Ɩ ʋ yi a salom zu, a fʋ kpɛb-zi-sõw pʋɔ, siw wa, zɩ̃ a fʋ naalʋ-dà-kɔw-yúor zu ɛ́ tɩr ʋ kʋ̀ m, ʋ be a ɩ̃ zie sõwne mɛ̃ a ɩ̃ tome pʋɔ, ɛ́ wule mɛ̃ bom nɛ na mɩ́ pɛlɩ a fʋ pʋɔ a.

¹¹Ʋl na bãw bom za, ɛ́ bãw yel za pɛr a, ʋ na wule mɛ̃ na nɩ yã a ɩ̃ cenu pʋɔ, ʋ na piw mɛ̃ na tɛr nɩ a ʋ yúor-vɩɛlʋ-danʋ cãà.

¹²Lɛ n'a a ɩ̃ ɩ-ɩrɩ na pɛlɩ a fʋ pʋɔ, Sore e. Ɩ̃ na dɩrɛ nɩ naalʋ a fʋ nɩ-bʋʋrɛ zu nɩ mɩnʋ, ɩ̃ na sɛw na taa nɩ a ɩ̃ sãà naalʋ-dà-kɔw.»

¹³Nɩ-buor sob'ʋ na tʋ̃ɔ́ bãw a Naaŋmɩn pʋ-tɩɛrʋ? Ãa n'ʋ na tʋ̃ɔ́ tɩɛrɩ bãw ʋlɩ bom nɛ a Naaŋmɩn na tɩɛrɩ k'ʋʋ na ɩ na a?

¹⁴A nɩsaalbɛ na ɩ bʋ̃-kpiiri a tɩɛrʋ mɩ́ bʋ́nɛ na, a lɛ tɩ na mɩ́ tɩɛrɩ a yele bin a bɛ mɩ́ àr ɛ.

¹⁵A tɩ ƴã-gan na ɩ bʋ̃-pʋ̃ɔna a mɩ́ ɩ na a tɩ sɩ́ɛ tɩbrɛ, ɛ́ a yawra wʋɔ ŋa ɩ tuor a tɩɛrʋ zie, ɛ́ ƴãwnɛ ʋ niw-sʋba yaga.

¹⁶Tɩ mɩ́ bãw nɩ a tẽw zu bome na ŋmɛ̃ lɛ a hanɩ nɩ za, a bom na pɩɛlɩ tɩ yɩ̃ɛlɛ a, tɩ mɩ́ bɔ na a kpɛ tɩ. A na ɩ à ŋá a, ãa n'ʋ na tʋ̃ɔ́ bɔ tɩ nyɛ̃ a bome na be a salom zu a?

¹⁷Ãa n'ʋ nãá tʋ̃ɔ́ bãw a fʋ pʋ-tɩɛrʋ, fʋ̃ʋ bɛ tɩ tɩr a Yã-bãwfʋ, ɛ́ tõ a fʋ Vʋʋrʋ Sõw ʋ yi a saa-zu wa a?

¹⁸À ŋá n'a a tẽw zu nɩbɛ sɛ́ɛ lɩɛbɩ sɛ-dẽdẽ. À ŋá n'a a nɩsaal bãw a ʋlɩ bom nɛ na pɛlɩ a fʋ pʋɔ a, ɛ́ nyɛ̃ a faafʋ a Yã-bãwfʋ zũú.